Read tetala Jobo 28 Bible Online

Jobo 28 - tetala bible

Jobo 28

¹Mete, dihuli dieko lene atuwosaka diango dia ntsha fesa, Ndu dia paunyi yatuwutshulaka.

²Vo watosaka luwulu uma lu kete, Watolelolaka udjulu uma lu ave.

³Untu atosenyaka udjima. Ndi atuyangaka ave weli lu didjidji dia nyoi, kana lu udjima a tshududu. Pulu ndu lu ahuli wuleki ehongo.

⁴Ndi atutshimaka afuku lu ahuli wahatetetaka antu. Ambetshetshi watuwuhelaka; Ndi atolendalendaka, atusukasukaka.

⁵Kete yako yatutumbaka mbu ya nde. Yo yatukadimoka lʼatei uku nye yambulungula dja.

⁶Mboko yʼedima yʼushinga a wulu yatuyalaka lʼatei ave ayo, Ndu efushi wa paunyi watutanemaka loko.

⁷Nduku fudu katuhatulaka emunyi keya mbuka kʼutsha leko, Ndu ashu wa lodi watakienyi.

⁸Nyama ya waki yatakamela leko. Tambwe ka ngala kateti leko nduku lushi.

⁹Untu ataheka lunya landi ladiku dia dive dia wulu. Ndi atukadimulaka ekungu etshulitshuli umaka tshina diawo.

¹⁰Ndi atataka mbuka lʼatei wʼave. Su diandi diatendaka engo tshe keli ushinga a wulu.

¹¹Ndi atushimbaka ashi diaha vo nkela, Atutundjaka engo tshe katushamaka uya lʼusasi.

¹²Keli yimba, lendi atuyutanemaka? Lenʼeli edjaselu ka ewu na?

¹³Untu heyi ushinga ayo, Yo hayutanemaka lu kete ya wasena.

¹⁴Ohongo mvutaka ati: Yo kema le mi; Ndu ashi a waki vati: Yo kema kame la mi.

¹⁵Yo hayeyi nkundjama la paunyi, Kuyanga nsumbama la wutshu wa fesa ya ledika.

¹⁶Yo hayeyi mbedikama la paunyi yʼuma lʼOfira ushinga, Kuyanga la mboko yʼushinga a wulu ya pesopeso, kana yʼedima.

¹⁷Paunyi la talatala hayeyi mbedima la yo. Yo hayeyi mengwanyema la puki ka paunyi ka lutshula.

¹⁸Pusu ya keli, kana ave wa ngaingai, ndjalaka paka anyanya lasuki la yo. Yimba ndeka mboko ya tilili ushinga a wulu.

¹⁹Mbulu ya ngaingai yʼuma lʼEtiyopiya hayedimi la yo, Paunyi ka pudipudi heyi mbedima la yo.

²⁰Keli uma lendi atuyakaka yimba? Lendʼeli edjaselu ka ewu na?

²¹Yo yambushama lu ashu wa wasena tshe, Yambudihama le fudu ya lʼulungu.

²²Ohongo wa Dihuli diʼEdu la nyoi wambuta vati: Shu takuki lukumu layo lu atui asu.

²³Unyashungu kateyaka mbuka kʼutsha leko, Katulimbitelaka dihuli diayo.

²⁴Ndi katendaka pulu ndu lu kuma ya kete, Katenaka tshe keli lʼesi a ulungu.

²⁵Lamʼakandedika wutshu wa lopepe, Lamʼakandashikike yediko yʼashi,

²⁶Lamʼakandadjela mvula elembe, Ndu lamʼakandatela dingadimu la dikhungula mbuka,

²⁷Ndi akenyi yimba, akateketa dikambu diayo; Akayishikike atshina ayo, akayedika.

²⁸Ku ndi akatela untu ati: Ulungi, woma wa Khumesu mbeli yimba;[9] La anganelu kʼuma lu kolo keli ewu.