Read tetala Jobo 39 Bible Online

Jobo 39 - tetala bible

Jobo 39

¹We mbeyaka etena katutaka peli anʼato? We mbeyaka etena katutaka mangana?

²We mbeyaka efula ka ngondo katuyutshokaka waemi, Kana etena katuyutaka?

³Yo yatutataka lono, yatokemaka ona, Yatutaka anʼayo.

⁴Anʼayo watukikitalaka esadi, watulaka lu dihuli dia hwe. Vo watutshokaka etali, hawutukalulaka ntu.

⁵Akona akakimo mangana wolola, Akakikelekula ekodi tshe?

⁶Dimi lakete usui wa shenga ngelu kato, La kete ya leho edjaselu kato.

⁷To katonyolaka lufungusu lʼuma lʼusumba, Hatukaka luhangu la umbuledi.

⁸To katetetaka lʼekungu, katayangi mbu ya nde. To katuyangaka tumbatumba tshe diʼeyuyu.

⁹Undi, ndjati mbetawoka nkukambelaka ulimu? To mbeyaka ntshikala lʼukutu aye lʼutshu uka?

¹⁰We mbeyaka nkikeleka okodi, dia to mbata elumbi? To mbeyaka ntsho lʼokongo aye dia ntudiudiaka elumbi wa lʼukidi?

¹¹We ayukiekamaka ne dia wulu andi weli efula, Ayukisha okende wʼelimu aye?

¹²We ayusawula la to, dia to nkelaka diango dia dinela, Kana dia to nkomotshiyaka epunga aye lu dihuli diʼesuswelu?

¹³Dikonde diatuhuhanyaka ahafu adio lʼutaku; Ahafu ako wa ngandji uka?

¹⁴Dikonde atukaleka ekeli adio lu kete, Atetshikaka dia vo mpetaheta lu ditshu.

¹⁵Dio diatuweuhelaka, ati: Dikaka diʼuntu mbeyaka mbeula, Kana nyama kemotshi ka lʼukunda mbeyaka mbekamela.

¹⁶Dio diatuyalaka la utema wulu le anʼadio, uku vo kema anʼadio. Kuyanga ulimu adio weli utshatsha, dio hadiutukaka woma,

¹⁷Ne dia Unyashungu akadidimi yimba, Kudisha ewu.

¹⁸Lamʼatudiunelaka dia nfumbo, Dio diatonyolaka falasa la umbahemi ato.

¹⁹We katushaka falasa wulu? We katukikitshaka kingu kato?

²⁰We katukilimbulimbuyaka uku ondjo? Embelo kʼuma lʼehembe ato keko woma wa mamba.

²¹To katufusulaka kete lʼukidi, katongenangenaka lu wulu ato. To katuknungusoka dia ntuhumana la dihumo dia ta.

²²To katonyolaka woma, kema la ukandukandu. To hatutukaka yombo okongo.

²³Ladiku diʼato, katetaka luhelu la dikhuwa, Dikonga diangadimo la wuna.

²⁴To katomenaka ditshu lʼududu ato, Katuyakimelaka lamʼukato lundju la dimama.

²⁵Tena tshe lamʼatuwudaka dimama, to katutaka ati: Huki! To atukaka sulu ka ta lamʼedio etali, Luhangu lʼelombodi wa ta la waelu wa ta.

²⁶Undi, uma lʼewu kaye katufumboka lodi, Katulusimbulaka ahafu utsha lu leke la diku dia kushi?

²⁷Uma lu diui diaye mbatumbelaka pungu utsha ladiku, Mbatundutshaka kefu kato lu ahuli wa ladiku uka?

²⁸Lʼatei wʼave katuwudjaseka, katundutshaka kefu kato, Ladiku diʼave, lʼote wa dikuna.

²⁹Uma leko katundushishimaka engo ka to munda; Ashu ato watukienaka etali.

³⁰Ana ato watonokaka dikila. Lenʼeli edu wudiakimi, keti pungu keko laawo.