Read tetala Tukedi 19 Bible Online

Tukedi 19 - tetala bible

Tukedi 19

¹Ndjala usi wula latokendakendaka ololo, Ndeka ndjala enginya latoteketaka aui wa kolo lʼelomo andi ololo.

²Ndjala aha la ewu kemaololo, La one latusamanyaka esadi esadi atunganelaka uma lu mbuka.

³Enginya kʼuntu katulanyaka akambu andi. Ku ndi atukaka Latuyalaka kele.

⁴Ongonyi atukundjiyaka untu engenyi efula. Keli ongenyi wa usi wula atosekaka.

⁵Omenyi a kashi huyala aha la asui, La one latutaka kashi huhanda.

⁶Antu efula watuyangaka ololo le kanga lukahu. Ndu antu tshe watulangaka ndjala la one latukahaka eshasha engenyi.

⁷Anangu tshe wa usi wula watuhetshaka. Ku engenyi andi hawuleki mangana etali uma le ndi uka? Ndi atayelaka la aui wʼosengosengo, keli vo watushishoka.

⁸One latukundjaka yimba, katulangaka utema andi; La one latulamaka ewu, atuhumoka lukulu lʼolo.

⁹Omenyi a kashi huyala aha la unungu; La one latutaka kashi ayulanyema.

¹⁰Hasungana dia kanga enginya mena olo. Hasungana dia fumbi mbulela ewandji nduku yema.

¹¹Untu leli la yimba hatukaka kele esadi; Ndu mbuhela kolo kakawutshela, eli lutumbu landi.

¹²Kele ka khumʼekanga eli uku dikita dia tambwe. Keli diandu diandi diatuyalaka uku dihohe diatahemaka lʼadiyu.

¹³Ona lʼenginya atuyalaka elanyelu ka shi. Ndu lundju la wadi leli uku mvula ka vwa vwa kahahimbo esadi.

¹⁴Antu watukitaka luudu lʼongonyi uma le washewo. Keli wadi leli la yimba eli ushasha uma le Latuyalaka.

¹⁵Nende atuladiaka antu djo ya wulu; La untu lahakambi ulimu atukaka ndjala.

¹⁶One latulamaka elembe, atulamaka utema andi. Keli untu lahatulamaka mbuka yandi, ayuvo.

¹⁷One latukaka usi wula ketshi, atosondjaka Latuyalaka diango, Ndi ako layufuta uku ololo wakandatshi.

¹⁸Uhangwelaki onʼaye lamʼeki elungamelu, Tetawoki ndi nana.

¹⁹One latukaka kele ka wulu, ayusuwaka loko, Ne dia naka we ayuhandja etena kemo, kemʼedja we ayuhumba ntsha dikambu diako ntu.

²⁰Ulungaki alaku, etawoki wetshelu, Dia we ndjala la yimba lu nshi yayayi.

²¹Tukanyi efula tatuyalaka lʼutema wʼuntu. Keli daku dia Latuyalaka ayushikikala.

²²Untu atulangemaka ne dia ololo andi. Ndjala usi wula ambuleka ndjala kanga kashi ololo.

²³Woma wa Latuyalaka atushaka untu lumu. Ku untu ako ayuyalaka la ongenongeno. Nduku elanyelu katuyakaka le ndi.

²⁴Kanga nende atudjaka lunya landi lu lukinga la ma, Keli hatulediaka utsha lʼunyo.

²⁵Okomole kanga losoko, ku enginya ayuyala la ewu. Uhangweli kanga yimba, ku ndi ayumana ewu fundu.

²⁶One latutshelaka shi kolo, ndu latutshanyaka nyangu, Eli ona latutungaka akambu wa sonyi ndu tshumu.

²⁷Onʼami, ukimo mbuka wetshelu, Naka vo watukanganyaka uma lu aui wa yimba.

²⁸Omenyi wʼanyanya atonyolaka sambu kʼololo. Ndu unyo wa kanga kolo watomenaka kolo.

²⁹Dumbwelu diakalongoswama ne dia akanga a losoko, La dikomoki ne dia ekongo wa dingi nya.