Read tetala Jobo 40 Bible Online

Jobo 40 - tetala bible

Jobo 40

¹Latuyalaka akambula Jobo ntu ati:

²Kanga tamu ayutetemala mama la Kanga-Wulu-Tshe? One lama la Unyashungu, akaluya diui.

³Ku Jobo akakaluya Latuyalaka diui ati:

⁴Enda, engo kʼanyanya kemi, aui akona wakûkaluyami? Dimi lambufe lunya lami lʼunyo.

⁵Dimi lakateketa etena otoi, keli handjuta ntu; Lakateketa tena pendi, keli handjahe nduku diui.

⁶Ku Latuyalaka akakaluya Jobo diui uma lu punganendji ati:

⁷Ukikitsha uya uku pami! Dimi layanga nkumbula embula, keli we unkaluya aui.

⁸We ayulanya sambu kami kʼololo, Ayumamia dia we nyindjama?

⁹We la lunya uku lunya la Unyashungu, La diui uku dikhungula uku diandi?

¹⁰Kakiane uyalenge la uluwanyi la wuki, Olote nemo la lutumbu.

¹¹Utshululi ududu wa kele kaye, Endaki untu tshe leli la utaku, ukitshakitsha.

¹²Endaki untu tshe leli la utaku, uhuluya; Ohotshahotsha antu wa kolo kaku.

¹³Uwashe, vo tshe kame lu ditshu, Ukumbi dundji diawo la udjima.

¹⁴Ku ndu dimi layukandula nti: Lunya laye la pami nkukaka nkushimbela.

¹⁵Enda nguwu kakamatungi uku we, To katolekaka adiyu uku ngombe.

¹⁶Enda, wulu ato weko lu lukendi lato, La khudu kato lu emunyi wa lu dikundju diato.

¹⁷To katusinetadiaka wela ato uku utamba wʼusasi; Eshisha wa lu pelohelo diato watuhekitanaka.

¹⁸Weka ato weli uku epundu wʼohotela; Weka ato wa pandju weli uku etandi wa mbulu.

¹⁹To keli engo ka ntundj lʼatei a diango diakamatungi, dimi Unyashungu, One lakakitungi, kakakisha wulu.

²⁰Ekungu watukingonyiyaka mbu ya nde, Lene atokenyaka nyama tshe ya lʼukunda.

²¹To katushamaka lu atshina a waka, Lʼatei wʼasopo la kungu.

²²Akatshi a waka watuwushaka dedi, La eduwula watudingaka.

²³Kuyanga okedi wambuyala elula, to huki woma. Kuyanga ashi wa Jorodana nkokomola sukhu lʼunyo, to katutshikalaka ki.

²⁴Undi, untu mbeyaka nkinda la koho, Kana nkitundula ohembe la wuna?