Read tetala Tukedi 25 Bible Online

Tukedi 25 - tetala bible

Tukedi 25

¹Ndu tukedi tone teli ta Solomona, takasangula ekambi wa Hezekiya, khumʼekanga ka Juda.

²Mbishe dikambu, eli lutumbu la Unyashungu, Keli mbishula dikambu, eli lutumbu la khumi ya dikanga.

³Uku well ulungu etali, la kete ohongo, Osoku mbeli ndu etema wa khumi ya dikanga wulu wa nimbitela.

⁴Utanyisha akedi uma lu fesa, Ku utshudi ayutshula donga dia dimena la to.

⁵Utanyisha antu wa kolo uma la ntundu ka khumʼekanga, Ku kiti kandi ka diulelu kayushikikala lu sambu kʼololo.

⁶Tuyambiyaki la ntundu ka khumʼekanga, Tuyadjasi lʼului wʼantu a waki,

⁷Dia vo nkutela vati: Umbeli lindu, Ambuleka dia vo nkuhuluya la ntundu kʼuwandji lenaye lʼashu aye ololo.[20]

⁸Tunelaki esadi dia mama lʼuntu, Utukuyutewala lʼekumelu, Lamʼayukutsha unyaye sonyi.

⁹Usimbuli la unyaye dikambu, Tusanyaki diui dia lu usheshe le untu ukina,

¹⁰We utukutshama sonyi le one ladiuka, Ku lukumu la kolo kaye hushila.

¹¹Diui diutami shikaa lu dikambu, Dieli uku elua wa paunyi lu asangu wa fesa.

¹²Uku eli ashingu wa paunyi wʼatui la dengalenga dia paunyi ka lutshula, Osoku mbatuyalaka luhangu la kanga yimba lu atui wʼuntu latuwukelaka.

¹³Uku atuyalaka lungi lʼekama la tshitshi lu nshi ya dinela, Osoku mbatuyalaka dikendji dia kolamelu le wane wakutumi, Ne dia ndi atukitshakitshaka asulu wʼakhumendi.

¹⁴Uku eli wangi la lopepe laha la mvula, Osoku mbeli untu latuyasemaka la lukahu lahandatukahaka.

¹⁵Uma lʼetshelu kʼuntu lahuki kele esadi, katukadimulaka umbuledi tukanyi. Oteketa wʼokoke watokolaka weka.

¹⁶We ambushula usanga? Uli paka yediko yukuki la ye, Ne dia lamʼayutamanya mbuluta, utukuyutuwo.

¹⁷Tulekaki nkuma tena efula lu luudu la unyaye, Ne dia ndi atukukuheko, ku ndi ndjukutuna.

¹⁸Untu latutaka akambu wa kashi dikambu dia unyandi, Eli uku uhumo, yombo ndu luhitu la sodi.

¹⁹Mbekama untu laha la kolamelu lu nshi ya pa, Eli uku nu diambuhimbo, la lukulu lamboko.

²⁰Uku untu latukululaka koti lu nshi ya tshitshi, La latukitaka vole lu puta, Osoku mbeli untu latimbelaka kanga lunyangu esambu.

²¹Naka utunyi aye la ndjala, uwusha ma dia nde; Naka ndi la pusa, uwusha ashi wa no.

²²Ne dia we ayukitsha akalanga wa dja lʼote andi;[21] Ku Latuyalaka ayukufuta.

²³Lopepe lʼuma la ngelʼa kushi latelaka mvula. Ndu lulimi la lotendo, iatutungaka elundji ka kele.

²⁴Mbidjase lu tshuku diʼote a luudu, Ambuleka mbidjase la uinuntu kanga lundju lu luudu la wuki ololo.

²⁵Uku eli ashi wa tshitshi le untu lambuma wudi la pusa, Osoku mbeli lukumu lʼololo lʼuma lu kete yʼetali.

²⁶Uku eli eteko kambufutana la ushimba wambulanyema, Osoku mbeli untu ololo lambolembiama la ntundu kʼuntu a kolo.

²⁷Kema ololo nde usanga efula, Kema ololo untu ndjayangela lutumbu.

²⁸Untu laha la ndjakimela, Eli uku usumba wambuhandjo, waha la lukumbu.