Read tetala Esambu 33 Bible Online

Esambu 33 - tetala bible

Esambu 33

¹Nyongenangenaki le Latuyalaka, nyu antu wʼusimbwi! Diandu nsunganaka uma le untu lʼuluwanyi.

²Nyukaki Latuyalaka lusaka la losese, Nyuhumelaki kimbu ya diandu lu losese leli la ekodi dikumi.

³Nyuwimbeli usambu wʼuyuyu, Nyuhelenganya sese yanyu.

⁴Diui dia Latuyalaka dieli shikaa, Elimu andi tshe watushidiyamaka la kolamelu.

⁵Ndi atulangaka sambu kʼololo la uluwanyi; Kete tshe yambulula la ngandji ka shikaa ka Latuyalaka.

⁶Uma lu diui dia Latuyalaka mbakatungama ulungu, Ndu ului awo tshe uma lu luwi lʼunyo andi.

⁷Ndi akamotsha ashi a waki kame, Akakitsha lʼahuli wa eumbelu.

⁸Kete tshe yukaki Latuyalaka woma, Ndu antu wa lʼandja tshe wadidimaki la ntundu kandi.

⁹Kamʼakandati diui, ku dio diakatshama. Ndi akadjanga didjangu, ku dio diakashikikala.

¹⁰Latuyalaka atuhandjulaka sangweyu dia wedja, Ndi atulanyaka tukanyi tʼantu.

¹¹Keli sangweyu dia Latuyalaka diatutshikalaka pundju, Ndu tukanyi tʼutema andi lu lolonga la lolonga.

¹²Wudja wetawo vati: Latuyalaka eli Unyashungu, weli la otshoko, Ee, wudja wakandasonola dia ndjala ukito andi, weli la otshoko.

¹³Latuyalaka atendaka uma lʼulungu, Ndi menaka antu tshe.

¹⁴Uma lu dihuli diʼedjaselu kandi, Katundushishimaka antu wa la kete tshe.

¹⁵Ndi akakengi etema wʼantu tshe, Atulimbitelaka etsha awo tshe.

¹⁶Khumʼekanga heyi nshimbamela ne dia ului andi a wuki wʼalimbi, Onembishi heyi ntshungwama ne dia wulu wʼotekoya.

¹⁷Falasa kema la wulu wa nkundjiya untu mpanda, Wulu andi tshe haweyi ntshungula untu.

¹⁸Enda, su dia Latuyalaka dieko le wane watuwukaka woma, Le wane watulungamelaka ngandji kandi ka shikaa,

¹⁹Dia mpandja etema awo uma lu nyoi, Dia mbalama esenyu lu ndjala ka kasha.

²⁰Etema asu watulungamelaka le Latuyalaka, Ndi keli ekimanyelu kasu la engawu kasu.

²¹Etema asu watongenangenaka le ndi, Ne dia shu tatekamaka lukumbu landi lʼekila.

²²Latuyalaka li, ngandji kaye ka shikaa kayali le su, Uku atutukilungamelaka uma le ye!