Read tetala Tukedi 17 Bible Online

Tukedi 17 - tetala bible

Tukedi 17

¹Ma diʼuhumba lamʼeli ki, Ndeka luudu luludi too lʼunatshi lamʼeli lundju ololo.

²Ukambi watukambaka la yimba, ayulela onʼa khumendi latutshaka akambu wa sonyi. Ndu ndi ayusangula diango diʼukito lʼatei wʼanangu.

³Puki keko dia ndelola fesa, khuka ka ntshula paunyi. Keli Latuyalaka katediaka etema.

⁴Utshi a kolo atuhukamaka aui uma lʼelomo wa kolo; La kanga kashi atulungaka aui wa lulimi la kanga usihi.

⁵One latosokaka usi wula, atotengaka Utungi andi; La one latongenangenaka lu asui awo, ayusuyama.

⁶Ekana weli dembo dia kusu diʼesumbi, Ndu wali weli lutumbu lʼanʼawo.

⁷Aui wʼololo hawututumbaka uma lʼunyo wa kanga enginya; La elomo wa kashi hawusungana le untu a wuki.

⁸Mbu yʼutshu yeli uku lowoko lʼushinga a wulu lu ashu wa one latuyikimoka. Lu ahuli tshe watundutshokaka, yo yatunumuyaka lukulu lʼolo.

⁹One latukumbaka munga atuyangaka ngandji. Keli one latukiuhulaka lu asawu andi, atatanyaka engenyi a wulu.

¹⁰Luhangu etena otoi le kanga yimba, atuluwanyaka Ndeka dikomoki tena lukama le kanga enginya.

¹¹Untu a kolo atuyangaka ntomboko tshu. Okone vo wayutumela dikendji dia ngala.

¹²Mpumana la koi kohotodiwo anʼandi Ndeka mpumana la kanga enginya lʼenginya kandi ololo.

¹³Le one latukaluyaka kolo lu ololo, Kolo hamoki uma lu luudu landi.

¹⁴Ntatela tamu eli ntundula ushu a tshitshe lu kungi. Okone ukimo tamu ntundu to tatayala wulu.

¹⁵Untu latuyindjaka untu a kolo, la one latamiaka untu laha la unungu, Vo ahendi weli wononyi le Latuyalaka.

¹⁶Falanga lʼanya a kanga enginya, mbeyaka mbukimanyia dia nsumba yimba Lamʼahandadji utema loko uka?

¹⁷Ongenyi atukaka untu ngandji tena tshe. Ndu lu nshi ya pa ndi atuyalaka uku onangu.

¹⁸Untu laha la yimba atukimoka alaka esadi, Atuyakimoka usungi la ntundu ka unyandi.

¹⁹One latulangaka akambu wa kolo, atulangaka ta, La one lateteka suku diandi hwe, atuyangaka elanyelu.

²⁰Kanga utema wambunganela hatutanaka diese, Ndu kanga lulimi la kashi atokokaka lu asui.

²¹One luta enginya, atuyatungelaka lunyangu. Shi kanga enginya hatuyalaka la ongenongeno.

²²Utema wʼongenongeno eli ukanga wʼololo. Keli ulingulingu atumiaka weka.

²³Untu a kolo atulungulaka mbu yʼutshu Dia nanya elumbwelu kʼololo.

²⁴Yimba yatuyalaka la ntundu ka kanga ewu. Keli ashu wa kanga enginya watendaka wendenda lu kumu ya kete.

²⁵Ona lʼenginya atunyangiaka utema wa shi, Atuyalaka ululu le nyangu lakawuti.

²⁶Kema ololo nsuya untu laha la unungu, Kuyanga nkomola antu a waki ne dia akambu awo wʼusimbwi.

²⁷One latuyakimelaka lu aui andi, eli kanga yimba; La one lahatukaka kele esadi, eli kanga ewu.

²⁸Ndu kanga enginya lamʼatundolembohalaka, atalemaka lʼonongo wʼakanga a yimba. Ndu lamʼatundudihaka elomo andi, ndi atalemaka kame lʼakanga a bewu.