Read tetala Etumbelu 37 Bible Online

Etumbelu 37 - tetala bible

Etumbelu 37

¹Bezalele akatshi oshete wa sheki la abaya wʼulungu. Utali awo aki kubita hyendi la etenyi, wekeki awo kubita otoi la etenyi, la wemema awo kubita otoi la etenyi pupu.

²Ndi akukumbi la paunyi ketu lʼandja ndu lʼetei. Ndi akadji ndu ukaba wa paunyi lʼutshimba awo tshe.

³Ndi akalelola paunyi dia ntsha ashingu anei wʼoshete, akawadji lu atshuku awo anei: ahendi wedi omotshi, la ahendi wedi ukina.

⁴Ndi akatshi esimbi wʼutamba wʼulungu, akekumbi la paunyi.

⁵Ndi akasome esimbi lu ashingu wa lʼemamu wʼoshete wa sheki, dia membaka oshete wa sheki.

⁶Ndi akatshi ufudi awo la paunyi ketu. Utali awo waki kubita hyendi la etenyi ndu wekeki awo kubita otoi la etenyi.

⁷Ndi akatshi akeruba ahendi la paunyi ka lutshula lu kuma hyendi yʼufudi.

⁸Okeruba omotshi la kuma kemotshi la okeruba ukina la kuma kekina. Ndi akatshi akeruba ako wusamanyi kame lʼufudi lu kuma yawo hyendi uma lʼukama otoi wa paunyi.

⁹Akeruba wakasamanya ahafu awo dia nkumba ufudi. Vo wakelanedi wokole dundji diawo utsha lʼufudi.

¹⁰Ndi akatshi mesa wʼabaya wʼulungu. Utali awo aki kubita hyendi, wekeki awo kubita otoi, la wemema awo kubita otoi la etenyi.

¹¹Ndi akukumbi la paunyi ketu, akadji ukaba lʼutshimba awo.

¹²Ndi akadji dibaya diaki la wuki wa pita nyei lʼutshimba wa mesa, ku ndi akadji ukaba wa paunyi lʼutshimba adio.

¹³Ndi akalelola paunyi dia ntsha ashingu anei wa mesa; akawadji lʼekulu enei wa lu atshuku wa mesa.

¹⁴Ashingu ako waki lasuki lʼuhimbu wa mesa, dia nsomeka esimbi wa membaka mesa.

¹⁵Ndi akatshi esimbi wʼetamba wʼulungu wa membaka mesa, akekumbi la paunyi.

¹⁶Ndi akatshi diango diʼulimu la paunyi ketu dia nkitsha lu mesa: alonga awo, alonga awo wʼafuku, wa mbidjaka malashi, akoho awo wʼetali, ndu tolondo tawo ta mangulaka elambu wa lutela.

¹⁷Ndi akatshi ndu ekitshelu ka tala la paunyi ketu. Etshina la usika wʼekitshelu ka tala wakatshulama lutshulama. Akoho ato, ehundu ato, la alembo ato wakatshulama lutshulama uma lʼukama otoi wa paunyi kame la to.

¹⁸Ekitshelu kako ka tala kaki la tahi shamalu yusamanyi lʼusika: tahi shatu wedi omotshi, la tahi shatu wedi ukina.

¹⁹Lutahi otoi laki la akoho asatu wufanyi lʼehundu la alembo wʼutamba wa amande. Osoku mbakayala lutahi la lutahi lu tahi yako shamalu.

²⁰Akoho anei wufanyi la ehundu la alembo wʼutamba wa amande waki lʼusika wʼekitshelu ka tala.

²¹Uhundu omotshi waki la tshina dia tahi hyendi hyendi, yako yaki shamalu, yakasamanyi lʼekitshelu ka tala.

²²Utundu wʼekitshelu ka tala, ehundu ato, la tahi yato, vo tshe wakatshulama lʼukama otoi wa paunyi ketu.

²³Ndi akatshi atala ato esambeli, tosholo tato ta nyima atala, ndu alonga ato wa minya utuku, la paunyi ketu.

²⁴Ndi akatshi diango diato tshe diʼulimu uma lʼukama otoi wa paunyi ketu wa talata otoi.

²⁵Ndi akatshi ediakelu ka malashi la etamba wʼelungu. Utali ato aki kubita otoi, wekeki ato kubita otoi; to kaki la beke diedimi, keli wemema ato kubita hyendi. Seki yato yakakami loko.

²⁶Ndi akakikumbi la paunyi ketu ladiku, lʼutshimba ato tshe, ndu lu seki. Ku ndi akadji ukaba wa paunyi lʼutshimba ato tshe.

²⁷Ndi akadji ashingu ahendi wa paunyi lu wedi la wedi, la tshina diʼukaba, dia nsome esimbi wa nkiembaka.

²⁸Ndi akatshi esimbi wʼetamba wʼulungu, akekumbi la paunyi.

²⁹Ndi akatshi ndu iso ka lukita kʼekila, ndu malashi wʼupumu, uku atutshaka utshi wa malashi.[139]