Read tetala Esambu 35 Bible Online

Esambu 35 - tetala bible

Esambu 35

¹Latuyalaka li, unshimbeli uma le atunyi ami; Olo ta la wane watondoshaka!

²Ukimeli engawu ka tshitshe ndu ka wuki, Uneli dia ndjunkimanyia!

³Utepia dikonga la osongo utsha le waku watunsuyaka; Uteli utema ami wati: Dimi keli panda kaye!

⁴Utsha wane watuyangaka lumu lami sonyi, afutanya. Waku wakana yimba dia eshishwelu kami, wakaluli ekongokongo wahukusani!

⁵Vo wayali uku fufudi yatembamaka la lopepe, Ku ondjelo wa Latuyalaka awatshanya!

⁶Mbuka kawo kayali udjima ndu oselo, Ku ondjelo wa Latuyalaka ayeli!

⁷Vo wakamambi otei lu usheshe wamamba, Wakatshimi difuku dia ndjakami udiakadiaka!

⁸Elanyelu kayi le wo shashimuya; Watali vame lu otei wakawambi, Wako loko, walanyemi!

⁹Ku utema ami ayuyalaka la ongenongeno le Latuyalaka, Ongenongeno wʼutamanya lu etshungwelu kandi.

¹⁰Weka ami tshe wayuta vati: Latuyalaka, akona eli uku we? Latutshungulaka omenyi fono Uma le one luleki wulu; Omenyi fono la uhumbi Uma le one latulanyaka?

¹¹Emenyi wa kashi watunelaka, Watumumbulaka akambu wahameyi.

¹²Vo watukaluyaka kolo lu ololo: Utema ami atuyalaka la wutshu.

¹³Keli lamʼakawayalaka la kandji, dimi lakalotaka ahondo wʼemusu, Lakayasuyaka la dikilelu dia ma, Lakalombaka la ote wokolami lu tulu.

¹⁴Dimi lakutshelaka uku ongenyi, kana uku onalingu, Lakanyamaka la delu uku untu lalela nyangu.

¹⁵Keli vo wakangenangenaka lu asui ami, wakamotaka, wakamotelaka kame. Atomboki wakimi kumbeya, wakasangana kame dia ntshelami kolo, Wakantengiantengiaka, kumpeko.

¹⁶Vo wakatetemala monyolami wonyolanyola, Wakankeketanyiaka wanyu.

¹⁷Latuyalaka li, edja ndu kaandi ayuyukimo mbaenda wendenda? Untshunguli uma lu tulunga tawo, Ndu lumu lami uma le tambwe.

¹⁸Ku dimi layukukaka lusaka lʼotemwelo a wuki, Ee, lʼatei ului a wuki wʼantu kayumukandulaka.

¹⁹Tetawoki wane watuntunaka utunatuna ngenangena lu dikambu diami. Tetawoki wane watumpetshaka uhetshahetsha[38] mpenwelami su.

²⁰Vo hawutoteketaka akambu wa ki. Vo watuyangaka aui wa lukesu dia ndosha akanga wa ki la kete.

²¹Vo wakaseka enyo a wo dia ntshelami kolo, Wata vati: Ye! ye! ashu asu wakenyi dikambu diako.

²²Latuyalaka li, we menaka dikambu ne, tolembohalaki! Khumadiondjo li, tanganaki etali uma le mi!

²³Eto, uneli dia nsambula dikambu diami Dia nsambula unungu, we Unyashungu ami la Khumemi!

²⁴Latuyalaka, Unyashungu ami li, ali dikambu diami la sambu kaye kʼololo. Vo tawongenangenaki lu dikambu diami.

²⁵Tawutaki lʼetema awo vati: Elu, osoku mbalangasu le ndi! Tawutaki vati: Tambomena ndʼutundu.

²⁶Wane watongenangenaka lu fono kami, wutshami sonyi, wafutani; Wane watuyasemaka dia ntshelami kolo, walombo la sonyi ndu la dionyo!

²⁷Wane watongenangenaka lu sambu kami kʼololo, walimbolimbo lʼongenongeno; Wataki tena tshe vati: Latuyalaka atumbwami! Ee, one latongenangenaka la uluwanyi wʼukambi andi.

²⁸Lulimi lami layoteketaka dia sambu kaye kʼololo, Ndu dia diandu diaye nshi tshe.