Read tetala Esambu 144 Bible Online

Esambu 144 - tetala bible

Esambu 144

¹Latuyalaka, dive diami, Latetshaka anya la pita yami dia ndo ta, atumbwami!

²Ndi keli dive diami la wumbe ami wa ta, Lungeli lami la wuki la utshungudi ami, Engawu kami, le ndi katumushamaka. Ndi kakanembiya wudja andi.

³Latuyalaka, untu eli na dia we mbukanela, Kana onʼa untu dia we kana dikambu diandi?[211]

⁴Untu eli uku lungi. Nshi yandi yatetaka uku dedi.

⁵We Latuyalaka, ukute ulungu aye, uhulo! Unandi ekungu, keli watuwo dinga!

⁶Ungadimuya angadimu, uhandjuli atunyi ami! Uki pitu yaye, uwakhungiakhungia.

⁷Usimbuli anya aye uma ladiku; Untshungulu, unshimbeli uma lʼashi a waki, Uma lʼanya wʼasi wedja.

⁸Enyo awo watutaka akambu wa lukesu, Ndu anya awo wʼapami weli too la kashi.

⁹Unyashungu li, layukimbela usambu wʼuyuyu, Layukuhumela esambu wa diandu la losese lʼekodi dʼkumi.

¹⁰We katuhandjaka khumi ya dikanga, Katushimbelaka ukambi aye Davidi uma lu yombo ya ta.

¹¹Untshunguli, unshimbeli uma lʼanya wʼasi wedja, Akanga wʼenyo watutaka akambu wa lukesu, La anya wʼapami weli too la kashi.

¹²Anʼasu wʼapami weli uku tumbatumba Diatulaka esadi. Anʼasu wʼamantu weli uku ave wakawasele Dia mbidja lu atshuku wa mvudu ya khumi ya dikanga.

¹³Apenge asu watululaka too La wehu tshe wa mbu ya nde. Ekoko asu watufulanelaka nunu nunu, ndu nunu akumi akumi Lʼesui asu.

¹⁴Ngombe yasu yatutanaka efula. Nduku elanyelu, nduku lohombo, Nduku alelu lʼesese asu!

¹⁵Wudja weli la etshoko eso, weko la ongenongeno, Ee, wudja weli la Latuyalaka uku Unyashuneu awo, weko la ongenongeno.