Read tetala Etumbelu 39 Bible Online

Etumbelu 39 - tetala bible

Etumbelu 39

¹Vo wakatshi eloto wʼulimu wa lu dihuli diʼekila lʼahondo wʼedima, wʼengingi, la wa tilili. Vo wakatshela Arona eloto wʼekila, uku akatela Latuyalaka Mose.

²Ndi akatshi ukutu wa nemo la eshinga wʼololo wa linene, wʼedima, wʼengingi, wa tilili ndu wa paunyi.

³Vo wakatshuli paunyi dia yo ndjala betshi dia tolewelewe. Ku wakadiati tushinga dia nsanga kame la eshinga wʼololo wa linene, wʼedima, wʼengingi, la wa tilili. Oso aki ulimu wa lononga.

⁴Vo wakatshi betshi dia lu aheka diakawayusamanya lu emamu ehendi wʼukutu.

⁵Uya wakatshama la lononga uku ukutu wa nemo, wakawamamanya kame la wo, wakatshama lʼeshinga wa linene wʼololo, wʼedima, wʼengingi, wa tilili, ndu wa paunyi, uku akatela Latuyalaka Mose.

⁶Vo wakalongosola ave wa pesopeso, ku wakawadji lu ekimedi wa paunyi, wakafundama kumbu yʼana wa Isariyele, uku atuwufundaka lu dimatelu.

⁷Ndi akawahe ladiku dia betshi dia lu aheka wʼukutu wa nemo, dia vo ndjala ave wʼeuhwelu kʼana wa Isariyele, uku akatela Latuyalaka Mose.

⁸Ndi akatshi opema la eshinga wʼololo wa linene, wʼedima, wʼengingi, wa tilili ndu wa paunyi la lononga, uku akandatshi ukutu wa nemo.

⁹Opema ako akayala la ndjalu hyendi ndu beke nei diedimi. Utali awo aki nana otoi dia pita ndu wuki awo nana otoi ku wakayala ndjalu hyendi.

¹⁰Vo wakolenge lʼenongo enei wʼave wʼushinga a wulu. Lu onongo wa ntundu; dive dia tilili, diʼendondo, diʼeleselese;

¹¹lu onongo wa hendi: dive diʼeleselese, diʼudima, ndu dia pesopeso;

¹²lu onongo wa satu: dive diʼetukutuku, dia wehu wehu, ndu diʼengingi;

¹³lu onongo wa nei: dive diʼekesekese, dia pesopeso, ndu dia awadi awadi. Ave ako wakakimanela lu ahuli awo la ekimedi awo wa paunyi.

¹⁴Vo waki ave dikumi la ahendi, uku aki ana wʼapami wa Isariyele. Dive la dive diakafundama lukumbu lomotshi lʼatei a wauhu dikumi la ahendi wa Isariyele lʼutshimo, uku atuwufundaka ematelu.

¹⁵Vo wakele miolola wa paunyi esambala ne dia opema.

¹⁶Vo wakatshi ekimedi ehendi wa paunyi la ashingu ahendi wa paunyi, ku wakadji ashingu ahendi lu emamu ehendi wʼopema.

¹⁷Vo wakadji esambala ako ehendi wa paunyi lu ashingu ahendi waki lu emamu wʼopema.

¹⁸Vo wakamamanya kuma hyendi yʼekodi lu ekimedi wʼave. Vo wakamamanya ekimedi lʼokodi wa lʼaheka wʼukutu wa nemo uya la ntundu.

¹⁹Ku vo wakatshi ashingu ahendi wa paunyi, wakawadji la kuma hyendi yʼuhimbu wa lʼesi opema wakamamemi lʼukutu wa nemo.

²⁰Vo wakatshi ashingu ahendi wa paunyi, wakawadji lʼesi a betshi pendi dia lu aheka wʼukutu wa nemo uya la ntundu. Vo waki lasuki lʼesamanelu ladiku diʼuya wʼukutu wa nemo wakatshama la lononga.

²¹Vo wakamamanya ashingu wʼopema la ashingu wʼukutu wa nemo la okodi wʼudima, dia opema ndjala ladiku diʼuya wʼukutu wa nemo, ndu ne dia vo watukukakitwana la ukutu wa nemo, uku akatela Latuyalaka Mose.

²²Ndi akatshi ndu ukutu wʼukutu wa nemo lʼahondo wakelama lʼeshinga wʼedima etu.

²³Ndi akati kingu kʼatei atei ka mbidjaka ote. Ndi akadji utiimbu wa lononga lʼutshimba tshe wa kingu, wu-fanyi la wa kingu ka koti dia mbulu, ne dia vo watukate.

²⁴Wakadji asangu wa dikomi diʼutamba la dangi diʼudima, diʼengingi, ndu dia tilili, lʼuhimbu wʼukutu.

²⁵Vo wakatshi ndu tungunga ta paunyi ketu; wakatudji lʼasa dikomi, ladiku diʼuhimbu wʼukutu, lʼutshimba tshe lʼasa tungunga.

²⁶Nyunga lʼekomi, nyunga lʼekomi mbakawadji lʼutshimba tshe ladiku diʼuhimbu wʼukutu wa ntshaka ulimu, uku akatela Latuyalaka Mose.

²⁷Vo wakatshela Arona la anʼandi wʼapami ndu sumishi yakelama lʼeshinga wʼololo wa linene,

²⁸ndu lufule lʼolombedi lʼeshinga wʼololo wa linene, ndu tufulefule tʼamena lʼeshinga wʼololo wa linene, ehaku awo la eshinga wa linene.

²⁹Vo wakatshi ndu uya la eshinga wʼololo wa linene wʼedima, wʼengingi, la wa tilili, wakadjama asangu la lononga, uku akatela Latuyalaka Mose.

³⁰Vo wakatshi lukaka la dembo dia kusu diʼekila la paunyi ketu. Vo wakatshimi loko uku atuwutshimaka ematelu dia nfunda diui ne ati: EKILA LE LATUYALAKA.

³¹Vo wakalukeleka ladiku dia lufule lʼolombedi lʼushinga wʼudima, uku akatela Latuyalaka Mose.

³²Osoku mbakashidiya asi Isariyele tumu tshe ya etemwelo ka dipema. Akambu tshe wakatela Latuyalaka Mose, mbakawatshi.

³³Vo wakela etemwelo ka dipema le Mose, luudu la dipema la diango dialo tshe diʼulimu, tokoho talo, abaya alo, esimbi alo, dikoho dialo, ndu dikitshelu dialo;

³⁴ekumbelu ka dikuhu dia waumi wʼekoko diakawanya lu dangi dia tilili, ekumbelu ka dikuhu dia mbudi, ndu dihondo diʼatanyelu;

³⁵oshete wa sheki wʼomenyi kame la esimbi awo, la ufudi;

³⁶mesa la diango diawo diʼulimu tshe, ndu ma dia Lenya;

³⁷ekitshelu ka tala ka paunyi ketu la atala ato, kame la atala wukitshami la diango diato tshe diʼulimu, ndu iso ka mpetshaka atala;

³⁸ediakelu ka paunyi, iso ka lukita la malashi wʼupumu, ndu dihondo dia ndjihaka suku dia luudu la dipema;

³⁹ediakelu kʼohotela, lukala lato lʼohotela, esimbi ato, la diango diato tshe diʼulimu; donga la ekitshelu kadio;

⁴⁰ahondo wa mpane lu lukumbu la seke, dikoho dialo, dikitshelu dialo, dihondo dia ndjihaka suku dia lukumbu la seke, ekodi alo, seti yalo; ndu diango tshe diʼulimu, dia ntshaka ulimu wa etemwelo ka dipema, ne dia luudu lʼesanganelu la dipema;

⁴¹ndu eloto wakatshama ne dia ntsha ulimu lu dihuli diʼekila; ahondo wʼekila wʼolombedi Arona ndu eloto wa anʼandi wʼapami, wa ntshaka ulimu wʼolombedi.

⁴²Asi Isariyele wakatshi elimu tshe wakatela Latuyalaka Mose.

⁴³Mose akashishima elimu tshe wakawatshi, ku ndi akenyi ati: Vo wakatshi tshe. Uku akati Latuyalaka, wuhu ako mbakawatshi. Ku Mose akatshokola.