Read tetala Jobo 37 Bible Online

Jobo 37 - tetala bible

Jobo 37

¹Lu dikambu ne, utema ami atusakaka lukumba, Atumoka uma lu dihuli diawo.

²Uki ukuma wa diui diandi; Dikita diatumba uma lʼunyo andi!

³Ndi atukukanyaka lʼutundu wʼulungu, La ndjadi yandi edja ndu la kuma ya kete.

⁴Lʼokongo a ndjadi, diui diandi diatudikitaka. Ndi atukhungulaka la diui diandi dia mamba; Ndi hatushimbaka ndjadi kamʼukema diui diandi.

⁵Unyashungu atukhungulaka la diui diandi wuhu wa mamba, Atutshaka akambu a waki wahatalimbitela.

⁶Ndi atutelaka lungi lʼekama la tshitshi ati: Olo la kete. Wuhu ako mbatundutelaka tshokotoko ndu mvula la ngimbi pupu.

⁷Ndi atunyaka antu uma lʼulimu, Dia antu tshe mbeya ulimu andi.

⁸Nyama ya lʼukunda yatutshokaka lu ahuli wʼeshamelu, Yatetamaka lu afuku ayo.

⁹Uma la diku dia kushi katuyakaka luhunga, La lopepe la tshitshi uma la ngelʼa kushi.

¹⁰Uma lu efufelu ka Unyashungu mbatukamaka ashi, Ku ashi efula watukamaka.

¹¹Ndi atuludiaka wangi too lʼashi, Atunanulaka wangi andi wa ndjadi.

¹²Wangi ako watukadimokadimoka la diui diandi, Dia vo ntsha akambu tshe wawandjangelandi Ladiku dia kete yʼudjashi antu.

¹³Kana wangi ako wambuya uku ohehela, kana dia nkimanyia kete yandi, Kana lu dikambu dia ngandji, ndi katatumaka.

¹⁴Jobo li, uhukami dikambu ne! Ukungi, ukani yimba lu akambu wa mamba wa Unyashungu!

¹⁵We mbeyaka uku atolombolaka Unyashungu wangi ako, La uku atundungadimuyaka ndjadi loko?

¹⁶We mbeyaka uku atundedikaka wangi, Akambu wa mamba wa one leli la yimba yuleki?

¹⁷We mbeyaka okoko wana watulumbalumbaka ahondo aye Lamʼatuyalaka kete yoyo la lopepe lʼuma la diku dia kushi?

¹⁸We mbeyaka mombola ulungu, Weli wulu uku lulindu la lolelola, uku ndi?

¹⁹Utetsha aui wahumbasu mbutela. Shu hateyi nongosola tukanyi tasu, ne dia eko paka udjima utu.

²⁰Undi, dimi layuwumbula nti: Ntekete la ye? Untu akona ayulanga mvuta ati: Nshisha lumu elo?

²¹Antu haweyi menda unya tee lamʼahetawo ngaingai lʼulungu, Naka lopepe lambopepa ndu lambukumbula wangi,

²²Esasi wa ngaingai watungadimoka lu leke la ngelʼa kushi. Ndi lutumbu la Unyashungu mamba li!

²³Kanga-Wulu-Tshe, nduku untu laweya ote. Ndi eli wuki lu wulu andi, Lu sambu kʼololo, ndu lu ololo waheyama mbedika. Ndi hasuya untu usuyasuya!

²⁴Okone antu mpumbaka mbuka woma, Ne dia ndi hatudjaka ashu le akanga wʼutaku.