Read tetala Esambu 39 Bible Online

Esambu 39 - tetala bible

Esambu 39

¹Dimi lakati nti: Layuyalamaka lu mbuka yami, Dimi ntukutsha kolo la lulimi lami. Dimi layudihaka unyo ami khu, Lamʼayuyala untu a kolo la ntundu kami.

²Dimi lakalembohala, Lakatshikala ki lamʼakimi lʼasui, Keli lunyangu lami lakatekoya.

³Utema ami akatshumbo, Dja ya lʼetei yakantshumbi, Ku lakafula unyo, lakateketa.

⁴Latuyalaka, unimbitshiya ekumelu kami, La okone eli yediko ya nshi yami; Unimbitshiya uku eli nshi ya lumu lami.

⁵Enda, we akete nshi yami uku wuki wa pita nyei tshu, Ndu lulumbi lami uku engo kʼanyanya lu ashu aye. Mete, untu tshe lemadi, eli paka efufelu ketu!

⁶Untu tshe atokendakendaka uku didjidji. Ndi atuyasutshasutshaka anyanya; Atomotshaka ekundji, keli ndi heyi one layesangula.

⁷Khumadiondjo, kalungamelami kakiane na? Elungamelu kami keko le ye.

⁸Untshunguli uma lʼehedia ami tshe. Tumbeteki omonywami le kanga enginya.

⁹Dimi laki lumi, kunfula unyo, Ne dia we kakatshi dikambu so.

¹⁰Unya dikomoki diaye uma le mi; Dimi lambolemba la dikomoki diʼuma lu lunya laye.

¹¹We atusuyaka untu ne dia kolo katundutshaka, Atulanyaka kene kulekindi nanga uku yumumbu. Untu tshe eli efufelu ketu.

¹²Latuyalaka li, uki dombelo diami, uhuke tui lu delu diami. Tuyalaki kanga lunyu lamʼalelami. Dimi lambuyala usi wudja le ye, Umbetshi a mbuka, uku aki wapapa.

¹³Utukumbete, dia dimi mbeya ongenongeno, La ntundu latatshu, ku halenama ntu!