Read tetala Jobo 3 Bible Online

Jobo 3 - tetala bible

Jobo 3

¹Lʼokongo diku, Jobo akafula unyo, akadji lushi lʼeutwelu kandi mananu.[2]

²Ndi akati ati:

³Lushi lakamuto lalanyemi, Ndu utshu wakawati vati: Wambutsho diemi diʼona pami!

⁴Lushi lako, layali udjima utu! Unyashungu a lʼulungu taluyangaki, Kuyanga usasi lohetela!

⁵Udjima la dedi dia nyoi walundi, Wangi walukumbi! La kene tshe kateteka yanyi utshu kalukia woma!

⁶Utshu uku, udjima a tshududu wawundi! Vo tawongenangenaki lʼatei a nshi yʼeleku, Tawalemaki lʼatei a ngondo!

⁷Utshu uku ayali wʼekumba, Dielu diʼongenongeno tadiukamaki lʼatei awo!

⁸Wadjami mananu uma le waku watudjaka yanyi mananu, Uma le waku wateyaka nsutshasutsha shimiamba!

⁹Toto ta hyutshihutshi tʼutshu ako tayali udjima! Vo wakungi usasi, keli vo hawuyala, Tawenaki sasi dia pindju!

¹⁰Ne dia kundjiha suku dia tapa dianyomi, Ndu vo kumbishe shoko uma lu ashu ami.

¹¹Okoko wana wakimi kumvo lʼutema a nyomi? Dikambu kuna diakimi kunkitshiya kamʼakandambuti?

¹²Okoko wana waketawo pelohelo ndelami? Ndu waketawo awele dimi mbaloma?

¹³Tshiki dimi lutetama, lutuyala ki, Tshiki dimi lutulala djo, lutumuya

¹⁴Kame la khumi ya dikanga, la antu a waki wa la kete, Wakayatshela dimeta diʼeuhwelu;

¹⁵Kuyanga kame la ewandji waki la paunyi, Wakaludia mvudu yawo la fesa.

¹⁶Ukundi akimi kundjala uhasa wushami, Uku ana wʼashashi waki komena usasi?

¹⁷Leko, antu wa kolo hawutuhasahasaka. Leko, katumuyaka wane wakakomo ndu waha la wulu.

¹⁸Leko, asi lukanu watudjaseka kame la ki, Hawutukaka diui diʼusuyanyi,

¹⁹La tshitshe ndu la wuki weko leko. Fumbi atutshungoka uma le khumendi.

²⁰Okoko wana wakimwama usasi le one lasuwa, La lumu le wane weli la lokonyo lʼetema,

²¹Wane watulungamelaka nyoi, ku to hayi le wo,[3] Ndu watukikumbulaka uleki ekundji wushami,

²²Wane watuyalaka la ongenongeno efula, Watundamaka lʼongenongeno a wuki utuwoto lu diumbu?

²³Okoko wana wakimwama usasi le one laheyi lene atandatshu, Le one lakadingi Unyashungu kwi?

²⁴Asikhumelu ami, weli uku ma le mi; Ekuku ami wambutshulotshulo uku ashi.

²⁵Kene katumukaka woma kambuya le mi, La kene katumulawoka kambumunda.

²⁶Dimi kema la ki, lutui tshitshi, Kuyanga mumuya, paka ohenyohenyo utu!