Read tetala Etumbelu 38 Bible Online

Etumbelu 38 - tetala bible

Etumbelu 38

¹Ndi akatshi ediakelu kʼulambu wa lutshumba lʼetamba wʼulungu. Utali ato aki kubita tshanu, ndu wekeki kubita tshanu; to kaki la beke diedimi, keli wemema ato aki kubita shatu.

²Ndi akasele seki yato lʼutamba ako lu atshuku anei wʼediakelu, seki yato yakaselama lu etshi otoi yukami loko. Ku ndi akakikumbi lʼohotela.

³Ndi akatshi diango tshe diʼulimu diʼediakelu: puki, kasu, alonga wʼafuku, somo, ndu pusu ya membaka akalanga. Ndi akatshi diango diato so tshe diʼulimu lʼohotela.

⁴Ndi akatshi lukala lʼediakelu lʼohotela, akaludji lʼatei, la tshina diʼunyo ato, dia lo ndjala kʼatei atei wʼediakelu.

⁵Ndi akalelola ohotela, akatshi ashingu anei, akawadji lu atshuku anei wa lukala lʼohotela dia nsome esimbi.

⁶Ndi akatshi esimbi wʼetamba wʼulungu, akekumbi lʼohotela.

⁷Ndi akasome esimbi lu ashingu lʼumamu wʼediakelu, ne dia nkiembaka. Ndi akatshi ediakelu lʼabaya, akakitshiki hwe lʼatei.

⁸Ndi akatshi donga diʼohotela, la ekitshelu kadio la ohotela,[140] uma lu nendu yʼamantu ekambi wʼulimu, wakakambaka ulimu la suku dia luudu lʼesanganelu la dipema.

⁹Ndi akatshi seke. Akatshi ahondo la eshinga wʼololo wa linene wa mpaneka lʼeheli ka lukumbu la seke kʼutsha lu leke la diku dia kushi: utali awo waki kubita lukama,

¹⁰dikoho diawo diaki akumi ahendi la dikitshelu diadio akumi ahendi diʼohotela, keli tokoho ta dikoho la esimbi ato waki wa fesa.

¹¹Leke la ngelʼa kushi laki utali wa kubita lukama, ndu la dikoho akumi ahendi dia mpane ahondo, la dikitshelu diawo akumi ahendi diʼohotela, ndu tokoho ta dikoho la esimbi ato wa fesa.

¹²Lu leke lʼedjelu ka unya, akahanemi ahondo waki utali wa kubita akumi atanu, la dikoho diawo dikumi, ndu dikitshelu diawo dikumi diaki la afuku. Tokoho ta dikoho, la esimbi ato waki wa fesa.

¹³Wuki wʼeheli ka lu leke lʼehutwelu ka unya aki kubita akumi atanu.

¹⁴Ahondo wa lu wedi omotshi wa suku dia lukumbu waki utali a kubita dikumi la tshanu, kame la dikoho satu ndu la dikitshelu satu.

¹⁵Ahondo wa lu wedi ukina wa suku dia lukumbu waki utali a kubita dikumi la tshanu, kame la dikoho satu ndu la dikitshelu satu.

¹⁶Ahondo tshe waki lu lukumbu la seke, wakatshama la eshinga wʼololo wa linene.

¹⁷Dikitshelu dia dikoho diaki ehotela, keli tokoho ta dikoho la esimbi ato waki wa fesa; ndu ete awo wa dikoho wakakumbama la fesa. Ndu dikoho tshe dia lukumbu la seke diakakimanela lu esimbi wa fesa.

¹⁸Dihondo dia suku diakatshama la lononga lʼeshinga wa linene wʼololo, wʼedima, wʼengingi, la wa tilili. Utali adio aki kubita akumi ahendi la tshanu utsha lʼulungu lu wekeki adio, wedimi la ahondo wa lukumbu tshe.

¹⁹Dikoho diadio diaki nei; la dikitshelu diadio nei diaki diʼohotela, la tokoho tadio ta fesa. Ete awo wa dikoho la esimbi adio wakakumbama la fesa.

²⁰Seti tshe ya lʼetemwelo ka dipema ndu ya lukumbu la seke yaki yʼebotela.

²¹Lanʼeli efula ka diango diakawali ne dia etemwelo ka dipema, etemwelo ka dipema kʼomenyi uku akawatela Mose, dia nkutsha ehumba wʼelimu wʼasi Lewi wakalombolaka Itamara, onʼa olombedi Arona, la pami.

²²Bezalele, onʼa Uri, onʼa Hura, uma lu diuhu dia Juda, akatshi akambu tshe uku akatela Latuyalaka Mose.

²³Ndi akakambaka la ukimanyidi andi Oholiyabe, onʼa Ahisamaka, uma lu diuhu dia Dane, laki okolonga, utungi wʼelimu, ndu umbidji wʼasangu lu ahondo wakatshama la eshinga wa linene wʼololo, wʼedima, wʼengingi, la wa tilili.

²⁴Efula ka paunyi yakoto lʼulimu wʼetemwelo, uma lu eshasha wakakimo antu, yaki talata akumi ahendi la divwa, la toshekele kama esambeli la akumi asatu, wuhu wa shekele ya lu etemwelo.

²⁵Efula ka fesa yakatumbi uma lu eshasha wʼantu, yaki talata lukama, la toshekele kinunu la kama esambeli akumi esambeli la tshanu, wuhu wa lu etemwelo.

²⁶Efula kʼapami waki uma lu deku akumi ahendi pulu ladiku wakakimo eshasha, waki antu nunu kama shamalu la nunu satu kama tshanu la akumi atanu. Untu lʼuntu akakimo beka otoi (mvuta ati: Etenyi otoi ka hendi ka shekele,[141] wuhu wa lʼetemwelo).[142]

²⁷Wakalelola fesa ya talata lukama dia ntsha dikitshelu diʼetemwelo ndu dikitshelu dia lukumbu la mpane ahondo. Wakatshi dikitshelu lukama lu talata lukama, talata otoi lu ekitshelu la ekitshelu.

²⁸Ndi akose fesa ya wutshu wa kilo dikumi, akatshi tokoho ta dikoho, akakumbi ete wa dikoho, akatshi ndu esimbi wa dikoho.

²⁹Efula ka eshasha wʼehotela kaki talata akumi esambeli, la toshekele nunu pendi la kama nyei.

³⁰La ohotela ako mbakandatshi dikitshelu dia la suku dia etemwelo ka dipema, ediakelu kʼohotela la lukala lato lʼohotela, ndu diango tshe diʼulimu dia lʼediakelu;

³¹dikitshelu dia lukumbu la seke, dikitshelu dia lʼutshimba tshe wa lukumbu la seke, dikitshelu dia la suku dia lukumbu, la seti tshe ya etemwelo ka dipema ndu ya lʼutshimba a lukumbu tshe la seke.