Read tetala Jobo 5 Bible Online

Jobo 5 - tetala bible

Jobo 5

¹Uhangohango kakiane, akona ayukukaluya diui? Le ukilami ami wateketaye?

²Ohenyohenyo latulanyaka kanga enginya; Kandjema katudiakaka one laha la yimba.

³Dimi lakenyi kanga enginya ambongona. Ku shashimuya dimi lakadji edjaselu kandi mananu.

⁴Anʼandi weko etali uma lu dihuli diʼeshamelu. Vo wambohotshahotsha lʼeotwelo, Nduku untu leko dia mbahandja.

⁵Akanga a ndjala wambole dinela diandi, Wambudiosa pulu ndu lʼatei wʼatende. Akanga a pusa wambomena ekundji andi.

⁶Shoko hayututumbaka uma lu ditshu, Ndu pa hatutomenaka uma lu kete.

⁷Keli untu atutoka ne ta nsuwa, Uku shasi ya dja ne dia nfumbo.

⁸Keli le mi, dimi layuyanga Unyashungu, Ndu le Unyashungu kayumukitsha akambu ami.

⁹Ndi katutshaka akambu a waki waheyama mbedika, Ndu akambu wa mamba waheyama mbala.

¹⁰Ndi katoloshiyaka kete mvula Ndu katutumaka ashi lʼesui.

¹¹Ndi katumbiyaka akanga a ndjakitshakitsha, Ndu katutshungulaka amenyi fono.

¹²Ndi katufutanyaka sangweyu dia akanga wʼewu; Ndu anya awo haweyi dishidiya.

¹³Ndi katundaka akanga a tumba lu ewu kawo vame,[4] Ku sangweyu dia akanga a lukesu diatukumeka esadi.

¹⁴Vo watuhumanaka la udjima kʼatei a yanyi, Watamambaka unya lʼatei ote uku lʼutshu.

¹⁵Ndi katulamaka ditshiki uma lu manelu yawo, La ahumbi uma lʼanya wʼakanga a wulu.

¹⁶Okone amenyi fono watuyalaka la elungamelu, Kolo kumbudiha unyo ato.

¹⁷Enda, one latulungulaka luhangu uma le Unyashungu, eli la otshoko! Okone tanyolaki luhangu la Kanga-Wulu-Tshe.[5]

¹⁸Ndi atuhumuyaka puta, atukiombaka. Ndi atokomolaka, ku lunya landi latokonoyaka.

¹⁹Ndi ayukushimbela uma lʼehenyohenyo esambeli. Lʼatei a kolo esambeli nduku otoi wayukunda.

²⁰Ndi ayukushimbela uma lu nyoi lu nshi ya ndjala ka kasha, Ndu uma lu wulu wa yombo lu nshi ya ta.

²¹Wayukushe uma lʼohenyohenyo wa lulimi, Ndu we huka woma lamʼayuya elanyelu.

²²We ayola elanyelu ndu ndjala ka kasha, We huka nyama ya la kete woma,

²³Ne dia we ayudja lʼave wa lʼusui sheki, Ndu nyama ya la kete wayuyala la ye ki.

²⁴We ayulimbitela wati: Luudu laye la dipema leko ki. We ayutsho lʼukutu aye, ayututana tshe kukeli.

²⁵We ayeya wati: Tukanula taye tayuyala efula. Wane wayotongo uma le ye, wayuyala efula uku adiyu wa lʼusui.

²⁶We ayutoto lu diumbu lu nshi yʼusumbi a lukusumbi, Uku atuwembaka ekanda kʼepunga kambuma tu.

²⁷Dikambu ne mbakatayangi wulu; dio dieko mete, Udiuki, udilimbiteli, dia dio ndjala waho le ye.