Read tetala Esambu 89 Bible Online

Esambu 89 - tetala bible

Esambu 89

¹[105] Dimi layimbaka nshi tshe dia ngandji ka shikaa ka Latuyalaka. Unyo ami ayusanyiyaka nonga tshe dia kolamelu yaye,

²Ne dia dimi lakati nti: Ketshi kayushikikalaka pundju. We ayushikike kolamelu yaye lʼulungu.

³Dimi lakadji la osonwami ami sheki. Dimi lakatshibela ukambi ami Davidi okone nti:

⁴Dimi layushikike tukanula taye pundju, Layukitsha kiti kaye ka diulelu lu lolonga la lolonga.[106]

⁵We Latuyalaka, ulungu atandulaka akambu aye wa mamba, Ndu kolamelu yaye lu lusanganya lʼekilami aye.

⁶Akona eli lʼulungu, ledimi la Latuyalaka? Ndu lʼatei ana wa lʼulungu, akona ufanyi la ye?

⁷Ndi keli Unyashungu, katukamaka woma utamanya le ului wʼekilami. Ndi katolemiamaka ndeka wane tshe wudingi.

⁸We Latuyalaka, Unyashungu Kanga lulimbilimbi, akona eli la wulu uku we? Kolamelu yaye yatukudingaka kwi.

⁹We atulelaka ashi a waki. Lamʼatunelaka asukhu a wulu, we katalembohayaka.

¹⁰We akatshatsha Edjibitu betshi betshi uku udu, Akadianganya atunyi aye la lunya laye la wulu.

¹¹We kukanga ulungu la kete, We kakatungi andja tshe ndu tshe keli loko.

¹²We kakatungi ngele ndu diku dia kushi. Ekungu wa Tabora la Heremona watongenangenelaka lukumbu laye.

¹³We keli la lunya la wulu, Etambi kaye ka wulu, ka lunya la pami, kambediama utsha ladiku.

¹⁴Sambu kʼololo la uluwanyi weli ekitshelu ka kiti kaye ka diulelu. Ngandji kaye ka shikaa la mete watutshokaka la ntundu kaye.

¹⁵Antu watulimbitelaka pungi kʼotemwelo, weli la ongenongeno. We Latuyalaka, vo watokendakendaka lʼusasi wʼelundji kaye.

¹⁶Vo watongenangenaka lu lukumbu laye nshi tshe, Watutumbwamaka lu sambu kaye kʼololo.

¹⁷We keli lutumbu la wulu awo. Uma lʼetshoko aye mbatufulaka wulu asu.

¹⁸Latuyalaka keli kanga engawu kasu, LʼEkila la Isariyele keli kanga khumʼekanga kasu.

¹⁹We akateketa lʼukilami aye lʼenelo wati: Lakalimbe kanga wulu dembo dia kusu, Lakambiya one lakasonwama uma lʼatei wʼantu.

²⁰Dim lakasonola ukambi ami Davidi[107] Lakukiti iso kami kʼekila.[108]

²¹Etambi kami kayusukulaka, Ndu lunya lami layukikitsha.

²²Utunyi heyi mbohotola diango, Ndu untu a kolo heyi mbusuya.

²³Dimi layuhandjulaka atunyi andi uma la ntundu kandi, Layudiaka waku watuhetshaka.

²⁴Keli kolamelu yami la ngandji ka shikaa wayuyalaka la ndi. Uma lu lukumbu lami mbayediamaka wulu andi.

²⁵Dimi layahe lunya landi ladiku dia ashi a waki, Ndu lunya landi la pami ladiku dia ndjali.

²⁶Ndi ayundelelaka ati: We keli Papa, Unyashungu ami, la dive tha panda kami.

²⁷Dimi layuwete onʼenundu, Luleki khumi ya dikanga tshe ya la kete.[109]

²⁸Layulamelaka ngandji kami ka shikaa pundju, Layushikike daka diami le ndi.

²⁹Dimi layete tukanula tandi pundju, Ndu kiti kandi ka diulelu kayutshikalaka pundju.

³⁰Naka an anc wayuhedia olembe ami, Ndu aha nkendakenda lu adjangu ami,

³¹Naka vo wayuhendula adjangu ami Ndu aha nama elembe ami,

³²Ku dimi layakomola lʼukalimba ne dia ehedia awo, Ndu mbala ne dia kolo yawo.

³³Keli dimi haminyaki ngandji kami ka shikaa tshe, Kuyanga minya kolamelu yami tshe uma le ndi.

³⁴Dimi hananyaki daka diami Kuyanga nkadimula diui diakatumbi uma lʼunyo ami.

³⁵Etena otoi kakamatshibi lʼekila kami nti: Hamvutelaki Davidi kashi.

³⁶Tukanula tandi tayuyalaka pundju; Ndu kiti kandi ka diulelu uku unya la ntundu kami.

³⁷Kiti kako kayushikikala pundju uku ngondo, Omenyi wa kolamelu lʼulungu.

³⁸Keli we akuki one lakayakiti iso kele, Akoseke, akutuni, akusukula.

³⁹We ukonyola sheki yakayadji lʼukambi aye, Akahotshahotsha dembo diandi dia kusu la kete.

⁴⁰We akahandjula peli dia lukumbu landi tshe, la ngelu kandi, Akalanya ngeli yandi.

⁴¹Ambetshetshi tshe watohotolaka diango. Ndi ambuyala engo ka dionyo le asukanyi andi.

⁴²We akunyiya lunya la pami la atunyi andi, Akangenyangenya atunyi andi tshe.

⁴³We akakaluya pemo ka yombo yandi ekongokongo, Kumbusukela lu ta.

⁴⁴We akanya ngaingai kandi, Akakadja kiti kandi ka diulelu la kete.

⁴⁵We akondja nshi yandi yʼolongo a pami, Akawutsha sonyi.

⁴⁶Latuyalaka li, ukundi? We ayuyasheka pundju? Kele kaye kayohetaka uku dja utu?

⁴⁷Uhoki uku eli lumu lami tshinyitenyi. Mete, we akatungi antu tshe la nyumu ya tshinyitinyi.

⁴⁸Untu omotshi eko, lukuki numba, ku aha mena nyoi? Eya nshimbela lumu landi uma lu Dihuli diʼEdu na?

⁴⁹Khumadiondjo li, lendʼeli ngandji kaye ka ntundu, Kakayatshibela Davidi lu kolamelu yaye?

⁵⁰Khumadiondjo, uho dionyo dionyolawo ekambi aye, Uhoki efula ka dionyo diʼuma le antu tshe, diatuyalaka lu tulu kami.

⁵¹We Latuyalaka, uhoki tengo yʼatunyi aye, Yakawatenge one lakayakiti iso lʼote.

⁵²Latuyalaka atumbwami pundju! Ayali osoku! Ayali osoku!