Read tetala Etumbelu 33 Bible Online

Etumbelu 33 - tetala bible

Etumbelu 33

¹Latuyalaka akatela Mose ati: Unela uma lane, utshu, we la wudja wakayatundja uma lu kete ya Edjibitu, utsha lu kete yakamalaki Abarahama,[121] Isaka[122] la Jakoba,[123] nti: Layuyisha tukanula taye.

²Dimi layutuma ondjelo la ntundu kaye; ku dimi layutshanya asi Kanana, asi Amora, asi Hiti, asi Perizi, asi Hiwi la asi Jebuse.

³Kutshu utsha lu kete yuludi too la awele la usanga. Keli dimi halutsho lʼatei anyu, ntukutunyushila ushiki lu mbuka, ne dia nyu nyeli wudja weli la ete wulu.

⁴Lamʼakuki antu lukumu loso la kolo, vo wakaleli. Nduku untu akalote dengalenga diandi.

⁵Ku Latuyalaka akatela Mose ati: Uteli asi Isariyele wati: Nyu nyeli wudja weli la ete wulu. Utunduyala dimi ntshu lʼatei anyu kuyanga yema tshitshe, tshiki lutunyushila. Okone nyunya dengalenga dianyu kakiane, ku dimi layena uku ayumunyutshela.

⁶Okone asi Isariyele wakanya dengalenga diawo, uma lʼUkungu a Horeba utsha la ntundu.

⁷Mose akose luudu la dipema, akaluhiki lʼandja a pangu, tshalula uma la pangu. Ndi akalole ati: Luudu lʼesanganelu la dipema. Ku untu tshe lakayangaka Latuyalaka, akatshu utsha la luudu lʼesanganelu la dipema, laki lʼandja a pangu.

⁸Lamʼakatshokaka Mose utsha la luudu la dipema, antu tshe wakunelaka. Untu lʼuntu akemalaka la suku dia luudu landi la dipema, enda Mose tee, edja ndu lamʼakandoto lu luudu la dipema.

⁹Lamʼakotoka Mose lu luudu la dipema, ekoho ka dingi kakahuloka, kakayemalaka la suku dia luudu la dipema. Ku Latuyalaka akateketaka la Mose.

¹⁰Lamʼakenaka antu tshe ekoho ka dingi kambemala la suku dia luudu la dipema, vo tshe wakunelaka, wakatemalaka untu lʼuntu la suku dia luudu landi la dipema.

¹¹Okone Latuyalaka akateketaka la Mose elanedi la ndi elundji lʼelundji, uku atoteketaka untu la ongenyi andi. Lamʼakakalulaka Mose utsha la pangu, olongo a pami Jashua, onʼa Nuna, ukimanyidi andi, kumumoka uma la luudu lako la dipema.

¹²Ku Mose akatela Latuyalaka ati: Enda, we akamvutela wati: Utundja wudja one. Ku we atanimbitshiya one layuyutuma kame la mi. Keli we akati wati: Dimi nkeyaka lukumbu, we akahumo ndu lukulu lʼolo lu ashu ami.

¹³Diako mbakosengasengami kakiane nti: Naka dimi lakahumo lukulu lʼolo lu ashu aye, omenya mbuka yaye kakiane, dia dimi nkeya la mpumo lukulu lʼolo lu ashu aye ntu. Ndu enyi wudja one wati: Wudja ami mbewo.

¹⁴Ku Latuyalaka akûkaluya diui ati: Eyalelu kami kayutsho la ye, ku layukusha mumuya.

¹⁵Ku Mose akawutela ati: Naka eyalelu kaye hutsho la mi, tutunyiaki uma lane.

¹⁶Ne dia ukundi ayeyama ati: Dimi lambuhumo lukulu lʼolo lu ashu aye, ndu dimi ndu wudja aye? Aha lu etshwelu kaye kame la su, dia shu ntshikitana, dimi la wudja aye, la wedja ekina tshe wa la kete?

¹⁷Latuyalaka akatela Mose ati: Dimi layutsha ndu dikambu diako so diateketaye, ne dia we akahumo lukulu lʼolo lu ashu ami, ndu dimi nkeyaka lukumbu.

¹⁸Ku Mose akolombe ati: Omenya lutumbu laye.

¹⁹Ku Latuyalaka akûkaluya diui ati: Dimi layetsha ololo ami tshe la ntundu kaye, ndu layeta lukumbu lami, Latuyalaka, la ntundu kaye. Ku le wane wayumuka ngandji ka mamba, mbayumuka ngandji ka mamba, ndu le wane wayumuka ketshi, mbayumuka ketshi.[124]

²⁰Keli ndi akati ati: We heyi mena elundji kami; ne dia untu heyi menami, ku ndi ntshikala la lumu.

²¹Ku Latuyalaka akati ati: Enda, dihuli dieko lasuki la mi, kuyemali laawo ladiku dia dive dia wuki.

²²Okone lamʼayeta lutumbu lami, dimi layukotshiya lu wuku wa dive, ku layukukumba la lunya lami, edja ndu lamʼayumushila mbeta.

²³Dimi layunya lunya lami, ku we ayena okongo ami. Keli elundji kami henama.