Read tetala Esambu 68 Bible Online

Esambu 68 - tetala bible

Esambu 68

¹Unyashungu, uneli, atunyi andi wadiangani! Waku watuhetshaka, walawo uma la ntundu kandi.

²Uwatshanya uku atufumbulaka lopepe dinga, Ee, uku atoleloka ulangi lu dja. Okone antu wa kolo washili ushiki la ntundu ka Unyashungu.

³Keli antu wʼololo wangenengene, Watumbuli Unyashungu, Ee, watamanya ngenangena.

⁴Nyimbeli Unyashungu esambu, Nyutumbuli lukumbu landi la esambu wa diandu. Nyolongoswele one latetetaka lʼesui wa shenga osese, Latuyalaka keli lukumbu landi, nyongenengene la ntundu kandi.

⁵Unyashungu ludjashi lu edjaselu kʼekila, Ndi keli shi ana wa ditshiki, La umbadi a wadi waki edu.

⁶Unyashungu katotshiyaka ona lukalemi lu khumbu. Ndi katutshungulaka asi lukanu, katuwaenyaka olo. Keli akanga wʼehedia watudjaseka lu kete ya shenga.

⁷Unyashungu li, lamʼakayatatshokaka la ntundu ka wudja aye, Lamʼakayakendakendaka lʼusui wa shenga,

⁸Kete yakadidima; Mvula yakatalokaka uma lʼulungu la ntundu ka Unyashungu. Ndu dikuna dia Sinai diakadidima lamʼakasukana Unyashungu[60] Ee, Unyashungu wa Isariyele.

⁹Unyashungu, we akalosha mvula efula. Lamʼakakomo wudja aye, we akakikitsha.

¹⁰Ului aye wa antu wakadjase lʼololo aye, We Unyashungu akakutsha ehumba wʼamenyi fono.

¹¹Khumadiondjo katukimoki didjangu. Ndi ului a wuki wakadidianganya vati:

¹²Khumi ya dikanga yʼelui wʼalimbi wambulawo, wambulawo li! Amantu wakatshikala la ngelu, wambukahanaka diango diawo,

¹³Kuyanga vo wakatshikala lʼatei wʼekutu wʼekoko Aha wa inga wakakumbama la fesa, La sala yato la paunyi kʼeleselese.

¹⁴Lamʼakadianganya Kanga-Wulu-Tshe khumi ya dikanga, Lungi lʼekama la tshitshi lakalo lu Zalamona.

¹⁵We ukungu a wulu, ukungu wa Bashana; We ukungu weli la ete wʼetali efula, ukungu wa Bashana!

¹⁶We ukungu weli la ete efula, ukundi atunyukaka ukungu Wakasonola Unyashungu dia mbidjase kandjema? Latuyalaka ayudjaseka loko pundju.

¹⁷Pusupusu ya nemo ya Unyashungu yeko nunu akumi ahendi, Ee, nunu nunu mbeyo. Khumesu eko lʼatei awo lʼetemwelo kandi uku akindi lu Sinai.

¹⁸We akambela lʼukungu wʼutali, atalombola fumbi, Atalungula eshasha uma le antu,[61] Ee, uma le akanga wʼuhedia dia Latuyalaka, Unyashungu ntudjase laawo.

¹⁹Khumadiondjo latutembelaka wetshu asu, atumbwami! Ee, Unyashungu keli panda kasu.

²⁰Unyashungu keli utshungudi asu, Latuyalaka, Khumadiondjo katutuhandjaka uma lu nyoi.

²¹Keli Unyashungu ayutunguya ete wʼatunyi andi puta, Ee, ete a waku watuyasemaka lu kolo yawo.

²²Khumadiondjo kata ati: Dimi layalombola uma la Bashana, Layakaluya uma lʼatei ashi a waki,

²³Dia nyu mbatshatsha la mbikamela dikila diawo lʼekulu, Ndu dia fo yanyu nduta emunyi wʼatunyi anyu.

²⁴Unyashungu li, vo watenaka wetetu aye. Ee, wetetu a Unyashungu ami, Ndu khumʼekanga kami, lamʼatundotoka lʼetemwelo.

²⁵Emimbi watutshokaka la ntundu ka ahumi wa dihumahuma watuyeli, Kame la esekaseka wʼamantu watuhumaka sese.

²⁶Nyutumbuli Unyashungu lu elui wʼantu a waki. Ee, nyu tukanula ta Isariyele, nyutumbuli Unyashungu.

²⁷Vo aku: Bendjamina luleki tshitshe lʼatei awo, aya umbuledi awo. Ewandji wa Juda la elui awo, Ewandji wa Zebuluna, la wa Nafetali.

²⁸Unyashungu aye katukukikitshaka. Unyashungu li, ushikike akambu wakayatutshela!

²⁹Ne dia etemwelo kaye keko la Jerusalema, Mbatukelaka khumi ya dikanga eshasha.

³⁰Uhangweli nyama yudjashi lʼatei a kombe, Limba la waumi wa ngombe yʼantu kame la ana ayo. Ukameli wane walanga nfutanya sambu kʼololo la falanga yʼulambu. Uhandjuli antu watongenangenaka lu ta.

³¹Edjulu wayi uma lʼEdjibitu. Etiyopia asimbuli anya andi utsha le Unyashungu.

³²Nyu waulelu wa la kete, nyimbeli Unyashungu esambu, Nyimbeli Khumadiondjo esambu wa diandu,

³³One latudjaseka ladiku diʼulungu a pundju, Katutaka diui diandi; diui diako wulu.

³⁴Nyutumbuli Unyashungu ne dia wulu andi! Lutumbu landi latahemelaka asi Isariyele, la wulu andi atenamaka lu wangi.

³⁵Unyashungu katutshaka akambu wa mamba lʼedjaselu kandi kʼekila. Unyashungu katukikitshaka wudja andi. Unyashungu atumbwami!