Read tetala Jobo 7 Bible Online

Jobo 7 - tetala bible

Jobo 7

¹Undi, untu aha omenyi fono mbendi la kete, La nshi yandi uku nshi yʼukambi?

²Uku fumbi katuyangaka dedi, Ndu uku usi ulimu latulungamelaka difutu diandi?

³Osoku mbakamakundja ngondo ya pa, Ndu mbakamalungula etshu wʼasui.

⁴Lamʼatumetamaka, dimi ndjambulaka nti: Etena kakona kayumeto? Etena kakona kayushila utshu? Dimi latukadimokadimoka edja ndu lʼehutwelu ka unya.

⁵Dimba diami diambukumbama la kusu ndu la kaya ya kete; Diuwu diami diambutundotundo, diambolelo.

⁶Nshi yami yambeta esadi uku uleki ututi wʼumbitshi; Yo yambeta yaha la elungamelu.

⁷Uho wati: Lumu lami leli efufelu. Ashu ami hawena diese ntu.

⁸Su diatumendaka, hadiumenda ntu; Su diaye diayunyanga, ku dimi haluyala ntu.

⁹Uku atukumboka dingi ndu atudiomoka; One lambuhulo utsha lu Dihuli diʼEdu, hatukalulaka ntu.

¹⁰Ndi hukalula ntu lu luudu landi, La dihuli diakandadjaseka hadiulimbitela ntu.

¹¹Diako mbahameyi nshimba unyo ami, Mbayumoteketa lu okei wʼutema ami, Mbayumulela lu lokonyo la lumu lami.

¹²Undi, ashi a waki mbemi, kuyanga shimiamba, Dia we nkitshiyami alami lʼutshimba ami?

¹³Lamʼatami nti: Tangi kami kayututsha kandji kami, Mbetu kami kayolodia kandji kami,

¹⁴We atumbataka asulu la alo; We atumbutshaka woma la waenelo.

¹⁵Hai! Dimi lutulanga mpinama lu kingu, Lutulanga nyoi uleki asui ane.

¹⁶Dimi lambuhetsha lumu lami, halangi numba pundju. Unkimo, ne dia lumu lami leko paka efufelu.

¹⁷Untu eli na, dia we mbukanela, Dia we nkitsha tukanyi taye le ndi,[6]

¹⁸Dia we tuwendaka pindju tshe, Ndu dia ntuwedikaka tena tshe?

¹⁹Etena kakona kayuyukimo mendami? Etena kakona kayuyunkimo dia dimi mena losoi?

²⁰Naka dimi lakatshi kolo, kakona keyami nkutshela we umendji wʼantu? Ukundi ambuyukitsha pole ka we mbukakami pitu yaye? Ukundi ambumuyala wutshu le ye?

²¹Ukundi ahayanyimanyia kolo yami, Ndu ahayuhela uhedia ami? Dimi lutsha mbetama lu ditshu. We ayunyanga wulu, ku dimi haluyala ntu.