Read tetala Esambu 38 Bible Online

Esambu 38 - tetala bible

Esambu 38

¹Latuyalaka li, tumpangwelaki lu kele kaye, Tunsuyaki la ududu aye.

²Pitu yaye yambuntsheta. Lunya laye lambuyala wutshu la diku diami.

³Dimba diami tshe kema la ki, ne dia kele kaye. Weka ami tshe kema la wulu ntu ne dia kolo kami.

⁴Kolo yami yambumbahema lʼote ami Uku ushiko wa wutshu wahakuki dimi memba.

⁵Puta yami yambuyala sulu la tunya, Ne dia akambu ami wʼutshatsha.

⁶Dimi lambukututema, lambolembiama, Latetetaka la lunyangu yanyi tshe.

⁷Esohi ami wambutshumbama la kolo, Dimba diami kema ki.

⁸Dimi kema la wulu, lambowediawediama tshe. Dimi latukhumaka akhumu ne dia ohenyohenyo weli lʼutema ami.

⁹Khumadiondjo, lulangu lami lambeyama le ye, Akhumu ami hawukushama.

¹⁰Diui diami diambudidima, wulu ami ambushila, Ndu ashu ami wambule.

¹¹Engenyi ami la ambekesanedi ami hawutusukanaka ne dia puta kami, Ndu asi khumbu kami watemalaka tshalula.

¹²Waku watuyangaka lumu lami, watumambaka tulunga tawo. Waku watuyangaka elanyelu kami, watutaka aui wa utata, Ndu watukanaka akambu wa lukesu yanyi tshe.

¹³Keli dimi latuyalaka uku kanga luhuki, lahuki; Ndu uku kanga lumi, lahateketa.

¹⁴Ee, lambuyala uku untu lahuki, Ndu lahatukaluyaka diui uma lʼunyo andi.

¹⁵Latuyalaka li, le ye keli elungamelu kami, Latuyalaka, Unyashungu ami li, we kayunkaluya diui.

¹⁶Lambukolomba nti: Tetawoki vo ngenangena lu dikambu diami, Ne dia lamʼatoseloka dikaka diami, vo watuyasemaka.

¹⁷Dimi laya lasuki la nko, La kandji kami keko la mi tena tshe.

¹⁸Dimi lambushula munga kami, Lambunyanga ne dia kolo kami.

¹⁹Atunyi ami weko la wulu efula, Ndu wane watumpetshaka uhetshahetsha, weko efula.

²⁰Vo watunkaluyaka kolo lʼololo. Vo weli atunyi ami, ne dia dimi latuyelaka akambu wʼololo.

²¹Tonsekaki, we Latuyalaka! Unyashungu ami li, tuyalaki etali uma le mi.

²²Usamanya dia nkimanyiami, We Khumadiondjo, panda kami!