Read tetala Jobo 32 Bible Online

Jobo 32 - tetala bible

Jobo 32

¹Okone apami ane asatu wakakimo nkaluya Jobo aui, ne dia ndi ndame akayaeneka ololo lu ashu andi.

²Ku Elihu, onʼa Barakele, usi Buza, uma lu khumbu ka Rama, akuki kele. Ndi akadanganela Jobo la kele, ne dia Jobo akayayindja, kunyindja Unyashungu.

³Elihu akadanganela ndu engenyi andi esatu la kele, ne dia vo kumbishula diui dia nkuluya Jobo, paka mbâmia tshu.

⁴Elihu akakungi dia nteketa la Jobo, ne dia vo wakuleki dikumanyi.

⁵Lamʼakenyi Elihu ati: Apami ane asatu kema la diui dia nkaluya, ndi akadanganela la kele.

⁶Ku Elihu, onʼa Barakele, usi Buza, akahula diui ati: Dimi leki dikenda, nyu nyaya dikumanyi. Diako mbakamalembohalaka, Mbakimi kutundja tukanyi tami.

⁷Dimi lakataka lʼutema ami nti: Loledu komenaka hulela divu; Ndu ati: Yakhunyi a kienda hataka na dia wudjulu.

⁸Keli mete, lumu leko le untu, Efufelu ka Kanga-Wulu-Tshe katushaka untu yimba;

⁹Aha ne dia efula ka deku diaya untu, mbatushaka untu yimba, Ndu aha ne dia usumbi wʼuntu, mbatushaka untu yimba ya nsambula,

¹⁰Diako mbutshimi nti: Nyumbukeli, Ndu dimi mvuti kanyi yami!

¹¹Nyendi, dimi lakakungi aui anyu. Dimi lakalungi diamanyelu dianyu Lamʼakanyayangaka aui wa mvuta.

¹²Dimi lakaki lutui lu aui anyu. Keli nduku untu lʼatei anyu akatewadia Jobo, Kuyanga mbolembia lu aui.

¹³Keli tanyutaki nyati: Shu tambushula yimba; Unyashungu ndame kayutewadia, aha untu!

¹⁴Ndi atasimbo la mi dime lʼaui. Keli dimi halukaluya aui uku akanyukaluyaka.

¹⁵Vo wambomeno aui, nduku diui dia nkaluya diui, Aui awo wambuhimbo pe!

¹⁶Undi, dimi nkungaki nkunga tshu, lamʼahawati nduku diui, Lamʼambuwolembohala ki ketu, aha mvuta nduku diui?

¹⁷Ndu dimi nangaka mvuta diui, Ndu dimi nangaka nyenya kanyi yami.

¹⁸Dimi leko la aui efula wa mvuta, Utema ami ambuntshutshiya.

¹⁹Tukanyi teli lʼutema ami taya uku wanu wudihami khu. Utema ami wambuyala uku atapa wa dikuhu diʼeyuyu diutsha nkamo la wanu.

²⁰Dimi layoteketa, mbayumuka yema. Dimi layufula unyo ami, layuta diui.

²¹Dimi haluyala la shonodi le untu, Kuyanga mandula untu wandula andula,

²²Dimi haleyi nemia untu olemialemia; Utungi ami atukuminya esadi.