Read tetala Tukedi 1 Bible Online

Tukedi 1 - tetala bible

Tukedi 1

¹Tukedi ta Solomona,[1] onʼa Davidi, khumʼekanga ka Isariyele:

²Dia antu nimbitela yimba ndu wetshelu, Mana aui wa yimba fundu,

³Mbetshama lu yimba yʼuluwanyi, Lu akambu wʼololo, wʼusimbwi, ndu waha la shonodi;

⁴Dia mbisha antu kʼantu ewu, Ndu dongolongo yimba la ewu,

⁵Ndu pami ka yimba mpukama, la mpama lu wekelu, Dia one leli tshundju akundja ewu,

⁶Dia nimbitela yukedi la kitshimudi, Aui wʼakanga a yimba ndu wako awo.

⁷Woma wa Latuyalaka mbeli etatelu ka yimba.[2] Keli akanga a dinginya watutunaka yimba la wetshelu.

⁸Onʼami, ulungi wetshelu wa sho, Tutunaki alaku wa nyo.

⁹Wetshelu ako mbayuyala uku dembo dia kusu dia ngandji lʼote aye, Ndu uku elengalenga ka molola lu kingu kaye.

¹⁰Onʼami, naka antu wa kolo wayukonga, Tetawoki.

¹¹Naka vo wayukutela vati: Yeti tutshu, tutukungi antu dia mbadiaka, Tambi one laha la unungu djunga wamamba;

¹²Tamene esudia wasena, uku atomenaka udimu antu, Vo tshe etundu etu, uku wane watuwuhuluyaka utsha lu Dihuli diʼEdu;

¹³Shu tayutana wehu tshe wa diango diʼushinga a wulu, Tayuludia mvudu yasu la diango dia lohotola;

¹⁴Uyali lʼului asu, Ku diango diasu tshe diayuyala usanga,

¹⁵Onʼami, tokendakendaki kame la wo lu mbuka. Usike lukulu laye uma lu mbuka kawo,

¹⁶Ne dia ekulu awo watulawoka utsha lu kolo, Watusamanyaka dia ntutundja dikila.

¹⁷Mete, wamamba mbatuwambaka otei La ntundu ka fudu.

¹⁸Wane watotokiyaka waku wuto la wo, Watambaka nyumu yawo tulunga.

¹⁹Osoku mbeli etshelu kʼuntu tshe leli la lukaki, Etshelu kako katulanyaka lumu la kanga to.

²⁰Yimba yatulelaka lu esese, Yatuhangohangoka lu aseke.

²¹Yo yatulelaka lu ahuli watusanganaka antu, Yatuhangohangoka lu eotwelu kʼusumba ati:[3]

²²Nyu tuleli, etena kakona kayunyukimo nanga akambu wa djeli? Etena kakona kayukimo amonyodi ndjangenyangenya lu akambu wa dionyo? Etena kakona kayukimo dipoka ntuna akambu wa yimba?

²³Ukadimo lu ehanguhangu ami! Enda, dimi layukutshulwela yimba yami, Layukulimbitshiya aui ami.

²⁴Dimi lakanyeti keli nyu nyakatuni; Dimi lakasimbula lunya lami, ku nduku untu aketawo.

²⁵Keli nyu kumbeya daku diami tshe, Ndu nduku untu aketawo luhangu lami.

²⁶Ndu dimi layukola lu lushi laye lʼasui. Dim layukosoka lamʼayuyuka woma.

²⁷Lamʼayuya woma a wuki le ye uku ngimbi, Lamʼayunyudinga elanyelu uku punganendji, Ndu lamʼayuya fono la asui le nyu.

²⁸Vo wayumbeta, ku dimi haluwaetawo; Wayunyanga wulu, ku hawomena.

²⁹Vo wakatuni yimba, Konsonola dia mbuka Latuyalaka woma.

³⁰Vo kunanga aui ami, Wakanyola luhangu lami.

³¹Osoku mbayuwole elua wʼetsha awo, Mbayuwulutshama la tukanyi tawo hita.

³²Ne dia lunyu la tuleli layadiaka. La utshatsha wa dipoka wayalanya.

³³Keli untu layumbukela, ayushikikala, Ayutshikala la ki, aha mbuka nduku kolo woma.