Read tetala Jobo 30 Bible Online

Jobo 30 - tetala bible

Jobo 30

¹Keli kakiane, dimi lambuyala uku engo ka tola le wane wuledimi, Le ana a waku wakamasekaka nkitsha kame la fo yakalamaka dungalunga diami.

²Kakona kayumukundja uma lu wulu wʼanya awo Lamʼahawukuma lu nshi yawo yʼesumbi?

³Vo wambonda la ndjala la ehumba, Watolekaka kete lu esui wa shenga.

⁴Vo watuhatulaka akatshi wʼanyanya uma lʼakumbu, La ediu wʼadiyu a wulu watuyalaka ma diawo.

⁵Antu wakawatshanvaka uma lʼatei wʼantu, Wakatawatijelaka ndjoka uku evi lʼokongo awo.

⁶Okone vo wakatadjaseka lʼekidi wa dingeno, Lu weuku wa lu kete ndu lu wʼave.

⁷Vo wakatadaka tukuku lʼatei wʼakumbu, Wakatasanganaka lʼatshina wʼekodi wʼadungu.

⁸Ana wa dinginya, ndu amonywami mbewo, Wakatasukuyaka uma lu wudja.

⁹Dimi lambuyala engo ka kimbu yawo, Lambuyala engo ka losoko le wo.

¹⁰Vo watomengaka waengekhu, watemalaka tshalula, Watumvutelaka soi lʼelundji.

¹¹Unyashungu akahimbula olemo wʼuta ami, akansuya, Vo hawuyakimela lasuki la mi ntu.

¹²Antu watunelaka lu lunya lami la lu pami, watusukulaka akaka ami, Watondoshaka la ditshelu diawo diʼelanyelu.

¹³Vo watulanyaka mbuka kami, watusanguyaka nshishami, Hawutuyakimelaka.

¹⁴Uku atuwunyukula ekeli ushu a wuki, mbayawayi uya le mi, Uma lʼatei wʼelanyelu mbatuwukhungusoka uya le mi.

¹⁵Woma wa mamba wambunyinga; Lutumbu lami lambembama uku lu lopepe, Diese diami diambeta uku dingi.

¹⁶Lumu lami lambutshulo lʼutema ami, Nshi yʼasui yakamundi.

¹⁷Lʼutshu weka ami watohondaka, Wendjwelu watukendjulaka, hawutumuyaka nduku yema.

¹⁸Uma lu wulu wa kandji, ahondo ami wambukadimo wuhu ukina. Kandji kako kambumamema lu dimba diami maa uku sumishi.

¹⁹Unyashungu akantambiya lu loteke; Dimi lambuyala uku ditshu la utuku.

²⁰Dimi latulelaka le ye, ku we hankalula nduku diui; Lambemala, ku we mendakami menda tshu.

²¹We ambuyala kanga ukunda le mi. Atunsuyaka la lunya laye la wulu.

²²We atumbediaka, atunfumbulaka lu lopepe; Atompenyahenyaka la lundju la ngimbi.

²³Dimi mbeyaka nti: We eko lu ntanombola utsha lu nyoi, Utsha lu dihuli diatusanganaka wasena tshe

²⁴Keli lamayanga untu mvo, ku ndi hasimbula anya? Lamʼendi la pa, ku ndi hayangi ekimanyelu?

²⁵Undi, dimi kundelaka lu dikambu dia one laki la pa? Utema ami kunyangaka lu dikambu diʼuhumbi?

²⁶Lamʼakamalungamelaka diese, ku kolo kakayi! Lamʼakamakungelaka yanyi, ku udjima wakayi!

²⁷Utemʼami atuhasahasaka, hawumuya. Nshi yʼohenyohenyo yakakumi le mi.

²⁸Dimi lambuhinda tshududu, keli aha uma lu yanyi! Latunelaka lʼatei wa lusanganya; latulekaka!

²⁹Dimi lambuyala onangu wa mbulu, Okendji a wa kumbaka.

³⁰Diuwu diami diambuhinda, diatokokaka; Weka ami wambulungula la dja.

³¹Losese lami lambuyala paka engo kʼutanda, Ndu wembiya ami, paka lundju la waku walela.