Read tetala Etumbelu 36 Bible Online

Etumbelu 36 - tetala bible

Etumbelu 36

¹Bezalele, Oholiyabe la akanga a tokomba tshe wakalungula ewu la yimba uma le Latu-yalaka, ya mbeya wehu tshe wʼelimu wa mpika etemwelo, kawutshi elimu tshe uku akati Latuyalaka.

²Mose aketi Bezalele, Oholiyabe la akanga a tokomba tshe wakasha Latuyalaka ewu, ndu waki la pusa lu etema awo ka ndja, dia ndjutsha ulimu.

³Vo wakalungula eshasha tshe wakelaka asi Isariyele le Mose dia ntsha ulimu wʼetemwelo. Asi Isariyele wakawelaka eshasha pindju la pindju.

⁴Okone akanga a tokomba wakatshaka wehu tshe wʼelimu wʼetemwelo wakayi, untu lʼuntu uma lʼulimu wakandatshaka,

⁵wakayutela Mose vati: Eshasha wambela antu ane, wambuleka yediko yʼehumba wa tumu tshe yakatutela Latuyalaka dia ntsha.

⁶Okone Mose akati diui; ku wakadidianganya lu pangu vati: Untu tshe, pami kana umuntu, tayaenyaki pa ntu dia mbela eshasha wa ntsha ulimu wʼetemwelo. Osoku mbakawashimbi antu dia mbela esasha.

⁷Mete eshasha wakawelaka, wakakuki dia ntsha elimu tshe, ndu ekina ladiku.

⁸Akanga a tokomba tshe wa lʼului a wane wakakambaka, wakatshi etemwelo ka dipema la apema dikumi. Vo wakatshi la eshinga wʼololo wa linene, wʼedima, wʼengingi, ndu wa tilili; wakasangi esatu wa akeruba la lononga loko.

⁹Utali wa dipema la dipema aki kubita akumi ahendi la enanei, la wuki adio kubita nyei. Apema tshe wakatshama yediko otoi.

¹⁰Ndi akasamanya apema atanu kame, ndu akasamanya apema akina atanu kame.

¹¹Ndi akadji ehanga lʼumamu a dipema diakayukumela lu esamanyelu ka ntundu. Osoku mbakandatshi ndu lʼumamu wa dipema diakayukumela lu esamanyelu ka hendi.

¹²Ndi akadji ehanga akumi atanu lʼumamu a dipema dia ntundu, ndu akumi atanu wakawadji lʼumamu a dipema dia hendi wakelanela.

¹³Ndi akatshi ashingu akumi atanu wa paunyi dia nsamanya apema ako la ashingu. Ku etemwelo ka dipema akayala dipema otoi.

¹⁴Ndi akatshi ndu apema wa diosa dia mbudi, dia ndjala dipema otoi dia nkumba etemwelo ka dipema. Ndi akatshi apema dikumi la otoi.

¹⁵Utali wa dipema la dipema waki kubita akumi asatu, la wuki adio kubita nyei. Apema ako dikumi la otoi waki yediko otoi.

¹⁶Ndi akasamanya apema atanu laandi, la apema asamalu laandi.

¹⁷Ndi akatshi ehanga akumi atanu dia mbidja lʼumamu a dipema diakayukumela lu esamanyelu kekina.

¹⁸Ndi akatshi ashingu akumi atanu wʼehotela dia nsamanya apema wʼote a luudu, dia vo ndjala dipema otoi.

¹⁹Ndi akatshi dikuhu dia waumi wʼekoko diakawanya lu dangi dia tilili, la dikuhu dia mbudi, dia nkumba ote wa luudu.

²⁰Ndi akatshi abaya wʼulungu ne dia etemwelo ka dipema; akawaeme wemema.

²¹Utali wa dibaya otoi aki kubita dikumi, la wuki adio kubita otoi la etenyi.

²²Dibaya la dibaya diakatshongama sodi hyendi la tshina diadio. Osoku mbakandatshi lu abaya tshe wʼetemwelo ka dipema.

²³Ndi akatshi abaya wʼetemwelo ka dipema okone: akumi ahendi wa mbidja lu eheli ka lu leke la diku dia kushi;

²⁴ndi akatshi dikitshelu dia fesa diaki la afuku akumi anei la tshina dia abaya akumi ahendi ako. Okone afuku ahendi wa dikitshelu dia fesa wakayala la tshina dia dibaya la dibaya dia nsome sodi yadio hyendi.

²⁵Ndi akatshi abaya akumi ahendi wa mbidja lʼeheli ka hendikʼetemwelo ka dipema lu leke la ngelʼa kushi,

²⁶la dikitshelu dia fesa diaki la afuku akumi anei: afuku ahendi la tshina dia dibaya la dibaya.

²⁷Ndi akatshi abaya asamalu wa mbidja lʼeheli ka la dihambi diʼetemwelo ka dipema, lu leke lʼedjeiu ka unya.

²⁸Ndi akatshi abaya ahendi wa mbidja lu atshuku wa la dihambi diʼetemwelo ka dipema.

²⁹Okone abaya ahendi wakamamana kame lʼesi, ku wakatukelekama la shingu ladiku. Osoku mbakandatshi lu atshuku ako ahendi.

³⁰Okone vo waki abaya enanei, la dikitshelu diawo dia fesa diaki la afuku dikumi la asamalu: afuku ahendi la tshina dia dibaya la dibaya.

³¹Ndi akatshi esimbi wʼutamba wʼulungu etanu, dia nkimela abaya wʼeheli kemotshi kʼetemwelo ka dipema;

³²esimbi etanu, dia nkimela abaya wʼeheli kekina, la esimbi etanu, dia nkimela abaya wʼeheli ka la dihambi ka lu leke lʼedjelu ka unya.

³³Ndi akeke usimbi wa lʼatei, wakatenanya kuma la kuma, dia nkimela abaya.

³⁴Ndi akakumbi abaya la paunyi; akatshi ashingu awo wa paunyi wa nsome esimbi. Ndi akakumbi esimbi la paunyi.

³⁵Ndi akatshi dihondo diʼekumbelu la eshinga wʼololo wa linene, wʼedima, wʼengingi, la wa tilili; akasangi akeruba la lononga loko.

³⁶Ndi akatshi dikoho nei diʼetamba wʼelungu; akadikumbi la paunyi. Dio diaki ia tokoho ta paunyi, ku ndi akadilelwela dikitshelu dia fesa nei.

³⁷Ndi akatshi dihondo diʼekumbelu dia mpaneka la suku dia luudu la dipema, la eshinga wʼololo wa linene, wʼedima, wʼengingi, la wa tilili; ulimu oso aki asangu wa lononga.

³⁸Ndi akatshi ndu dikoho diadio kame la tokoho tadio. Ndi akakumbi ete wa dikoho diako ndu tusimbi tadio la paunyi. Ndi akatshi ndu dikitshelu diadio diʼehotela tanu.