Read tetala Jobo 8 Bible Online

Jobo 8 - tetala bible

Jobo 8

¹Ku Bilidade, usi Shua, akahula diui ati:

²Edja ndu kaandi ayuyukimo nteketa wuhu oso? Edia ndu kaandi ayukimo aui wʼuma lʼunyo aye ndjala uku lopepe la wulu?

³Undi, Unyashungu atulanyaka akambu wʼusimbwi? Kanga-Wulu-Tshe atulanyaka akambu wʼololo uka?

⁴Naka anʼaye wakutshela kolo, Keti ndi akakimo lu wulu wa ehedia awo.

⁵Naka we ayuyangaka Unyashungu lʼutema otoi, Naka we ayosengasenga Kanga-Wulu-Tshe,

⁶Naka we eko uluwanyi ndu usimbwi, Ndi ayulungaka lu dikambu diaye; Ndi ayukongenyangenya lu edjaselu kaye kaha la unungu.

⁷Kuyanga etatelu kaye kaki tshitshe, Ekumelu kaye kayuyala wuki.

⁸Dimi lambukosengasenga nti: Umbuli waku wa lu nongo yaketi, Ulungi akambu wakashula washewo.

⁹Shu teli ana wakuto lui, hateyi nduku dikambu, Ne dia nshi yasu la kete yeli paka dedi.

¹⁰Undi, vo hawuketsha, hawoteketa la ye, Hawukutela aui wʼuma lʼetema awo?

¹¹Undi, lukungu mbeyaka ngona aha lasuki lʼashi? Ongombe mbeyaka ngona lu ahuli waha ashi?

¹²Lamʼekiwo uyuyu, watuhimbula; Vo watolengelaka esadi uleki adiyu akina.

¹³Osoku mbeli mbuka ya waku tshe watuhelaka Unyashungu. Elungamelu kʼuntu a kolo kayulana.

¹⁴Ekamelu kandi kambushisho, La usuko andi weli otei wa dihuha.

¹⁵Ndi atekamaka luudu landi, keli lo kema la wulu. Ndi atulukimelaka, keli lo halushikikala.

¹⁶Ndi atongonaka efula la ntundu ka unya. Tahi yandi yatusimbemalaka ladiku diʼekambo kandi.

¹⁷Ediu andi watotoka lʼasa ave; Ndi atuyalaka lʼatei wʼave.

¹⁸Naka wayuwunya uma lu dihuli diandi, Dihuli diako diayuwanguna ati: Dimi halakeyi.

¹⁹Osoku mbeli ongenongeno watukundjiyaka mbuka yandi. Ku lʼokongo andi, akina watunelaka.

²⁰Enda, Unyashungu hakadia untu lʼololo, Ndu hatulamaka atshi wa kolo.

²¹Ndi ayuludia unyo aye la waelu wʼongenongeno, La elomo aye la esambu wa diandu.

²²Atunyi aye wayuvo sonyi; Luudu la dipema lʼantu wa kolo layushisho.