Read tetala Esambu 73 Bible Online

Esambu 73 - tetala bible

Esambu 73

¹Mete, Unyashungu atutshelaka asi Isariyele ololo, Ee, waku weli la etema a pudipudi.

²Ekulu ami wakahahoka, La akaka ami wakayangi nselo.

³Dimi lakuki dingalinga kandjema, Lamʼakamendaka lukulu lʼolo lakahumo antu wa kolo.

⁴Vo hawusuyama la kandji ka wulu, Watuyalaka la wulu tena tshe.

⁵Vo hawutenaka pa uku antu akina, Hawutusuwaka la kandji uku antu akina.

⁶Utaku awo atuyalaka uku dengalenga dialotawo lu kingu, Akambu awo a ngala watakumbaka uku dihondo.

⁷Ashu awo watulutaka la endelu kʼengonyi awo, Efula ka diango diawo ndekaka ne diakumbula etema awo.

⁸Vo watoteketaka akambu efula la djawudi, Watonyolaka antu, watutaka kashi ne dia nsuya antu.

⁹Vo watolokaka la Unyashungu la enyo awo, Watuyasemaka lʼatei a wa la kete la nimi yawo.

¹⁰Watenaka olo uma le wo, Haweyi vati: Atshi wa kolo mbewo.

¹¹Vo watumbwanaka vati: Ukundi ayeya Unyashungu dikambu ne? KhumʼUlungu la yimba uka?

¹²Enda antu wa kolo ane: Watenaka olo, watongonaka.

¹³Dimi lakalongosolaka utema ami olongosolalongosola, Lakayakimelaka ukimelakimela.

¹⁴Dimi lakadienaka wenena nshi tshe, La pindju tshe mbatumusuwaka usuwasuwa.

¹⁵Utunduyala dimi lakateketa okone, Tshiki lakatakanya anʼaye wa lolonga lone.

¹⁶Lamʼakamakani yimba dia nama dikambu ne fundu, Dio diakandeki wulu,

¹⁷Edja ndu lamʼakamoto lu luudu la Unyashungu, Mbakamayulimbitela ekumelu kawo.

¹⁸Mete, we atakitshaka lu mbuka yʼeselo, Atasukulaka utsha lʼelanyelu.

¹⁹Enda, wambulanyema shashimuya, Woma wa mamba wambuwanda.

²⁰Uku atukashimoka untu lamʼenandi do, Osoku mbayuyuhetsha ekishi kawo, We, Khumadiondjo lamʼayuyeto.

²¹Lamʼakakanana lumu lami, Ndu lamʼaki utema ami la lokonyo,

²²Dimi laki nginya kaha la yimba, Ndu laki uku nyama la ntundu kaye.

²³Keli dimi latuyalaka la ye nshi tshe, We atunkimelaka la yimba yaye,

²⁴Ku lʼokongo diku, we ayunkumia lu lutumbu laye.

²⁵Dimi la ukina lʼulungu uku we? Ndu lʼatei a wa la kete, nduku otoi latumulangaka uku we.

²⁶Dimba diami la utema ami watokomoka. Keli Unyashungu atukikitshaka utema ami, Ndi keli wulu ami pundju, pundju.

²⁷Enda, waku watunganelaka etali uma le ye, wayushisho. We akalanya waku tshe wakakoseke dia ntemola ditemolatemola.

²⁸Keli dia dimi nsukana lasuki la Unyashungu mbeli ololo. Dimi latushamaka le ye, we Khumadiondjo, Latuyalaka, Dia dimi nsanyiaka antu dia akambu aye tshe.