Read tetala Tukedi 10 Bible Online

Tukedi 10 - tetala bible

Tukedi 10

¹Ona leli la yimba, atongenyangenyaka shi. Keli one lʼenginya atunyangiaka nyangu.

²Ekundjelu kʼuma lu akambu wa kolo kema la waho. Keli sambu kʼololo katushimbelaka untu uma lu nyoi.

³Latuyalaka hetawo untu ololo mvo la ndjala. Keli ndi atutunaka lukaki lʼuntu a kolo.

⁴Kanga nende lʼulimu katuyalaka wula. Keli one latukambaka lʼeteti, atongonaka.

⁵One latumbaka diango lu nshi yʼowo, eli kanga yimba. Keli one latulalaka djo lu nshi ya dinela, atutungaka sonyi.

⁶Etshoko watuyalaka lʼote wʼuntu ololo. Keli ngala katukumbaka unyo wʼuntu a kolo.

⁷Euhwelu kʼuntu ololo keli otshoko. Keli lukumbu lʼuntu a kolo layuhamela.

⁸One leli la utema a yimba, ayetawo elembe. Keli one leli enginya la eyokayoka, ayushisho.

⁹One latukendakendaka aha la lukesu, atokendakendaka ololo. Keli one latufutanyaka mbuka yandi, ayushwama.

¹⁰One latumamiyaka su, atutungaka lunyangu. Keli one leli enginya la eyokayoka, ayushisho.

¹¹Unyo wʼuntu ololo eli eteko ka lumu. Keli ngala katukumbaka unyo wʼuntu a kolo.

¹²Luhetshu inbatutungaka ta. Keli ngandji katukumbaka munga tshe.[15]

¹³Yimba yatutanemaka lʼelomo wa kanga ewu. Keli ohehela atuyalaka, ne dia one laha la yimba.

¹⁴Akanga a yimba watumbaka ewu. Keli unyo wa kanga enginya watusukanyaka elanyelu.

¹⁵Ukundji eli usumba a wulu le kanga ongonyi. Keli wula wʼasi wula mbeli elanyelu kawo.

¹⁶Ulimu wʼuntu ololo watukundjiyaka lumu. Waho wʼuntu a kolo watotolaka lu kolo.

¹⁷One latuhukamaka wetshelu, eko lu vuka ya lumu. Keli one latutunaka luhangu, atunganelaka.

¹⁸One latusheka luhetshu lʼutema, eli la lulimi la kashi, One latumamanyiaka, eli enginya.

¹⁹Lu elula kʼaui, kolo keko. Keli untu latulamaka elomo andi, eli kanga yewo.

²⁰Lulimi lʼuntu ololo eli fesa ka losonola. Keli utema wʼuntu a kolo kema ushinga a wulu.

²¹Elomo wʼuntu ololo ndeshaka antu efula. Keli akanga a dinginya watuvokaka ne dia uhumba a yimba.

²²Otshoko wa Latuyalaka mbatongonyayaka. Ndi hataheka lunyangu ladiku diawo.

²³Dia ntsha kolo eli uku tokenyo le kanga enginya. Keli kanga yimba atongenangenaka dia ntsha ololo.

²⁴Akambu watukaka untu a kolo woma, vo mbatukumaka le ndi. Keli antu wʼololo wayulungula kene kalangawo.

²⁵Uku atetaka punganendji, mbatushishoka untu a kolo. Keli untu ololo atushikikalaka pundju.

²⁶Uku atuyalaka okeke lu anyu, la edinga lu ashu, Mbatuyalaka kanga nende le waku wakutumi.

²⁷Woma wa Latuyalaka watufudiaka nshi. Keli deku diʼantu wa kolo diatususamaka.

²⁸Elungamelu kʼuntu uluwanyi keli ongenongeno. Keli ekungelu kʼuntu a kolo keko anyanya.

²⁹Mbuka ka Latuyalaka keli lungeli le untu lʼusimbwi. Keli to keko elanyelu le atshi wa kolo.

³⁰Untu ololo hamoki pundju. Keli antu wa kolo hawutshikalaki la kete.

³¹Unyo wa untu ololo watutungaka yimba. Keli lulimi la kolo layuhimbwama.

³²Elomo wʼuntu ololo mbeyaka akambu weli uluwanyi. Keli unyo wa untu a kolo weli kolo ketu.