Read tetala Esambu 31 Bible Online

Esambu 31 - tetala bible

Esambu 31

¹Latuyalaka li, le ye katumuyangaka eshamelu: Tetawoki dimi mbutshama sonyi pundju. Untshunguli lu sambu kaye kʼololo!

²Uhuke tui diaye uya le mi, untshunguli esadi! Uyali dive diami dia eshamelu la lungeli, la wulu dia nshimbelami!

³Ee, we eli dive diami la lungeli lami. Okone ne dia lukumbu laye, omenyaki mbuka, onombolaki.

⁴Untshunguli uma lʼotei wakawamambi lu usheshe, Ne dia we keli ulami ami.

⁵Dimi latukitshaka lumu lami lʼanya aye;[31] Latuyalaka, Unyashungu a mete, we ambuntshungula.

⁶Dimi latuhetshaka waku watekamaka dikishi diʼanyanya; Ne dia dimi latekamaka Latuyalaka.

⁷Uma lu ngandji kaye ka shikaa, mbayumuyala la ongenongeno ndu mbayumongenangena otekoya, Ne dia we atenaka fono kami, we mbeyaka ndu asui wʼutema ami.

⁸We hunkimo lʼanya wʼutunyi. We ambukitsha ekulu ami lu dihuli dia hwe.

⁹Umbuki ketshi we Latuyalaka, ne dia lu shoko kemi. Ashu ami wambule la delu, Ee, ndu utema ami la dimba diami wambulana.

¹⁰Lumu lami lambeta la lunyangu, Ndu deku diami la tukuku tʼalelu. Wulu ami ambushila ne dia kolo kami, Ndu weka ami wambolelo.

¹¹Atunyi ami tshe wakambete omonywami, Ee, omonywami vuleki le asukanyi ami, ndu engo ka woma le engenyi ami. Wane watomenaka lʼandja, watundawoka etali.

¹²Dimi lambuhamela uku udu, Lambuyala uku mbaka kambule.

¹³Dimi lakuki aui wa lotengo uma le antu efula, Eutshelu ka woma ambulula lʼutshimba tshe. Lamʼakawasangana kame lu dikambu diami, Vo wakadji sheki vati: Katudiaki.

¹⁴Keli dimi latukekamaka, we Latuyalaka; Latutaka nti: We keli Unyashungu ami.

¹⁵Nshi yami yeko lʼanya aye: Untshunguli uma lʼanya wʼatunyi ami, ndu uma lʼanya a waku watunsuyaka.

¹⁶Ohetsha elundji kaye ngaingai uya le ukambi aye. Unshimbeli la ngandji kaye ka shikaa,

¹⁷Latuyalaka, tetawoki dimi mbutshama sonyi lamʼatumuketaka. Etawo atshi wa kolo mbutshama sonyi, Uwalembohaya lu Dihuli diʼEdu.

¹⁸Etawo elomo wa kashi ndjala lumi, Wane watotengaka untu ololo Uma lʼutaku awo la dionyo diawo.

¹⁹Ndi ololo aye wuki li! Wakayalamela wane watukukaka woma, Wakayumbela wane watuyangaka eshamelu kawo le ye lu ashu wʼana wʼantu.

²⁰We atalamaka lasuki la ye uma le wane watasuyaka, We atalamaka lu luudu laye uma lu nimi ya lotengo.

²¹Latuyalaka atumbwami! Ndi akamenya ngandji kandi ka shikaa Lamʼakimi lu dihuli aia pika lʼusumba.

²²Dimi lakati diui shashimuya nti: Dimi lambutshanyema etali uma la ntundu kaye. Keli we akuki diui diami diʼosengosengo Lamʼakamakulelela.

²³Nyu ekilami tshe, nyuki Latuyalaka ngandji. Latuyalaka atulamaka kanga kolamelu, Keli ndi atusuyaka kanga utaku wulu.

²⁴Nyukikitali, etema anyu wayali la dihunga, Nyu tshe watulungamelaka Latuyalaka.