Read tetala Esambu 22 Bible Online

Esambu 22 - tetala bible

Esambu 22

¹Unyashungu ami, Unyashungu ami, ukundi ansekaye na?[21] Ukundi emalaye tshalula, aha nkimanyiami, ndu ahayalungi delu diami?

²Unyashungu ami li, dimi latulelaka la yanyi, keli we hatunkaluyaka diui! Lʼutshu, dimi hatuyalaka la mumuya.

³We keli Ekila, We katudjaseka lu diandu dia Isariyele.

⁴Washesu wakekamaka le ye. Vo wakakekamaka, ku we akatshungulaka.

⁵Vo wakalelaka la ntundu kaye, wakashimbamelaka; Vo wakakekamaka, ku vo kumbutshama sonyi.

⁶Elambalamba kemi, aha untu. Omonywami le antu, la uhetshami a wudja mbemi.

⁷Wane tshe watomenaka, watonsokaka, Watumpinwelaka elomo, watunyinginyaka ete;[22] watutaka vati:

⁸Ndi atuyaiumoka le Latuyalaka, Latuyalaka ushimbeli, Utshunguli, ne dia ndi atongenangenelaka.[23]

⁹Keli we akantundja uma lʼutema a nyomi; We akanamaka lamʼakimi lu noma awele wa nyomi, Ee, umaka eutwelu we keli Unyashungu ami.

¹⁰Le ye kakamakimwama umaka eutwelu kami. Umaka etena kakambuti nyomi, we kaki Unyashungu ami.

¹¹Tanganaki uma le mi, ne dia asui waya suki. Nduku untu ukina layeya nkimanyiami.

¹²Waumi wa ngombe efula weko lʼutshimba ami, Waumi wa ngombe wa wulu wʼuma la Bashana wambunyinga.

¹³Yo yambase enyo ayo uya le mi, Uku tambwe kahatula ndu kadikita.

¹⁴Dimi lambutshulwama uku ashi. Weka ami wambosongo. Utema ami ambolelo, ambuyala ashi atu.

¹⁵Wulu ami ambushila; dimi laya uku etshi ka mbaka kambule. Lulimi lami latukakatelaka lu atama; We ambontola lu ditshu dia nyoi.

¹⁶Fo yatunyingaka, Ului wʼantu wa kolo weko lʼutshimba ami. Vo wakatundula tambi diami la akaka ami.

¹⁷Dimi mbeyaka mbala weka ami tshe. Vo watunshishimaka, watumendaka tee.

¹⁸Vo wakakahana ahondo ami, Wakuki kishiwawu kami uwali.[24]

¹⁹Tanganaki etali uma le mi, we Latuyalaka! We keli wulu ami. Uyi esadi, uyunkimanyia.

²⁰Ushimbeli utema ami uma lu yombo, La lumu lami uma lu wulu wa fo.

²¹Unshimbeli uma lʼunyo a tambwe, Untshunguli uma lu seki ya ndjati. We ambumbukela.

²²Dimi layudianganya lukumu la lukumbu laye lʼatei analingu, Layukandulaka lʼatei a lusanganya.[25]

²³Nyu wane watukaka Latuyalaka woma, nyuwandulaki. Nyu, tukanula ta Jakoba tshe, nyutumbulaki, Nyu, tukanula ta Isariyele tshe, nyudidimaki la ntundu kandi!

²⁴Ndi kema la dionyo kuyanga wononyi lu asui wʼusuyami; Ndi hatusheka elundji kandi uma le ndi, Keli ndi atuwukelaka lamʼatundulelelaka.

²⁵Diandu diami diatuyalaka uma le ye lʼatei a lusanganya la wuki. Dimi layushidiyaka alaka ami la ntundu ka wane watukukaka woma.

²⁶Akanga a memakana wayolekaka, wayulutaka. Wane watuyangaka Latuyalaka, wayuwandulaka! Etema anyu watshikalaki la lumu pundju!

²⁷Kuma tshe ya la kete yayuhoka Latuyalaka, wayukadimo utsha le ndi. Khumbu tshe ya wedja wayukotemolaka.

²⁸Latuyalaka keli kanga diulelu; Ndi atulelaka wedja.

²⁹Akanga wʼenginu tshe wa la kete wayokolamaka, wayotemolaka ndu vo. Wane tshe watuhuloka utsha lu ditshu, watokolamaka la ntundu kandi, Ee, ndu one tshe laheyi nshimbela lumu landi.

³⁰Tukanula tawo wayukambelaka ulimu. Vo wayusawulaka la lolonga layayi lu dikambu dia Khumadiondjo.

³¹Vo wayuyakaka, wayutaka sambu kandi kʼololo; Wayutelaka antu wahatuto dia ulimu andi.