Read tetala Etumbelu 35 Bible Online

Etumbelu 35 - tetala bible

Etumbelu 35

¹Mose akasanganya ului tshe wʼasi Isariyele, akawatela ati: Akambu ane mbakati Latuyalaka dia nyu ntsha.

²Kanyukambaki ulimu nshi shamalu, keli lushi lʼesambeli, kanyuyalaki la lushi la mumuya lʼekila, la mumuya ka lukumu le Latuyalaka. Untu tshe latsha ulimu lushi lako, ayudiakema.[138]

³Tanyongonyaki dja lu mvudu yanyu lushi la muntuya.

⁴Mose akatela ului tshe wʼasi Isariyele ati: Dikambu ne mbakati Latuyalaka.

⁵Nyela ulambu le Latuyalaka uma lu diango dieli la nyu. Untu tshe leli la utema wa lukahu, ela ulambu wa Latuyalaka: paunyi, fesa, la ohotela;

⁶ahondo wʼedima, wʼengingi, la wa tilili, ndu wakatshama la eshinga wʼololo wa linene, ndu wa diosa dia mbudi;

⁷dikuhu dia waumi wʼekoko diakawanya lu dangi dia tilili, ndu dikuhu dia mbudi; etamba wʼulungu,

⁸iso ka tala, diango diʼupumu ne dia iso ka lukita ndu dia malashi wʼupumu;

⁹ave wa pesopeso, la ave wa mbidja lu ekimedi, ne dia nenga ukutu wa nemo, ndu dia nenga opema.

¹⁰Akanga a tokomba tshe lʼatei anyu kawuyi, kawutshi tumu tshe yakati Latuyalaka:

¹¹etemwelo ka dipema, dipema diato, ekumbelu kato, tokoho tato, abaya ato, esimbi ato, dikoho diato la dikitsbelu diato;

¹²oshete wa sheki la esimbi awo, ufudi la dihondo diʼekumbelu;

¹³mesa la esimbi awo, la diango diawo tshe diʼulimu, ndu ma dia Eyalelu;

¹⁴ndu ekitshelu ka tala, ne dia mpetshaka tala, kame la diango diato la atala ato ndu iso ka tala;

¹⁵ediakelu kʼelambu wa malashi, kame la esimbi ato, iso ka lukita, malashi wʼupumu ndu dihondo dia suku la suku diʼetemwelo ka dipema,

¹⁶ediakelu kʼelambu wa lutshumba kame la lukala lato lʼohotela, esimbi ato, ndu diango diato tshe diʼulimu, donga la ekitshelu kadio;

¹⁷ahondo wa mpane lu lukumbu la seke, dikoho dialo, la dikitshelu dialo, la dihondo dia mpane lu suku dia lukumbu;

¹⁸seti yʼetemwelo ka dipema la seti ya lukumbu la seke, ndu ekodi ayo;

¹⁹ahondo wakatshama dia ntsha ulimu lu dihuli diʼekila, eloto wʼekila wa olombedi Arona, ndu eloto wa anʼandi wʼapami, wa ulimu awo wʼolombedi.

²⁰Ului tshe wʼasi Isariyele wakamo uma la le Mose.

²¹Vo tshe wakayi untu lʼuntu uku akusukuya utema andi, untu lʼuntu uku akalangi lumu landi, wakela ushasha wa Latuyalaka, dia ntsha ulimu wa luudu lʼesanganelu la dipema, la elimu alo tshe, ndu eloto wʼekila.

²²Diako mbakawayi, ndu apami ndu amantu; wane tshe wakalangi, wakela wehu tshe wa dengalenga dia paunyi: ashingu, tungunga tʼatui, pete ya dimatelu, ndu ekoma. Untu tshe akalambula ushasha a paunyi le Latuyalaka.

²³Ndu untu tshe lakatani ahondo wʼedima, wʼengingi, wa tilili, wakatshama la eshinga wa linene wʼololo, ndu wa diosa dia mbudi, akela. Wakela ndu dikuhu dia waumi wʼekoko diakawanya lu dangi dia tilili, ndu dikuhu dia mbudi.

²⁴Untu tshe laki la ushasha wa fesa kana wʼohotela, akawela uku ushasha le Latuyalaka. Ndu untu tshe lakatani utamba wʼulungu, wakahumbama lʼulimu, akawela.

²⁵Amantu tshe akanga a tokomba, wakelaka ahondo wʼedima, wʼengingi, la wa tilili, la eshinga wa linene wʼololo lʼanya awo, wakawaela.

²⁶Lʼatei amantu tshe, akanga a tokomba, wane wakalangi, wakele ahondo la eshinga wa diosa dia mbudi.

²⁷Dihangamendi dia wudja wakela ave wa pesopeso, la ave wa mbidja lu ekimedi, dia nenga ukutu wa nemo, ndu dia nenga opema,

²⁸diango diʼepumu la iso dia mbidja lu tala, dia iso ka lukita ndu dia malashi wʼupumu.

²⁹Apami tshe la amantu tshe wʼasi Isariyele wakalangi, wakela diango dimotshi diʼulimu wakadjangela Latuyalaka Mose dia vo ntsha, wakadiela uku elambu awo wa lulangu le Latuyalaka.

³⁰Ku Mose akatela asi Isariyele ati: Nyendi, Latuyalaka akasonola Bezalele, onʼa pami a Uri, onʼa Hura, uma lu diuhu dia Juda.

³¹Ndi akuludia la Nyuma ka Unyashungu, la komba, la yimba, la ewu ndu la eyelu ka wehu tshe wʼelimu watutshaka antu,

³²dia ndi ntatela sangweyu diʼelimu wa komba, dia nkamba la paunyi, la fesa ndu lʼohotela,

³³dia nkolonga ave wa mbidja lu ekimedi, dia nsela etamba, dia ntsha elimu tshe wa komba.

³⁴Ndi akawusha ndu ushasha wa mbetsha antu, ndi la Oholiyabe, onʼa Ahisamaka, uma lu diuhu dia Dane.

³⁵Ndi akaludia la komba ya ntsha wehu tshe wʼelimu wa Iosela, watutshamaka uma le okolonga, uma le utungi wʼelimu, kuyanga uma le umbidji wʼasangu lu ahondo wʼedima, wʼengingi, la wa tilili la eshinga wʼololo wa linene; kana wʼuma le umbitshi — wʼuma le wuhu tshe wʼusʼulimu kuyanga umbidji wʼasaangu wa komba.