Read tetala Jobo 6 Bible Online

Jobo 6 - tetala bible

Jobo 6

¹Jobo akakaluya diui ati:

²Utunduyala wediki ohenyohenyo ami, Utuwukitsha asui ami lu kilo,

³Tshiki vo wutuyala wutshu wuleki lokongo la lu ashi a waki wutshu: Diako mbakamatundja aui utundjatundja.

⁴Pitu ya Kanga-Wulu-Tshe yakantsheta, Utema ami watonokaka lolengo layo. Woma wa mamba wa Unyashungu watuyalongaka dia ndo la mi.

⁵Undi, mangana ayawana lamʼeto lu adiyu wʼomongela? Ngombe mbeyaka mbawana lamʼeto lu adiyu ato wambuma?

⁶Untu mbeyaka nde engo kʼumishi aha la leho? Pe keko lʼotongu a wema wʼukeli?

⁷Utema ami ntunaka dinanda. Dio dieli uku ma dia wononyi le mi.

⁸Utumukundja kene kalombami, Utetawo Unyashungu mbishami kene kakumbulami li!

⁹Utetawo Unyashungu mbatshatshami, Utundetawo nsimbula lunya landi dia nsihulami li!

¹⁰Tshiki dimi lutusambema, Lutongenangena lu pa kene kahambisha mumuya. Dimi kumpedia aui wa lʼEkila nduku yema.

¹¹Okoko wana walungamelami lamʼememi kema la wulu ntu? Okoko wana wakungami la memakana lamʼambukuka ekumelu kami?

¹²Undi wulu ami, wulu wa dive mbewo? Undu dimba diami ohotela mbedio?

¹³Dimi kema la ekimanyelu ntu, Ewu kambuyala etali uma le mi.

¹⁴Ongenyi wa one lasuwa mpumbaka mbuka ongenyi andi ketshi, Kuyanga ndi amboseka woma wa Kanga-Wulu-Tshe.

¹⁵Analingu weli akanga a lukesu uku elula, Uku akeledu wʼashi watushishoka,

¹⁶Wako watuyalaka edima lʼashi wʼekamu, Lene atushamaka lungi lʼekama la tshitshi.

¹⁷Lamʼatuyakaka edungu, ku vo nshisho, Kana luhaladi la unya, ku vo muna lu ahuli awo.

¹⁸Ambetshi a mbuka watukadimoka uma lu mbuka kawo, Watotoka lʼesui wa shenga, watushishoka.

¹⁹Ambetshetshi wʼuma la Temana watuyangaka ekeledu ako, Ndu amengodi wʼuma la Sheba watulungamelaka.

²⁰Vo watuvokaka sonyi ne dia wakalungamela, Watuyalaka la ukandukandu lamʼatuwukumaka.

²¹Osoku mbenyu lu ashu ami. Nyu nyambena okei ami, ku nyambuka woma!

²²Undi, dimi lakanyolombe nti: Nyumbisha engo kemotshi; Kana nyumbisha eshasha uma lu diango dianyu?

²³Kana nti: Nyunshimbeli uma lʼanya wʼutunyi? Kuyanga nyutshunguli uma lʼanya wʼasuyanyi?

²⁴Nyumbetsha, ku dimi layolembohala. Nyunimbitshiya lu na akamangi.

²⁵Aui wa mete watutshutshiyaka untu, Keli luhangu lanyu katshalo na?

²⁶Nyu nangaka mamiami lu aui watami; Nyu hanyeyi nyati: Aui wata usuyami weli wutata?

²⁷Nyu nyatukaka ana wa ditshiki uwali, Ndu nyatudjaka engenyi anyu ushinga.

²⁸Kakiane dimi lambunyosengasenga nti: Nyumendi! Dimi halunyutela kashi.

²⁹Dimi lambunyosengasenga nti: Nyukani yimba, tanyuntshelaki utshelatshela. Nyumukana yimba, nyulimbiteli uku wahami la unungu.

³⁰Undi, kolo keko lu lulimi lami? Unyo ami haweyi nimbitela kolo uka?