Read tetala Esambu 106 Bible Online

Esambu 106 - tetala bible

Esambu 106

¹Nyanduli Latuyalaka! Nyukaki Latuyalaka lusaka, ne dia ndi eli ololo, Ngandji kandi ka shikaa katuyalaka pundju![154]

²Akona ayeya mvuta etsha a waki wa Latuyalaka, Kana nyangaka lukumu la diandu diandi tshe?

³Wane watuyelaka sambu kʼololo weli la otshoko, Ndu wane watutshaka ololo tena tshe!

⁴Latuyalaka li, umbuhoki la ololo aye lamʼatuyutshelaka wudja aye! Uyi le mi la panda kaye,

⁵Dia dimi mena diese diʼesonami aye. Ku dimi layongenangena dia ongenongeno wa wudja aye, Ndu layuyasema kame lʼukito aye!

⁶Takatshi kolo uku washesu, Shu takayala la uhedia, takatshi kolo.

⁷Washesu kunkana yimoa dia akambu aye wa mamba wa lʼEdjibitu. Vo kumbuho wuki wa ngandji kaye ka shikaa. Vo wakayala la uhedia lʼumamu wʼuduwa, ee, Uduwa a Tilili.[155]

⁸Keli ndi akashimbela ne dia lukumbu landi, Dia menya wulu andi wa mamba.

⁹Ndi akahangwela Uduwa a Tilili, ku vo wakumi, Okone ndi akawaetsha lʼohongo uku lʼusui.

¹⁰Ndi akashimbela uma lʼanya wa one lakahetshaka, Akatshungula uma lʼanya wʼutunyi.

¹¹Ashi wakakhukumela atunyi awo. Nduku otoi lʼatei awo akatshikala.

¹²Ku vo waketawo aui andi,[156] Wakawimbela esambu wa diandu.[157]

¹³Keli kemʼedja, vo wakuhela elimu andi, Kunkungela tukanyi tandi.

¹⁴Keli vo wakaleki ndjela nangu yʼalimba awo lʼusui, Ndu wakahimbaka Unyashungu lʼusui wa shenga.

¹⁵Ndi akawasha kene kakawalangi, Keli etema awo wakumi.[158]

¹⁶Vo wakuki Mose kandjema lu pangu kawo, Ndu Arona ukilami wa Latuyalaka.

¹⁷Ku kete yakate, yakamene Datana, Yakakhukume ului wakayeli Abirame.

¹⁸Ku dja yakahete lʼatei awo, Lumbi la dja lakatshumbi antu wa kolo.[159]

¹⁹Vo wakatshi yana ya ngombe lu Horeba, Wakatemola etemolatemola ka lolelola,

²⁰Wakengonya lutumbu lawo La efanyelu ka ngombe katolekaka adiyu.

²¹Vo wakuhela Unyashungu, Ushimbedi awo, Lakatshaka akambu a waki lu Edjibitu,

²²Lakatshi elimu a waki lu kete ya Hama, La akambu wa mamba lʼUduwa a Tilili.

²³Okone mbakandati dia mbashila ushiki; Keli Mose, osonami andi, akahakema lʼasandi lʼantu, Diaha ndi mbalanya.[160]

²⁴Vo wakonyola kete yʼololo, Kumbetawo diui diandi.

²⁵Vo wakangunanguna lu mvudu yawo yʼapema, Kunkitanyia diui dia Latuyalaka.

²⁶Diako mbakandeme lunya landi, mbakandatshibi Dia mbalanya lʼusui,[161]

²⁷Ndu dia nanya tukanula tawo lʼatei a wedja, La mbahandjula lu wedja tshe.[162]

²⁸Vo wakamamema Bala-Peore, Wakali elambu wakawalambula djimu.

²⁹Vo wakawukia kele uma lʼetsha awo, Ku asui a wulu wakayi le wo.

³⁰Ku Finehasi akunela, akoto wulu lu dikambu, Ku asui wakashili.

³¹Dikambu diako diakalema le ndi uku sambu kʼololo, Lu nonga la nonga pundju.[163]

³²Vo wakukia Latuyalaka kele ndu lasuki lʼashi wa Meriba, Ku Mose akasuwi lu dikambu diawo,

³³Vo wakahindja utema andi, Ku ndi akatundja aui waki kunkuka lʼelomo andi.[164]

³⁴Vo kundjaka akanga a kete, Uku akawadjangela Latuyalaka.

³⁵Keli vo wakekesanela lʼasi wedja, Wakeki ditshelu diawo.

³⁶Vo wakakambela dikishi diawo ulimu, Diako diakayala utakanya le wo.[165]

³⁷Vo wakadiakela djimu anʼawo wʼapami La anʼawo wʼamantu.[166]

³⁸Vo wakatundja dikila diʼantu waha la unungu, Ee, dikila dia ana awo wʼapami ndu dia anʼawo wʼamantu, Wakadiakela dikishi diʼasi Kanana, Ku kete yakalana la dikila.[167]

³⁹Osoku mbakawayalanya lʼetsha awo, Mbakawaseke Unyashungu lu ditshelu diawo.

⁴⁰Okone Latuyalaka akatamanya mbuka wudja andi kele, Akenge antu andi diengekhu.

⁴¹Ndi akakimo lʼanya wʼasi wedja, Ku waku wakahetshaka wakawaulela.

⁴²Atunyi awo wakasuyaka, Vo wakalembiama la tshina dia wulu awo.

⁴³Ndi akatshungulaka tena tshe. Keli vo wakayalaka la uhedia lu tukanyi tawo, Wakayalaka amenyi fono ne dia kolo kawo.

⁴⁴Keli Latuyalaka akendi fono yawo Lamʼakanduki delu diawo.

⁴⁵Ndi akuho daka diandi le wo, Akalembe utema, ne dia efula ka ngandji kandi ka shikaa.

⁴⁶Ndi akawaukamia ketshi Ndu le waku tshe wakalungaka fumbi.[168]

⁴⁷Latuyalaka, Unyashungu asu, utushimbeli! Utukaluya uma lʼatei a wedja, Dia shu mbukaka lukumbu laye lʼekila lusaka, La dia shu ndeka nkandula.

⁴⁸Latuyalaka, Unyashungu wa Isariyele, atumbwami Pundju, pundju! Antu tshe wataki vati: Ayali osoku! Nyanduli Latuyalaka![169]