Read tetala Etumbelu 9 Bible Online

Etumbelu 9 - tetala bible

Etumbelu 9

¹Ku Latuyalaka akatela Mose ati: Utshu le Farayo. Utuwuteli wati: Latuyalaka, Unyashungu wʼasi Heberu, kata ati: Ukimo wudja ami, watshu dia ntontemola.

²Ne dia naka we ayutuna mbakimo dia vo ntsho, ayakimela,

³ulungi, lunya la Latuyalaka layuyala ladiku dia dungalunga diaye dieli lʼusui.: falasa, punda, kamelo, ngombe la ekoko. Lonyoi la mamba layuyala le dio.

⁴Keli Latuyalaka ayutshikitanya dungalunga diʼasi Isariyele la dungalunga diʼasi Edjibitu. Nduku elungalunga otoi kayuvo uma lʼatei wa dungalunga diʼasi Isariyele.

⁵Latuyalaka akashikike etena; akati ati: Lui, Latuyalaka ayutsha dikambu so lu kete nye.

⁶Ku la wedi a pindju, Latuyalaka akatshi dikambu diako. Dungalunga tshe diʼasi Edjibitu diakavu, keli nduku nyama otoi kakavu lʼatei a dungalunga diʼasi Isariyele.

⁷Farayo akatumi dikendji, enda, ndi kuntana nduku nyama kakavwi lʼatei a dungalunga diʼasi Isariyele. Keli utema wa Farayo akakikitala. Ndi kumbetawo nkimo wudja one dia vo ntsho.

⁸Latuyalaka akatela Mose la Arona ati: Nyuludia anya anyu la utuku wʼuma lʼatsbuka. Mose afumbuli utuku ako utsha lʼulungu la ntundu ka Farayo.

⁹Vo wayudiangana lu lopepe, wayukumba kete tshe ya Edjibitu. Ku vo wayutunga atshutshu lu alimba wʼantu ndu wa nyama lu kete ya Edjibitu tshe. Atshutshu ako wayuyala puta lamʼayuwutundo.

¹⁰Ku vo wakose utuku wʼuma lʼatshuka, wakatemala la ntundu ka Farayo. Mose akufumbula utsha lʼulungu, ku vo wakayala atshutshu lu alimba wʼantu ndu wa nyama. Atshutshu ako wakayala puta lamʼakawatundo.[22]

¹¹Akanga wʼaloho kumbeya memala la ntundu ka Mose, ne dia atshutshu waki le akanga wʼaloho ndu le asi Edjibitu tshe.

¹²Keli Latuyalaka akakikitsha utema a Farayo, ku ndi kumbaukela, uku akatela Latuyalaka Mose.

¹³Ku Latuyalaka akatela Mose ati: Keto kʼolomo la pindju, kutemali la ntundu ka Farayo. Kuwuteli wati: Latuyalaka, Unyashungu wʼasi Heberu, kata ati: Ukimo wudja ami, watshu dia ntontemola.

¹⁴Etena kene kayumutuma asui ami tshe lʼutema aye, lʼekambi aye, ndu le wudja aye; dia we mbeya wati: Nduku ledimi la mi la kete tshe.

¹⁵Utunduyala dimi lakasimbula lunya lami dia nkudiaka, we la wudja aye la lonyoi, tshiki we akashisho uma la kete.

¹⁶Keli dimi lakakutshiki la lumu dia nkenya wulu ami, la dia lukumbu lami nyangana lu kete tshe.[23]

¹⁷Ku we ntetemalaka ndjambiya dia nsuya wudja ami, we hetawo mbakimo dia vo ntsho.

¹⁸Ulungi, lu etena uku kene lui, dimi layolosha ngimbi ka wulu ka mboko, wuhu wahatalokaka nduku lushi lʼEdjibitu edja ndu kakiane.

¹⁹Okone usamanya kakiane, utumi antu dia ntosa dungalunga la diango diaye tshe lʼusui. Naka antu kana nyama hawuyi esadi, wayutanema lʼusui lamʼayolo ngimbi ka mboko, vo wayuvo.

²⁰Ku uma lʼatei wʼekambi wa Farayo, wane wakukaka diui dia Latuyalaka woma, wakotshiya ekambi awo la dungalunga diawo lu mvudu.

²¹Keli waku waki kumbetawo diui dia Latuyalaka, wakatshiki ekambi awo la dungalunga diawo lʼusui.

²²Ku Latuyalaka akatela Mose ati: Edia lunya laye utsha lʼulungu dia ngimbi ka mboko ndwela antu, nyama la tumbatumba tshe dia lʼusui lu kete ya Edjibitu.

²³Ku Mose akedia danga diandi utsha lʼulungu, ku Latuyalaka akatumi akhungula la ngimbi ka mboko, ndu angadimu wa ndjadi wakakukanela la kete. Osoku mbakalosha Latuyalaka ngimbi ka mboko lu kete ya Edjibitu.

²⁴Angadimu wa ndjadi wakasohana kame la ngimbi ka mboko.[24] Okone ngimbi kakatekoya wulu wuhu wahatalokaka lu kete ya Edjibitu tshe umaka etatelu kakawayala wudja.

²⁵Ngimbi ka mboko akakomola diango tshe dia lʼusui, antu ndu nyama lu kete ya Edjibitu. To kakakomola tumbatumba tshe, ndu kakokola etamba tshe wa lʼusui.

²⁶Tshikima lu kete ya Ngoshena, lene akadjashi asi Isariyele, kakito kondo.

²⁷Ku Farayo akatumi dikendji dia nteta Mose la Arona. Ndi akawatela ati: Dimi lakatshi kolo etena kene. Latuyalaka keli kanga ololo, dimi la wudja ami mbeli akanga wa kolo.

²⁸Olombe Latuyalaka, ne dia akhungula a wulu ane la ngimbi ka mboko wambukuka. Dimi lambetawo nyu ntsho, nyu hanyutshikala ntu.

²⁹Ku Mose akûkaluya diui ati: Lamʼayumutuma uma lʼusumba one, dimi layedia anya ami utsha le Latuyalaka, ku akhungula wayushila, la ngimbi ka mboko kayuhimbo; dia we mbeya wati: Latuyalaka kukanga kete tshe.

³⁰Keli dimi mbeyaka nti: Uku le ye, we la ekambi aye, nyatuki Latuyalaka, Unyashungu, woma.

³¹Akungi la asami wakalana, ne dia asami wakombola washa, la akungi waki la alembo.

³²Keli epunga la waanya kunana, ne dia vo kumbula esadi.

³³Okone Mose akamo laka Farayo. Lamʼakandatumbi uma lʼusumba, ndi akedia anya andi utsha le Latuyalaka. Ku akhungula la mvula ndu mboko wakashili; mvula kondo ntu la kete.

³⁴Keli lamʼakenyi Farayo ati: Mvula, mboko la akhungula wambushila, ndi akatetemala ntsha kolo. Ndi akakikitsha utema andi, ndi la ekambi andi.

³⁵Utema wa Farayo akakikitala; ndi kunkimo asi Isariyele dia vo ntsho, uku akati Latuyalaka uma lʼunyo wa Mose.