Read tetala Tukedi 18 Bible Online

Tukedi 18 - tetala bible

Tukedi 18

¹One latuyatulaka uma le antu akina, atuyangaka paka lulangu landi lutu, Atutshanaka la akanga a yimba tshe.

²Kanga enginya hatongenangenaka dia nkundja yimba. Keli ndi atongenangenaka paka dia menya antu tukanyi tʼutema andi.

³Lamʼatuyakaka kolo, katuyakaka ndu dionyo, Ndu lamʼatuyalaka sonyi, katenamaka ndu lotengo.

⁴Aui wʼunyo wʼuntu weli ashi wa dingunda. Eteko ka yimba eli uku okedi wa nkela.

⁵Kema ololo mbekama untu a kolo, Dia munganyia untu ololo lʼelumbwelu.

⁶Elomo wa kanga enginya watotoka lu lundju, La unyo andi watutungelaka dikomoki.

⁷Unyo wa kanga enginya watutungelaka elanyelu. La elomo andi weli djunga ya lumu landi.

⁸Aui wa kanga sedisedi weli uku ma dia mpe, Diatuhuloka kʼesi utema.

⁹One latuyalaka nende lʼulimu, Eli onangu ulanyishi.

¹⁰Lukumbu la Latuyalaka eli etangelu ka wulu. Untu ololo atulawoka atushamaka loko.

¹¹Ukundji eli usumba a wulu le kanga ongonyi. Vo weli eheli kʼave kʼutali lu tukanyi tandi.

¹²La ntundu kʼelanyelu utema wʼuntu atuyambiyaka. Keli ndjakitshakitsha atuyakaka la ntundu ka nemo.

¹³Le untu latukadimulaka diui ntundu ndi atuki dikambu, Ekadimwelu kandi katuweteka enginya ndu katuwutshaka sonyi.

¹⁴Lumu lʼuntu latusukelaka lu kandji. Keli ayeya nkikitsha lumu naka lo lambuheko na?

¹⁵Utema a kanga yimba atukundjaka ewu, Ndu tui dia kanga yinba diatuyangaka ewu.

¹⁶Ushasha wʼuntu atokokwelaka mbuka, Atukumiaka la ntundu kʼantu a waki.

¹⁷One latoteketaka ntundu atuyayindjaka. Keli lamʼaya unyandi, ndi ayuwushula.

¹⁸Ukulu atushidiyaka tamu, Ndu atusambulaka akanga a wulu.

¹⁹Dia mbekesanyia anangu weli la etema a wulu ndeka nembia usumba wulu. Tamu tawo tatuyalaka uku tukingiti ta mbulu ta lu luudu la wuki.

²⁰Dikundju dia untu diatulutaka uma lʼelua wʼunyo andi, La dinela diʼelomo andi mbatundulutaka.

²¹Lu wulu wa lulimi katuyalaka nyoi ndu lumu, La waku watululangaka, wayole elua uma loko.

²²One latukundjaka wadi, atuyalaka la diese, Ndu atenaka olo le Latuyalaka.

²³Usi wula atoteketaka lʼosengosengo. Keli kanga ongonyi atukaluyaka aui la ngala.

²⁴One leli la engenyi efula, atulanyemaka uma le wo. Keli ongenyi omotshi ndeka onangu mbekesanela la untu.