Read tetala Jobo 24 Bible Online

Jobo 24 - tetala bible

Jobo 24

¹Okoko wana wahatushikikeka Kanga-Wulu-Tshe tena diandi? Okoko wana wahatenaka wane watulimbitelaka nshi yandi?

²Antu amotshi weko, watosekolaka elelu, Watohotolaka dungalunga la khudu, watudileshaka.

³Vo watutshanyaka punda kʼona etshiki, Watosaka ngombe ka wadi aki udu okole.

⁴Vo watusukulaka uhumbi uma lu mbuka, Akanga a weula tshe wa la kete watuwashamaka.

⁵Uku atutumbaka mangana lʼusui wa shenga, Mbatuwutumbaka la pindju dia ntuyanga diango dia nde. Vo watutanelaka anʼawo mbu ya nde paka lʼusui wa shenga,

⁶Vo watuhimbulaka nengese yatutshikalaka lu dikambo, Watokoholaka elua iu dikambo dia vinyo diʼakanga a kolo.

⁷Vo watetamaka utshu tshe utakataka, aha la dihondo, Aha lʼulangitshi wa ndjakumba tshitshi.

⁸Vo watolwelaka mvula lu ekungu, Watuyadingaka ave uku eshamelu.

⁹Antu amotshi weko, watohotolaka ana wa ditshiki awele, Watosaka ekole uma le akanga a weula.

¹⁰Okone asi weula ako watengolaka etakataka etu, aha la ahondo. Lamʼewo lu ntembe dikanda, vo watukaka ndjala.

¹¹Vo watuhinaka iso lʼatei a kumbu yʼantu wa kolo; Watuvokaka pusa lamʼewo lu mpina ashi wʼelua.

¹²Akhumu wʼantu wayanga mvo watukemaka lʼusumba; Etema a waku wakahumo watulekaka. Keli Unyashungu hadji tukanyi lu akambu wutshatsha aso!

¹³Antu amotshi weko, watutunaka usasi. Vo haweyi mbuka kʼusasi ako, Hawutokendakendaka loko.

¹⁴Udjakanyi atetoka la kesekese, Atudiakaka usi wula la uhumbi; Atuvaka lʼutshu.

¹⁵Ashu wa kanga munanyi watukungaka tushu ta shimba, Ata ati: Nduku untu layomena; Ndi atukumbaka elundji kandi.

¹⁶Lʼutshu, antu ako watutundulaka mvudu, La yanyi, watuyadihaka: Vo haweyi usasi.

¹⁷Udjima a tshududu eli pindju le wo. Vo well engenyi a woma wa mamba wa udjima a tshududu.

¹⁸Antu wa kolo watembamaka esadi lʼashi, Etenyi kawo kambudjama mananu la kete. Vo hawutelelaka pundju utsha lu dikambo dia vinyo!

¹⁹Uku atukutulaka owo la luhaladi ashi wa lungi, Osoku mbatomenaka Dihuli diʼEdu waku watutshaka kolo!

²⁰Etema wakawauti wayuwauhela; Kusu yayongenangena dia mbale; Hawuwauho ntu! Antu wa kolo wayowediawediama uku utamba.

²¹Vo watusuyaka amantu wa dikumba, waha la ana; Hawututshelaka wadi waki edu ololo!

²²Kema, Unyashungu uma lu wulu andi mbatundutalulaka nshi yʼantu wa kolo. Waku waki kundjala la elungamelu ka lumu, vo aku wambemala.

²³Unyashungu atuwashaka eku la ekamelu; Ashu andi watendaka mbuka yawo.

²⁴Vo watuyaediaka; etenyi ka yema tshitshe ku vo kema ntu. Vo watokokaka, watuvokaka uku antu tshe, Watuhimbwamaka uku tosodi ta washa.

²⁵Naka aha osoku, ayumamia na? Ayete aui ami anyanya?