Read tetala Tukedi 20 Bible Online

Tukedi 20 - tetala bible

Tukedi 20

¹Wanu eli osokanyi, enono ka wulu eli kanga lundju. La one latolombwamaka la wo, kema la yimba.

²Ngala ka mamba ka khumʼekanga eli uku dikita dia tambwe. One latuwutshaka kele, atuyatshelaka kolo ndame.

³Dia untu ndawo ta mbeli dikambu dia nemo. Keli akanga a dinginya tshe watusulanaka.

⁴Kanga nende hafusi kete lu nshi yʼekambelu. Ku lamʼayukuka dinela, ndi hutana engo.

⁵Esangweyu lʼutema wʼuntu eli uku ashi wa dingunda. Keli kanga yimba ayukiduwula.

⁶Antu efula wayoteketaka dia memakana kawo hita. Keli akona ayeya ntana kanga kolamelu?

⁷Untu ololo atokendakendaka lʼuluwanyi wʼutema andi. Anʼandi watongenangenaka lʼokongo andi!

⁸Khumʼekanga atudjaseka lu kiti kʼelumbwelu, Atuhandjulaka kolo tshe uma lʼendelu kʼashu andi.

⁹Akona eya mvuta ati: Lambedia utema ami, Laya pudipudi uma lu kolo yami?

¹⁰Tediko tutshikitanyi ta wetshu, ndu tediko ku tediko tutshikitanyi. Wehu ako ehendi weli wononyi le Latuyalaka.

¹¹Ndu ona ateyamaka uma lʼetsha andi, Kana lokewo landi layuluwana ndu layusimbo.

¹²Tui dia mbuka, la su dia mena, Latuyalaka kakatungi vo ako ahendi.

¹³Tulangaki djo, utukuyala la wula; Udihulaki ashu, ku we ayuheko ma.

¹⁴Usumbi wa diango atutaka ati: Kolo! kolo! Ku lamʼaishondi, atuyasemaka.

¹⁵Paunyi yeko ndu mboko yʼakeso efula. Keli elomo wa kanga yimba, well lowoko luleki ushinga wulu.

¹⁶Ose dihondo dia one letawo nfutela ukina. Ukimeli one lambuyadja usungi le asi wedja.

¹⁷Ma dia lukesu diatuyalaka mpe le untu. Keli lʼokongo diku, unyo andi ayulula too la mboko.

¹⁸Sangweyu tshe diatushikikalaka uma le ului wʼandaki a yimba. Oloki ta paka la yewu.

¹⁹One latetulaka eshimu, atushulaka akambu wa lu usheshe. Okone tekesanelaki la one lataseka unyo andi.

²⁰One ladja shi la nyangu mananu, Tala diandi diayudimala lu udjima a tshududu.

²¹Ukito watukundjaka untu esadi lʼetatelu, Hawutuyalaka la otshoko lʼekumelu.

²²Tutaki wati: Dimi layosomboya kolo; Ukungeli Latuyalaka, ku ndi ayukushimbela.

²³Tediko ta wutshu tutshikitanyi teli wononyi le Latuyalaka; Ndu yediko ya lukesu, kema ololo.

²⁴Latuyalaka katolombolaka untu. Ukundi ayulimbitela untu ndame mbuka kandi?

²⁵Eli djunga dia untu mvuta esadi ati: Ekila, Ku ndjukana yimba lʼokongo wʼedjelu ka dokoloko.

²⁶Khumʼekanga ka yimba, atunyaka antu wa kolo, Atasuyaka ne dia kolo yawo.

²⁷Khumʼutema kʼuntu eli tala dia Latuyalaka; Atushishimaka beke tshe diʼutema.

²⁸Memakana la mete watulamaka khumʼekanga. Sambu kʼololo atushikikeka kiti kandi ka diulelu.

²⁹Wulu wʼelongo wʼapami mbeli lutumbu lawo; Ndjui yʼesumbi wʼapami mbeli nemo diawo.

³⁰Dikomoki dia ntunguya untu puta, diatuwunyaka uma lu kolo. Puta ya dikomoki diatunyaka kolo, Ndu dikomoki diatukumako pulu ndu lʼutema.