Read tetala Tukedi 24 Bible Online

Tukedi 24 - tetala bible

Tukedi 24

¹Tukaki antu wa kolo kandjema, Kuyanga nkumbula ndjala kame la wo,

²Ne dia etema awo watukanaka akambu wa ngala, La elomo awo watutaka akambu wa kolo.

³Uma lu yimba, katukamaka luudu; Ndu uma lʼewu, katulushikimalaka.

⁴Uma lu yimba, mbatululaka mvudu ya lʼetei Diango tshe diʼololo la diʼushinga a wulu.

⁵Kanga yimba katuyalaka la wulu, Ee, kanga ewu katukikitshaka wulu andi.

⁶Oloki ta paka la ewu, Ne dia elembielo keko lamʼeli ului wʼandaki wa yimba.

⁷Yimba yeko etali ladiku dia kanga enginya. Ndi hatufulaka unyo andi la eotwelo ka ngelu.

⁸One latukanaka dia ntsha kolo, Antu watuwetaka vati: Otomboshi.

⁹Kanyi ya nginyanginya yeli kolo, Ndu kanga losoko eli wononyi le antu.

¹⁰Naka we ayokomo lu lushi la pa, Wulu aye weli tshitshe.

¹¹Utshunguli waku watuwukutulaka utsha lu nyoi. Ushimbeli ndu wane wayangawo ndjaka.

¹²Naka nyu nyayuta nyati: Nyendi, shu kumbeya. One latedikaka etema wʼantu hukana yimba lu dikambu so? One latulamaka utema aye, ndi heyi dikambu ne uka? Ndi hatufutaka untu lʼuntu uku etsha andi?

¹³Onʼami, olekaki usanga, ne dia vo weli ololo. Apopo wʼusanga wʼuma lu ehihi wayuyala mpe lʼunyo aye.

¹⁴Ulimbite wati: Osoku mbeli yimba lʼutema aye. Naka we ambuyitana, ku we ayuyala la waho; Elungamelu kaye huyala anyanya.

¹⁵We untu a kolo, tuhulamelaki luudu lʼuntu ololo, Tulanyaki edjaselu kandi.

¹⁶Untu ololo atokokaka tena esambeli, ku ndi atunelaka ntu. Keli untu a kolo ayolembiama lu asui.

¹⁷Tongenangenaki lʼekwelo kʼutunyi aye. Tetawoki utema aye ngenangena lamʼalembiamandi,

¹⁸Ne dia Latuyalaka atukena dikambu diako, dio diatukuwusha lunyangu, Ku idi nkadimula kele kandi uma le ndi.

¹⁹Tuyahenyahenyaki ne dia atshi wʼakambu a kolo. Tukaki antu wa kolo kandjema,

²⁰Ne dia untu a kolo kema la difutu. Tala diʼuntu a kolo diayudimala.

²¹Onʼami, ukaki Latuyalaka woma, ndi la khumʼekanga. Tuwahediaki vo ahendi,

²²Ne dia asui wʼuma le wo wayuya shashimuya. Ayeya nimbitela elanyelu kʼuma le wo vo ahendi?

²³Ndu aui ane mbeli wʼasi yimba: Ndjala la shonodi lʼelumbwelu kema ololo.

²⁴One latutelaka untu a kolo ati: Untu ololo keye; Antu watuwudjaka mananu, wedja watuwengaka diengekhu.

²⁵Waku watuhangwelaka, wayongena ngena; La otshoko wʼololo wayuya le wo.

²⁶One latukaiuyaka diui diʼololo, Katononanaka lʼelomo.

²⁷Olongosole ulimu aye wa lʼandja, Utshi ulimu wʼekambo kaye. Ku lʼokongo diku, kuyuhiki luudu laye.

²⁸Tuyalaki omenyi wʼanyanya, dia mpindela unyaye unungu, Tukesaki untu lʼelomo aye.

²⁹Tutaki wati: Dimi layutshela uku akandantshela. Dimi layosomboya untu lʼuntu uku etsha andi.

³⁰Dimi laketi lʼumamu wʼekambo ka kanga nende, Ndu wʼekambo kʼelua kʼuntu laha la yimba.

³¹Ku lakenyi atende atu wambula lu ahuli tshe, Adungu wakakikumbi tshe, Ndu lukumbu lʼave lakanyuko.

³²Ku dimi lakendi tee, lakakani yimba ololo. Ku lamʼakamakienyi, dimi lakose wetshelu.

³³Yema ya djo, yema yʼotokokalu, Yema ya nkoma anya dia ndala djo,

³⁴Ku wula ayukukashimula uku opotodi, Ndu uhumba uku tomboki.[19]