Read tetala Esambu 42 Bible Online

Esambu 42 - tetala bible

Esambu 42

¹We Unyashungu, utema ami atukukumbulaka, Uku atukumbulaka lufumbo ashi wa nkela.

²Utema ami atukaka Unyashungu pusa, atukaka Unyashungu a lumu pusa. Etena kakona kayumutsho le Unyashungu, ndu kayumenana la ndi?

³Asoi ami mbeli ma diami la yanyi ndu lʼutshu, Lamʼatuwumumbulaka tena tshe vati: Unyashungu aye, lendʼendi na?

⁴Lamʼakenenemi utema, dimi lambuho akambu ane: Uku akamatatshokaka kame la ului a wuki wʼantu, Uku akamatalombolaka utsha lu luudu la Unyashungu La waelu wʼongenongeno ndu la esambu wa eukelu ka lusaka, Ului a wuki wʼantu wale dambu dia lushi la wuki.

⁵Utema ami, ukundi ambuyolembiama, Ukundi ambuyutshutshumala na? Ulungamelaki le Unyashungu, Ne dia dimi layuwandula ntu. Ndi keli panda kami la Unyashungu ami.

⁶Utemʼami ambolembiama lʼatei ami. Okone dimi lambukuho uma lu kete ya Jorodana ndu ya Heremona, Uma lʼUkungu a Mizara.

⁷Dingunda diatetaka dingunda dikina la lundju la pela kʼashi; Asukhu aye tshe la emunda aye wʼashi watetaka ladiku diami.

⁸Latuyalaka atomenyaka ngandji kandi ka shikaa la yanyi. Ku lʼutshu, usambu andi weko le mi, Uku dombelo le Unyashungu a lumu lami.

⁹Dimi layumbula Unyashungu, dive diami, nti: Ukundi ambuyumbuhela? Bundi katumokendakendaka la delu, Ne dia ohenyohenyo wʼutunyi?

¹⁰Dionyo diʼatunyi ami diatuyalaka uku yombo lu weka ami. Vo watumumbulaka tena tshe vati: Lendʼeli Unyashungu aye?

¹¹Utema ami, ukundi ambuyolembiama, Ukundi ambuyutshutshumala? Ulungamelaki le Unyashungu, Ne dia dimi layuwandula ntu; Ndi keli panda kami la Unyashungu ami.