Read tetala Esambu 78 Bible Online

Esambu 78 - tetala bible

Esambu 78

¹Nyu asikami, nyuhukami olembe ami. Nyuhuke atui lu aui watumba uma lʼunyo ami.

²Dimi layufula unyo ami dia nyutela wela, Ndu layunyukela tukedi tʼedjedja,[72]

³Takatuki ndu teyasu, Takatusanyiaka washesu.

⁴Shu hatushe anʼawo akambu ane; Dimi layusanyiyaka lolonga layayi dia lutumbu la Latuyalaka, Wulu andi, ndu akambu wa mamba wakandatshaka.

⁵Ndi akashikike omenyi lu wudja wa Jakoba, Akadji olembe lu Isariyele, Wakandadjangela washesu Dia vo mbetsha anʼawo,

⁶Dia vo mbeyama le lolonga layayi, Ndu le ana wukuto. Lamʼayuwuyala dikumanyi, ku vo ndjusanyia anʼawo,

⁷Dia vo mbekama le Unyashungu, Aha mbuhela elimu andi, La dia vo nama elembe andi.

⁸Tawuyalaki uku washewo. Lolonga lʼehedia la etema a wulu, Lolonga laki kundjala la etema wʼusimbwi, La nyumu yekami le Unyashungu.

⁹Ana wa Efarayima wakose diango dia ta, wakembe eta awo. Keli lushi lakatumbi ta, vo wakalawo.

¹⁰Vo kunama sheki ya Unyashungu, Wakonyola elembe andi.

¹¹Vo wakuhela etsha andi, La akambu andi wa mamba wakandawaenyaka.

¹²Ndi akatshi akambu wa mamba lu ashu a washewo, Lu kete ya Edjibitu,[73] lʼusui wa Zoana.

¹³Ndi akatanya ashi wʼuduwa, akawaetsha laawo, Akemadia ashi uku eheli.[74]

¹⁴La yanyi, ndi akalombolaka la dingi; Ku lʼutshu tshe, la usasi wa dja.[75]

¹⁵Ndi akati ave lʼusui wa shenga, Akawasha ashi wa no efula uku wʼuma lʼeshima a waki.

¹⁶Ndi akatundja tokedi tʼashi uma lu dive, Akakedia ashi uku kushi[76]

¹⁷Keli vo wakakolamela mbutshela kolo, Wakatombokwela KhumʼUlungu lʼusui wa shenga.

¹⁸Vo wakahimbaka Unyashungu lʼetema awo, Lamʼakawalombe ma uku lulangu lawo.

¹⁹Vo wakangunangunela Unyashungu, Wakambwana vati: Unyashungu mbeyaka Ntolongoswela mesa lʼusui one wa shenga?

²⁰Enda, ndi akakomola dive, ku ashi wakatumbi, Ku akeledu wakakelanela. Ndi la wulu wa mbisha wudja andi ma, Kana mbasha unatshi?

²¹Latuyalaka akuki, ku ndi akumala; Dja yakahetela Jakoba, La kele kandi kakafulanela uisha le Isariyele,

²²Ne dia vo kumbetawo Unyashungu, Kuyanga nungamela panda kandi.

²³Ndi akadjangela wangi, Akadihula asuku wa lʼulungu.

²⁴Ndi akaioshiya mana ya vo nde, Akawasha mbu ya nde yʼuma lʼulungu.[77]

²⁵Untu tshe akalekaka ma diʼuma lʼulungu. Ndi akatumela ma efula diakawalutaka.

²⁶Ndi akapepia lopepe uma lʼehutwelu ka unya, La wulu andi mbakandela lopepe uma la diku dia kushi.

²⁷Ndi akaloshiya unatshi efula uku ditshu, Ndu fudu uku losenga la lʼumamu wʼashi a waki.

²⁸Ndi akakoshiyakayo lʼatei a pangu kawo, Lʼutshimba tshe wa mvudu yawo.

²⁹Osoku mbakawalekaka, mbakawalutaka akundju too. Unyashungu akawasha kene kakawalangaka.

³⁰Vo kumunduyaka saki kawo. Lamʼaki ekama wa ma weki kʼenyo awo,

³¹Kele ka Unyashungu kakayi le wo; Akadiaki waku waki la alimba a wulu, Akasuya elongo wʼapami wʼasi Isariyele.[78]

³²Kuyanga mbakayala akambu ane tshe, vo wakatetemala ntsha kolo, Kumbetawo akambu wa mamba wakandatshaka.

³³Okone uma lu dinginya diawo, mbakandasusi nshi yawo, Ndu akaludia deku diawo lʼehenyohenyo.

³⁴Lamʼakandadiakaka, mbakawuyangaka. Vo wakakalula, wakayangi Unyashungu lʼutema otoi.

³⁵Ku vo wakuho vati: Unyashungu keli dive diawo, Unyashungu, KhumʼUlungu, keli utshungudi awo.

³⁶Keli vo wakudimbiyaka lʼenyo awo, Wakawutelaka kashi la nimi yawo,

³⁷Ne dia etema awo kombekamaka le ndi,[79] Ndu vo kundjala la kolamelu lu daka diandi.

³⁸Keli ndi akawauki ketshi, Akadimanyia kolo yawo, Kumbadiaka. Tena efula, ndi akayakimela lu kele kandi, Kundeka mvudunganela la kele.

³⁹Ndi akuho ati: Emunyi etu mbewo, Uku lopepe latetaka, ku halukalula ntu.

⁴⁰Ndi tena efula diakawotombokwelaka lʼusui wa shenga li! Ndi tena efula diakawuhindjaka utema lʼusui wa shenga li!

⁴¹Wakatetemala mpimba Unyashungu, Wakadji lʼEkila lʼlsariyele tofwefwe.

⁴²Vo kumbuho lunya landi, Kuyanga lushi lakandatshungula uma le atunyi.

⁴³Vo kumbuho tulimbitelu ta mamba takandatshi lʼEdjibitu, Ndu akambu wa mamba wakandatshi lʼusui wa Zoana.

⁴⁴Ndi akakadimula ashi wa kushi yawo dikila. Okone vo kumbeya no ashi uma lu tokoko tawo.[80]

⁴⁵Ndi akatumela tshingu momamoma[81] yakalumata, Ndu ekole[82] wakalanya.

⁴⁶Ndi akasha eto wa konabi dinela dia dikambo diawo, Ndu endjo diango diakawangonya lu dikambo diawo.[83]

⁴⁷Ndi akalanya ekodi awo wʼelua la ngimbi ka mboko, Ndu etamba awo wʼelua la mboko ya waki.

⁴⁸Ndi akadiaki ngombe yawo la ngimbi ka mboko, Ndu ekoko awo la ndjadi.[84]

⁴⁹Ndi akawauki kele ka mamba, Yenyi, ududu, la etshuku, ului wʼakendji wʼelanyelu.

⁵⁰Ndi akalongoswela kele kandi mbuka. Ndi kumpandja nyumu yawo uma lu nyoi. Keli ndi akadiaki lʼelandu.

⁵¹Ndi akadiaki ana tshe wa nundu lu Edjibitu,[85] Ana wa nundu wʼuma lu mvudu ya Hama.

⁵²Keli ndi akatundja wudja andi uku ekoko, Akalombola lʼusui wa shenga uku limba la dungalunga.[86]

⁵³Ndi akalombola ololo, vo kumbuka woma. Keli uduwa akaditsha atunyi awo.[87]

⁵⁴Ndi akalombola uya lʼumamu wa dihuli diʼekila,[88] Ee, utsha lʼukungu uku akandakundja la lunya landi la pami.

⁵⁵Ndi akatshanya wedja la ntundu kawo,[89] Akawasha kete sangu, Akadjasha waunu wa Isariyele lu ahuli awo hita.

⁵⁶Vo wakatahimbaka Unyashungu, KhumʼUlungu, wakatawudjaka tofwefwe,[90] Kunkitanyia adjangu andi.

⁵⁷Vo wakangana etali, ndu wakayala la uhedia uku aki washewo, Wakekeko uku luhitu laha la loteka.

⁵⁸Vo wakawukia kele lu temwelo diawo dia lu alunga, Wakawukia kandjema la dikishi diawo.

⁵⁹Lamʼakuki Unyashungu dikambu so, ndi akumala, Akenge Isariyele diengekhu dia wulu.

⁶⁰Okone ndi akaseke luudu landi lʼotemwelo la la Shilo, Luudu la dipema, lene akandadjaseka lʼatei wʼantu?[91]

⁶¹Ndi akakimo wulu andi lu fumbi, La lutumbu landi lu anya wʼutunyi.[92]

⁶²Ndi aketawo wudja andi ndjakema la yombo, Akuki ukito wʼetshoko andi kele.

⁶³Dja yakatshumbi elongo awo wʼapami, Ku esekaseka awo wʼamantu kumbeya ntshukama.

⁶⁴Elombedi awo wakadiakema la yombo. Wadi waki edu lʼatei awo, kumbeya ndela.

⁶⁵Khumadiondjo akakashimo uku untu laki uma lu djo, Uku untu a wulu kahangohango ne dia edjwelu ka wanu.

⁶⁶Ndi akakaluya atunyi andi ekongokongo, Akawautsha sonyi pundju.

⁶⁷Ndi akatuni wa lu luudu la Josefu, Ndu ndi konsonola diuhu dia Efarayima.

⁶⁸Keli ndi akasonola diubu dia Juda, Ukungu wa Siona, wakandalangaka.

⁶⁹Ndi akahiki luudu landi lʼotemwelo uku ulungu wa ladiku, Uku kete yakandahiki pundju.

⁷⁰Ndi akasonola ukambi andi Davidi, Akaweti uma lʼekutu wʼekoko.

⁷¹Lamʼakandatayelaka wali wʼekoko lʼanʼawo, mbakandawose, Dia ndjala ulami wa Jakoba, wudja andi, Ndu Isariyele, ukito wʼetshoko andi.[93]

⁷²Ndi akalamaka uku aki uluwanyi wʼutema andi, Akalombola la komba.