Read tetala Jobo 19 Bible Online

Jobo 19 - tetala bible

Jobo 19

¹Jobo akahula diui ati:

²Edja ndu kaandi ayunyukimo mpenyahenya lumu lami, La mbatshatshami lʼaui anyu?

³Nyendi tena dikumi ne diambunyontenga. Undi, nyu kema la sonyi dia ntshimbiami yimba okone?

⁴Utunduyala dimi lakangi mete mete, Dimi lututshikala dime la unungu ako.

⁵Naka nyu nyayuyambiya lu dikambu diami, Nyayete shoko yami omenyi dia mbidjami lʼunungu,

⁶Nyeyi nyati: Unyashungu ndame kambunanya, Ndu kambunyinga la otei andi.

⁷Enda, dimi lambuda tukuku, keli nduku untu ambukela; Lambukawana, keli sambu kʼololo kema.

⁸Unyashungu akandjihela mbuka yami tshe, diaha dimi mbeta; Akankitshiya udjima lu mbuka yami.

⁹Ndi akampotola lutumbu lami, Akambahula dembo dia kusu lʼote.

¹⁰Ndi akantetshatetsha lu beke tshe, dimi mbumweli; Akahatula elungamelu kami uku utamba.

¹¹Ndi akamvudanganela la kele, Akambali uku utunyi andi omotshi.

¹²Elui wʼalimbi andi wakayi kame, Wakayatela mbuka dia ndjolo la mi, Wakadingi luudu lami la dipema kwi.

¹³Ndi akamanganyia analingu etali. Engenyi ami wakakadimo uma le mi.

¹⁴Wane wuto la mi wambonseka; Engenyi ami wa ngandji wambumbuhela.

¹⁵Wane wudjashi lu luudu lami, vo la ekambi ami wʼamantu, wumenda uku ongendangenda. Dimi lambuyala uku untu lahaweyi lu ashu awo.

¹⁶Dimi lambeta ukambi ami, ku ndi hakaluya diui: Dieli la mi mbosengasenga lʼunyo ami.

¹⁷Luwi lami lambuyala wutshu le watiemi, La sulu kami le ana wʼapami wakuto la mi utema otoi.

¹⁸Ana wa tshitshe watomonyolaka. Lamʼatumunelaka, vo watonsokaka.

¹⁹Engenyi ami wa ngandji tshe womenga waengekhu, La wane wakamukaka ngandji, wambontombokwela.

²⁰Weka ami wambumamana la diuwu diami ndu la emunyi ami: Dimi lambutshikala uku wemi one.

²¹Engenyi ami le, nyumbuki ketshi, nyumbuki ketshi, Ne dia Unyashungu kambumbahe lunya.

²²Okoko wana wansuyanyu, uku ansuya Unyashungu? Ukundi wahanyaheko ndemi?

²³Dimi latulanga aui ami nfundama; Vo wutufundama lu buku!

²⁴Dimi lutulanga vo ntshimama la utshimo ndu la luwulu la wulu Dia vo nfundama pundju lu dive.

²⁵Keli dimi mbeyaka nti: One layunyindja eko. Ndi ayuyemala lʼekumelu ladiku dia kete.

²⁶Lʼokongo wa elanyelu ka diuwu diami, Lamʼahamuyala la emunyi ntu, dimi layena Unyashungu.

²⁷Dimi dime layuwena. La ashu ami, aha wʼuntu ukina, Kuyanga mbambuheko utemʼami ekungelu.

²⁸Naka nyu nyayumbwana nyati: Ukundi ayutusuya? Naka nyu nyayuta nyati: Utundu wa dikambu wambutanema le ndi,

²⁹Nyuki yombo woma: Ne dia kele katelaka asui wa yombo! Dia nyu mbeya nyati: Elumbwelu keko.