Read tetala Etumbelu 5 Bible Online

Etumbelu 5 - tetala bible

Etumbelu 5

¹Lʼokongo diku, Mose la Arona wakatshu le Farayo, wakatuwutela vati: Latuyalaka, Unyashungu wa Isariyele, kata ati: Ukimo wudja ami watshu, keli watuyali la lushi la wuki lʼusui wa shenga dikambu diami.

²Ku Farayo akawambula ati: Akona eli Latuyalaka, ukukimi nkitanyia diui diandi la nkimo asi Isariyele dia vo ntsho? Dimi haleyi Latuyalaka, dikambu dikina, halukimo asi Isariyele dia vo ntsho.

³Ku vo wakûkaluya diui vati: Unyashungu wʼasi Heberu akasangana la su. Shu tambukosengasenga shati: Utukimo tutshu lokendo la nshi shatu lʼusui wa shenga, tutulambuli Latuyalaka, Unyashungu asu, elambu, ne dia ndi atukutudiaka la elandu kana la yombo.

⁴Keli khumʼekanga ka Edjibitu akawambula ati: Mose la Arona, okoko wana walanganyu minya antu ane uma lʼelimu awo? Nyukaluli lʼelimu anyu.

⁵Farayo akati ati: Enda, wudja one waya efula kakiane lu kete, ku nyu nyambuwasha mumuya lʼelimu awo.

⁶Lushi lako, Farayo akadjangela ewandji wʼulimu wa wudja la asikawo waki tupita ati:

⁷Tanyushaki wudja nengese dia vo ntsha atafadi, uku nshi ya ntundu. Nyuwaete watshoki dia ntuyayangelaka nengese.

⁸Keli nyutetemali mbalomba efula kʼatafadi uku akawabulaka nshi ya ntundu, tanyukitshakitshaki nduku yema, ne dia vo mbidjaseka udjasedjase. Diako mbalelawo vati: Tutshu, tutulambuli Unyashungu asu elambu.

⁹Nyahanyiya apami ane elimu dia vo nkambaka, watukudja tukanyi tawo lu aui wa kashi aso.

¹⁰Ku ewandji wʼulimu la tupita ta wudja wakatumbi, wakayutela wudja vati: Farayo kata ati: Handjuwasha nengese ntu.

¹¹Nyutshoki nyame, nyutuyayangelaki nengese lene ukukinyu yitana, keli ulimu anyu hawukitakita nduku yema.

¹²Ku wudja uku wakadiangana lu kete tshe ya Edjibitu la ntuhikula atshina wa nengese lu dihuli dia nengese.

¹³Ewandji wʼelimu wakahinyiaka vati: Nyukutsha ulimu anyu, ulimu anyu wa la lushi la lushi, uku akanyakutshaka lamʼakinyu la nengese.

¹⁴Ewandji wʼelimu wa Farayo wakakomola ndu asi Isariyele wakawadji tupita; wakawambula vati: Okoko wana wakinyu kunkutsha efula kʼatafadi wa lui ndu wʼelo, uku akanyakutshaka la ntundu?

¹⁵Tupita tʼasi Isariyele wakayi, wakayulelela Farayo vati: Ukundi ambuyutshela ekambi aye okone?

¹⁶Hawuyukimo nengese le ekambi aye. Keli vo ntotelaka vati: Nyubuli atafadi! Ulungi, vo ntokomolaka ndu shu ekambi aye! Keli munga keko le antu aye vame.

¹⁷Keli ndi akakaluya diui ati: Nyu nyeko lu mbidjase udjasedjase! Nyu nyeko lu mbidjase udjasedjase! Diako mbatanyu nyati: Tutshu, tutulambuli Latuyalaka elambu.

¹⁸Nyutshu kakiane, nyutukambi ulimu. Nduku lolengese layukimwama le nyu, keli dieli la nyu dia nkutsha efula kʼatafadi pupu.

¹⁹Tupita tʼasi Isariyele wakenyi vati: Wambuyala lu shoko, lamʼakawati vati: Tanyukitshakitshaki efula kʼatafadi anyu wa la lushi la lushi nduku yema.

²⁰Lamʼakawamo uma la le Farayo, vo wakatani Mose la Arona wakunga lu mbuka.

²¹Vo wakatela Mose la Arona vati: Latuyalaka anyendi, asambuli dikambu ne! ne dia nyu nyambutete atunyi lu ashu wa Farayo ndu wa ekambi andi; nyambakimiya tombo dia vo ntudiaka.

²²Mose akakalula le Latuyalaka, akati ati: Khumemi li, ukundi ambuyutshela wudja one kolo okone? Dikambu kuna diakayatumi?

²³Uma lamʼakamatshu le Farayo dia nteketa la ndi lu lukumbu laye, ndi ambutshela wudja one kolo, keli we kuntshungula wudja aye nduku yema.