Read tetala Esambu 105 Bible Online

Esambu 105 - tetala bible

Esambu 105

¹O! Nyukaki Latuyalaka lusaka, nyetaki lukumbu landi, Nyusanyiaki antu dia etsha andi!

²Nyuwimbelaki esambu, nyuwandulaki, Nyutaki dia elimu andi wa mamba!

³Nyongenangenaki lu lukumbu landi lʼekila. Etema a wane watuyangaka Latuyalaka, wangenangenaki!

⁴Nyuyangaki Latuyalaka ndu wulu andi. Nyutetemalaki nyanga elundji kandi!

⁵Nyuhoki akambu wa mamba wakandatshi, Ee, tulimbitelu tandi ta mamba la dumbwelu diʼuma lʼunyo andi,

⁶Nyu tukanula tʼAbarahama ukambi andi, Nyu ana wa Jakoba, esonami andi!

⁷Latuyalaka keli Unyashungu asu. Dumbwelu diandi diatuyalaka lu kete tshe.

⁸Ndi atuhoka daka diandi pundju, Ndu diui diakandadjanga edja ndu nonga kinunu,

⁹Daka diakandadji la Abarahama,[128] La etshibelu kakandatshibela Isaka.[129]

¹⁰Ndi akashikike daka diako, uku olembe le Jakoba, Ee, daka dia pundju le Isariyele,

¹¹Ati: Layukusha kete ya Kanana, Etenyi kaye kʼukito.[130]

¹²Lamʼakiwo kema kambi, Atoi wʼantu la angendangenda lu kete yako;

¹³Ndu lamʼakawatekekoka lu wudja la wudja, La uma lu diulelu dimotshi utsha le antu akina,

¹⁴Ndi kumbetawo untu mbatshela kolo. Ndi akahangwela khumi ya dikanga dia dikambu diawo,

¹⁵Ati: Tanyunandaki wane wakamakiti iso, Ndu tanyutshelaki amvutshi ami kolo![131]

¹⁶Ndi akatumi ndjala ka kasha lu kete, Akadihi mbuka tshe ya nkundja mbu ya nde.[132]

¹⁷Ndi akatumi untu la ntundu kawo, Josefu lakasundjama lu fumbi.[133]

¹⁸Ekulu andi wakahambo lʼekodi, Wakukeleka molola lu kingu,

¹⁹Edja ndu lamʼakashidiyama diui diakandati, Edja ndu diui dia Latuyalaka diakawedika.[134]

²⁰Khumʼekanga akatumi diui dia ntuntshungula, Umbuledi wʼantu akutshungula.[135]

²¹Ndi akawudji uwandji wa luudu landi, La umbuledi wa diango diandi tshe,[136]

²²Dia ndi nkeleka ewandji uku akandalangi, Ndu mbetsha dihangamendi diandi akambu wa yimba.

²³Isariyele akayi lu Edjibitu,[137] Ee, Jakoba akayudjase lu kete ya Hama.[138]

²⁴Unyashungu akasha wudja andi diwutshi, Akawaete akanga a wulu ndeka atunyi awo.

²⁵Ndi akakadimula etema awo dia vo mpetsha wudja andi, La dia vo nkesa ekambi andi.[139]

²⁶Ndi akatumi ukambi andi Mose, Ndu Arona lakandasonola.[140]

²⁷Vo wakawaenya tulimbitelu tandi, La akambu andi wa mamba lu kete ya Hama.

²⁸Ndi akatumi udjima, akuhindja tshududu.[141] Ku vo wakatetemala mpedia diui diandi.

²⁹Ndi akakadimula ashi awo dikila, Akadiaki nsi yawo.[142]

³⁰Kete yakalulanela lʼekole, Pulu ndu lu mvudu ya khumi ya dikanga yawo.[143]

³¹Ndi akati diui, ku tshingu yakafulanela,[144] Ndu shidi lu beke tshe dia kete yawo.[145]

³²Ndi akaloshiya ngimbi ka mboko lu dihuli dia mvula, Ndu nyumbi ya dja lu wudja awo.

³³Ndi akalanya ekodi awo wʼelua ndu etamba awo wa fingu, Akokola etamba wa lu wudja awo.[146]

³⁴Ndi akati diui, ku endjo wakayi, Ndu akata waheyama mbala.

³⁵Vo wakali tumbatumba tshe dia lu kete yawo, Wakamani dinela dia lu dikambo diawo.[147]

³⁶Ndi akadiaki ana wa nundu tshe lu kete yawo, Ditatelu tshe dia wulu awo.[148]

³⁷Ndi akatundja wudja andi la fesa la paunyi, Nduku otoi aki wodu lʼatei wauhu andi.

³⁸Lamʼakatumbi asi Isariyele, asi Edjibitu wakangenangena, Ne dia woma awo wakawandi.[149]

³⁹Ndi akakokola dingi, akakumbi; Ndu dja, dia mbasenya lʼutshu.[150]

⁴⁰Vo wakolombe, ku ndi akatumela tuluhu; Akalutsha la ma diʼuma lʼulungu.[151]

⁴¹Ndi akakomola dive, ku ashi wakafuko; Ku vo wakakele uku okedi lu kete yʼufumbu.[152]

⁴²Ndi akuho diui diandi diʼekila, Ndu Abarahama ukambi andi.

⁴³Ndi akatundja wudja andi lʼongenongeno, Esonami andi la esambu wʼongenongeno

⁴⁴Ndi akawasha kete ya wedja.[153] Ku vo wakayala akanga wʼelua wʼelimu wa wedja ako,

⁴⁵Dia vo nama adjangu andi, La nkitanyia elembe andi. Ee, nyanduli Latuyalaka!