Read tetala Jobo 34 Bible Online

Jobo 34 - tetala bible

Jobo 34

¹Ku Elihu akati ntu ati:

²Nyu akanga a yimba, nyulungi aui ami! Nyu akanga wa ewu, nyumbisha lutui!

³Ne dia tui diatutshikitanyaka aui, Uku atunganelaka lulimi mbu ya nde.

⁴Tosonole kene kʼusimbwi, Teyi kene keli ololo lʼatei asu,

⁵Ne dia Jobo akati ati: Dimi kayinga, Keli Unyashungu ambunyima sambu kʼololo,

⁶Kuyanga mete katami, lambenama uku kanga kashi, Puta kami hokono kuyanga dimi kema la unungu.

⁷Akona eli uku Jobo, Latonokaka losoko uku ashi,

⁸Latekesanelaka lʼatshi wa kolo, Latokendakendaka lʼantu wa kolo?

⁹Ne dia ndi akati ati: Kema uhumba wa untu Nkitsha elungamelu kandi le Unyashungu.

¹⁰Okone nyu akanga a yimba, nyumbukeli! Dia ntsha kolo, eko etali uma le Unyashungu, Dia munganela mbuka eko etali uma le Kanga-Wulu-Tshe.

¹¹Ndi ayufuta untu uku ulimu andi.[10] Ayutshela untu tshe uku ditshelu diandi.

¹²Mete, Unyashungu hatutshaka kolo, Kanga-Wulu-Tshe hatulanyaka sambu kʼololo.

¹³Akona akawusha okende wa nama kete? Akona akawembia wutshu wʼandja wʼutundu?

¹⁴Utunduyakanela ndame, Utunduyalamela lumu landi la efufelu kandi,

¹⁵Tshiki diango tshe dieli la lumu diutuvo, La untu utukalula lu ditshu.

¹⁶Naka we la ewu, ulungi dikambu ne, Uhuke tui lu aui ami!

¹⁷Utunyi wa sambu kʼololo ayulela uka? Undi, we ayamia untu ololo, kanga wulu,

¹⁸Latutaka dia khumʼekanga ati: Untu anyanya kendi, La dia antu a waki ati: Antu wa kolo mbewo?

¹⁹Lahatuyalaka la shonodi le ewandji, Kuyanga nemia akanga wʼengonyi wuleki asi wula, Ne dia vo tshe weli ulimu wʼanya wa Unyashungu?

²⁰Vo watuvokaka shashimuya, Watudidimaka lʼasa ndeki, watulanyemaka, Akanga a wulu watunyemaka, aha uma lu wulu wʼantu.

²¹Ashu wa Unyashungu watenaka kendo yʼuntu; Ndi atendaka wanya andi tshe.

²²Nduku udjima kuyanga didjidji dia nyoi dieko, Diukuki atshi wa kolo mbishama,

²³Ne dia Unyashungu hasonola etena ka shikaa Ka untu ntemala la ntundu kandi lʼelumbwelu,

²⁴Ndi atulanyaka antu a waki, aha nyanga emenyi, Atudjaka akina lu ahuli awo,

²⁵Ne dia ndi mbeyaka elimu awo, Mbatunduwambaka lʼutshu, mbatuwohotshahotshamaka,

²⁶Ndi atakomolaka uku antu wa kolo Lu ashu wʼantu,

²⁷Ne dia vo wakakadimo uma le ndi, Wakatuni mbuka yandi tshe,

²⁸Vo wakaledia asi wula, edja ndu delu diawo diakakumle ndi; Ndi akuki alelu wʼamenyi fono,

²⁹Naka Unyashungu ambuyala ki, akona ukuki mbamia? Naka ndi ambushe elundji kandi, akona ukuki mbena; Kana le wudja kana le untu?

³⁰Diaha untu a kolo mbulela ntu, Ne dia ndi atukuya djunga le antu.

³¹Undi, untu omotshi akatela Unyashungu ati: Dimi lakasuyama, handjutsha kolo ntu?

³²Umbetsha kene kahameyi, Naka dimi lakatshi kolo, dimi handjutsha ntu,

³³Undi, ndi ayukufuta uku alangaye, ne dia we ntunaka? Dieli la ye dia nsonola weme, aha dimi! Okone utaki kene keyaye.

³⁴Akanga a yimba watukaka aui ami, Akanga wʼewu watumvutelaka vati:

³⁵Jobo atoteketaka uku untu laha la yimba, Atutaka aui wutata.

³⁶Aki ololo Jobo numbuyama pulu ndu lʼekumelu ka dikambu ne, Ne dia ndi atukaluyaka aui uku antu wa kolo.

³⁷Ndi atahanyaka uhedia ladiku dia kolo kandi, Atosokaka Unyashungu lʼatei asu, Atufudiaka aui andi dia nsemanela la ndi.