Read tetala Tukedi 15 Bible Online

Tukedi 15 - tetala bible

Tukedi 15

¹Nkaluya diui la memakana atutshutshaka kele. Keli diui dia wulu diatufudiaka kele.

²Lulimi la kanga yimba atutaka ewu ololo. Keli unyo wa kanga enginya watutundjaka aui wʼenginya.

³Ashu wa Latuyalaka weko lu ahuli tshe, Watendaka antu wa kolo ndu antu wʼololo.

⁴Lulimi la memakana eli utamba a lumu. Keli lulimi lʼutundjatundja latuhumuyaka utema.

⁵Kanga enginya atonyolaka wetshelu wa shi. Keli one iatuhukamaka luhangu, atukundjaka ewu.

⁶Diango efula diatuyalaka lu luudu lʼuntu ololo. Keli ohenyohenyo atuyalaka lu ekundjelu kʼuntu a kolo.

⁷Elomo wa kanga yimba watudianganyaka ewu. Keli utema wa kanga enginya hawusimbwi.

⁸Ulambu wʼuntu a kolo weli wononyi le Latuyalaka. Keli dombelo diʼuntu lʼusimbwi diatongenyangenyaka.

⁹Mbuka kʼuntu a kolo keli wononyi le Latuyalaka. Keli ndi atulangaka one latuyelaka akambu wʼololo.

¹⁰Luhangu la wulu latuyalaka le one latumoka lu mbuka. La one latutunaka luhangu, ayuvo.

¹¹Dihuli diʼEdu la elanyelu weko la ntundu ka Latuyalaka. Keli etema wʼantu mbuleki menama le ndi.

¹²Kanga losoko hatulangaka untu mbamia. Ndi hatutshokaka le kanga yimba.

¹³Utema wʼongenongeno ateteka elundji ngaingai. Keli ulingulingu mbatulanyaka utema.

¹⁴Utema a kanga yimba atuyangaka ewu. Keli kanga enginya atongenangenaka lu akambu wʼenginya.

¹⁵Nshi yʼomenyi fono tshe yatuyalaka kolo. Keli one leli la utema wʼongenongeno, atuyalaka la dambu diahashili.

¹⁶Ndjala la diango tshitshe, kame la woma wa Latuyalaka, Ambuleka ndjala la ukundji efula, kame la ohenyohenyo ololo.

¹⁷Dia nde djese lamʼeli ngandji, Ambuleka unatshi wa ngombe lamʼeli luhetshu ololo.

¹⁸Kanga kele atufudiaka lundju. Keli one lahatukaka kele esadi, atushimbaka ta.

¹⁹Mbuka ka kanga nende eli uku lukumbu lʼatende. Keli mbuka kʼuntu lʼusimbwi katuyalaka bamubamu.

²⁰One leli la yimba, atongenyangenyaka shi. Keli kanga enginya atonyolaka nyangu.

²¹Akambu wʼenginya watongenyangenyaka one laha la yimba. Keli kanga yimba atusimbulaka mbuka kandi.

²²Lamʼaha ului wʼandaki, sangweyu diatufutanaka. Keli lamʼeli andaki efula, dio diatushikikalaka.

²³Ekadimwelu ka aui wʼololo wʼuma lu unyo wʼuntu katongenyangenyaka. La dia mvuta diui diukuki mvutama, eli ololo eiuia.

²⁴Le kanga yimba, mbuka ka lumu katelelaka utsha ladiku, Dia ndi mumo uma lu Dihuli diʼEdu dieli lʼesi.

²⁵Latuyalaka ayunyukula luudu la kanga utaku. Keli ndi ayushikike elelu wa wadi aki udu.

²⁶Sangweyu dia kolo dieli wononyi le Latuyalaka. Keli aui wʼantu wa pudipudi watuyalaka ololo.

²⁷Kanga lukaki atohenyahenyaka luudu landi. Keli one latuhetshaka mbu yʼutshu, ayuyala la lumu.

²⁸Kanga utema wʼololo atukanaka yimba dia nkaluya diui. Keli unyo wʼuntu a kolo atutundjaka akambu wa kolo.

²⁹Latuyalaka eko etali uma le untu a kolo. Keli ndi atulungaka dombelo diʼuntu ololo.

³⁰Elundji kʼongenongeno atongenyangenyaka utema, La kumu yʼololo yatukeketshaka weka.

³¹Tui diatulungaka alaku wa lumu Diatuyalaka lʼatei akanga a yimba.

³²One latutunaka wetshelu, atonyolaka utema andi, Keli one latuhukameka luhangu, atukundjaka yimba.

³³Woma wa Latuyalaka, eli wetshelu wa yimba. La ndjakitshakitsha atuyalaka la ntundu ka lutumbu.