Read tetala Jobo 27 Bible Online

Jobo 27 - tetala bible

Jobo 27

¹Jobo akahula diui ntu, la aui wʼeshika ati:

²Uku eli Unyashungu, lakanyimi sambu kʼololo, la lumu, Kanga-Wulu-Tshe, lakaludia utema ami too la lokonyo;

³Ndu uku ayuyalaka lumu lami lu dimba diami; La efufelu ka Unyashungu lu ehembe ami,

⁴Elomo ami hawutaki nduku diui dia kashi, Lulimi lami halutaki nduku diui dia lukesu.

⁵Kanyi ya mbetawo aui anyu yeko etali uma le mi. Edja ndu lamʼayumukitshiya, dimi halunya akambu ami wʼusimbwi uma le mi.

⁶Dimi layukimelaka ololo ami, halukimo. Utema ami hawumamia nduku etena lu nshi yekimi la lumu.

⁷Utunyi ami ayali uku untu a kolo, La one lunela dia ndo la mi, uku untu lahasimbwi.

⁸Kuyanga omonyodi a Unyashungu eko la ukundji, Na elungamelu kayuyala le ndi Lamʼayunya Unyashungu lumu landi?

⁹Lamʼayuya asui le ndi, Unyashungu ayulunga elelu andi uka?

¹⁰Undi, ndi ayongenangenaka le Kanga-Wulu-Tshe? Ayolombaka Unyashungu tena tshe?

¹¹Dimi layunyetsha dia lunya la Unyashungu, Dimi halunyushe kene keli le Kanga-Wulu-Tshe.

¹²Keli nyu tshe nyakalimbitela, nyaketawo. Okoko wana wambunyuyakimo lu tukanyi tʼanyanya?

¹³Onʼeli etenyi ka sangu kambulamela Unyashungu untu a kolo, Ukito wayulungula asuyanyi uma le Kanga-Wulu-Tshe.

¹⁴Naka anʼandi wambuyala efula, keti dia vo ndjakema la yombo, La ekana andi wayuhumbaka mbu ya nde.

¹⁵Waku wambuhanda, wayuvo lʼelandu, Wadi wakiwo hawuwalela.

¹⁶Kuyanga ndi ayomotsha fesa uku ditshu, La motsha ahondo ului uku diwumba,

¹⁷Ndi mbeyaka mbakitsha, keli untu lʼololo kayalota, Ku one laha la unungu, ayukahanya fesa.

¹⁸Ndi atuhikaka luudu leli uku otei wa dihuha, Uku tshumbutumbu yatuhikaka ulami.

¹⁹Ndi ambetama ongonyi, keli ndi huyala osoku ntu. Ndi ambudihula ashu, ku dio tshe diambushisho.

²⁰Weoma wa mamba wambuwunda shashimuya uku elula, Punganendji kambuwemba lʼatei utshu.

²¹Lopepe lʼuma lʼehutwelu lambuwemba, ndi ambutsho. Lo lambuwunya la wulu uma lu dihuli diandi.

²²Unyashungu atuwukaka pitu aha la ketshi. Ku untu ako atulangaka ndawo dia ndjihanda.

²³Unyashungu atuwonyolaka la ntundu kantu, Atuhinwelaka elomo uma lʼulungu.