Read tetala Tukedi 21 Bible Online

Tukedi 21 - tetala bible

Tukedi 21

¹Utema wa khumʼekanga weli okedi wʼashi lu lunya la Latuyalaka. Ndi atolombolaka lu dihuli tshe dialangandi.

²Mbuka tshe yʼuntu yatenamaka ololo lu ashu andi. Keli Latuyalaka atedikaka etema.

³Ntsha akambu wʼololo la akambu wʼusimbwi, Ambuleka ulambu ololo lu ashu wa Latuyalaka.

⁴Ashu wa lahi la utema wʼutaku, Tala diʼuntu a kolo, vo tshe weko kolo ketu.

⁵Tukanyi ta kanga kolamelu, tatuku ndjivaka diango efula. Keli kanga utalutalu atuyalaka la wula.

⁶Ekundjelu kʼukundji la lukesu eli engo kʼanyanya, Katetshetshaka antu watuyangaka nyoi.

⁷Ngala kʼantu wa kolo ayalanya, Ne dia vo watutunaka sambu kʼololo.

⁸Mbuka ka kanga unungu katuyalaka akote akote. Keli etsha wʼuntu ololo watusimboka.

⁹Mbidjase lu tshuku diʼote a luudu, Ambuleka mbidjase la umuntu kanga lundju lu luudu la wuki ololo.

¹⁰Utema wʼuntu a kolo atulangaka kolo. Unyandi hukama ketshi lu ashu andi.

¹¹Lamʼatuwokomolaka kanga losoko, enginya atuyalaka la ewu; Lamʼatuwetshaka kanga yimba, ndi atukundjaka ewu.

¹²Untu ololo atukanelaka luudu lʼuntu a kolo. Keli antu wa kolo watusukuyamaka utsha lʼelanyelu.

¹³One latudihaka atui lamʼalela usi wula, Ayulela ndu ndi, ku hawuwukela.

¹⁴Ushasha wa lu usheshe atukitshakitshaka kele, Ndu mbu yʼutshu yatukitshakitshaka ududu.

¹⁵Untu ololo atongenangenaka dia ntsha ololo. Keli elanyelu keko le wane watutshaka kolo.

¹⁶One latetolaka uma lu mbuka ka yimba, Ayuyala lʼului a wavo.

¹⁷One latulangaka ndjangenyangenya, ayuyala wula; La one latulangaka wanu la iso, hatuyalaka ongonyi.

¹⁸Untu a kolo eli efutelu ka mata kʼuntu ololo, La one laha la mbetawo eli efutelu ka mata le untu lʼuluwanyi.

¹⁹Mbidjase lu kete ya shenga, Ambuleka mbidjase la umuntu kanga lundju la ukiyanu ololo.

²⁰Ukundji la iso watuyalaka lu luudu la kanga yimba. Keli kanga enginya atudimanaka.

²¹One latuyelaka sambu kʼololo la memakana, Atutanaka lumu, sambu kʼololo la kenemo.

²²Kanga yimba atumbelaka lʼusumba wʼakanga a wulu, Atolembiaka wulu wʼelungamelu kawo.

²³One latulamaka unyo andi la lulimi landi, Atuhandjaka utema andi uma lu pa.

²⁴Kanga utaku, kanga lahi, lukumbu landi leli kanga losoko. Ndi atutshaka akambu utshatsha lʼutaku.

²⁵Saki ka kanga nende atudiakaka, Ne dia anya andi watutunaka nkamba ulimu.

²⁶Kanga okomiya atokomiyaka diango yanyi tshe. Keli untu ololo atukabaka diango aha la unyishi.

²⁷Ulambu wʼuntu a kolo weli wononyi. Vo wayuleka ndjala wononyi lamʼayundukimo la tukanyi ta kolo.

²⁸Omenyi wa kashi ayulanyema. Keli untu latulungaka, ayoteketaka nshi tshe.

²⁹Untu a kolo atuhindjaka elundji kandi. Keli untu lʼusimbwi atuluwanyaka mbuka yandi.

³⁰Nduku yimba, kana ewu, Kana daku, dieya nsemanela la Latuyalaka.

³¹Watolongosolaka falasa ne dia lushi la ta. Keli elembielo katuyakaka uma le Latuyalaka.