Read tetala Esambu 56 Bible Online

Esambu 56 - tetala bible

Esambu 56

¹[52] Unyashungu li, umbuki ketshi, ne dia antu watulangaka mpotshahotshami. Nshi tshe, vo watolokaka la mi, watunsuyaka.

²Ee, atunyi ami watulangaka mpotshahotshami la lushi la lushi, Ne dia waku watolokaka la mi, weko efula,

³Dimi layukekamaka tena tshe lamʼemi la woma.

⁴Dimi latandulaka Unyashungu lu diui diandi, Latekamaka le ndi, handjuka woma. Keya antu ntshelami na?

⁵Nshi tshe, vo watufutanyaka aui ami, Watukanaka dia ntshelami kolo.

⁶Vo watusanganaka kame, Watushamaka, watolondaka wanya ami, Watunkungelaka dia ndjakami.

⁷Vo wayuhanda uma lu kolo kawo uka? Unyashungu li, uhandjuli antu lu kele kaye!

⁸We atalaka kendo yami, Udji asoi ami lʼolondo aye. Efula kawo kunfundama lu buku diaye uka?

⁹Lamʼatumukulelelaka, ku atunyi ami watukalulaka ekongokongo, Dimi mbeyaka dikambu ne, ne dia Unyashungu eko la mi.

¹⁰Dimi latandulaka Unyashungu la diui diandi, Ee, latutumbulaka diui dia Latuyalaka.

¹¹Dimi latekamaka le Unyashungu, handjuka woma. Keya untu ntshelami na?

¹²Unyashungu li, alaka wakamakulaki watashili. Dimi layukulambulaka elambu wa eukelu ka lusaka.

¹³We akatshungula lumu lami uma lu nyoi, We akashikike akaka ami watukoselo, Dia dimi nkendakenda lʼusasi a lumu la ntundu ka Unyashungu.