Read tetala Tukedi 27 Bible Online

Tukedi 27 - tetala bible

Tukedi 27

¹Tuyasemaki dia lui, Ne dia we heyi akambu wayutumbaka la lushi la lushi.[23]

²Ete untu ukina akutumbuli, aha unyo aye weme; Ongendangenda, aha elomo aye weme.

³Dive dieli wutshu, ndu losenga leli wutshu. Keli ohenyohenyo wa kanga enginya mbaleka wutshu.

⁴Ududu eli kanga usihi, la kele eli kanga pedu. Keli, akona ayeya memala la ntundu ka kandjema?

⁵Luhangu la lu seke, Ambuleka ngandji ka lʼusheshe ololo.

⁶Puta yʼuma le ongenyi, yatushikikeka kolamelu; Keli anonelo wʼutunyi, watuyalaka lukesu.

⁷Utema wakalutshi, watuhetshaka usanga. Keli le untu leli ia ndjala, diango tshe diʼululu diatuyalaka mpe ketu.

⁸Uku atekekoka fudu uma lu kefu kato, Osoku mbeli untu latekekoka uma lu dihuli diandi.

⁹Iso la malashi wʼupumu watongenyangenyaka utema. Osoku mbatuyalaka alaku wa ngandji wʼuma le ongenyi mpe ketu.

¹⁰Tosekaki ongenyi aye ndu ongenyi wa sho. Tutshoki laka onanyo lushi le ye la asui, Ne dia usukanyi leli lasuki la ye, ambuleka onanyo leli etali ololo.

¹¹Onʼami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.

¹²Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.

¹³Ose dihondo diʼone letawo nfutela ukina. Ukimeli one lambuyakimo usungi ne dia umuntu akana.

¹⁴One latotshokolaka unyandi lʼaui wʼehangohango kʼolomo la pindju, Dikambu so diatuyalaka uku mananu le ndi.

¹⁵Mvula ka vwa vwa kahahimbo esadi, La umuntu kanga lundju weko pupu.

¹⁶One lalanga mbolembohaya, alembohaya lopepe, Akimeli iso lu lunya landi.

¹⁷Luwulu latudjaka luwulu diesa, Osoku mbatuluwanyaka untu elundji ka unyandi.

¹⁸One latolongosolaka utamba wʼelua, kayole elua uma loko; La one latulamaka khumendi, ayutumbwama.

¹⁹Uku ateneka elundji dedi diato lʼashi, Mbateneka utema wʼuntu le untu.

²⁰Dihuli diʼEdu la elanyelu hawutunduyaka saki, Ndu ashu wʼuntu pupu.

²¹Puki keko dia ndelola fesa, khuka keko ka ntshula paunyi. Keli untu atedikamaka uma lu lutumbu landi.

²²Kuyanga we ayoto kanga enginya lʼetuli, Kame la asami, Enginya kandi humo uma le ndi.

²³Ulimbitelaki nyimba yaye yʼekoko, Ulamaki dungalunga diaye,

²⁴Ne dia ekundji hawututshikalaka pundju. Dembo dia kusu diayutshikalaka lu nonga tshe uka?

²⁵Adiyu wa ndesha dungalunga wambuhimbwama, ku wʼomongela wambutumba, Ndu adiyu wa lʼekungu wambuhimbwama.

²⁶Ana wʼekoko weko, ne dia nkolotsha; Ndu mbudi yeko, ne dia nfuta ushinga wʼekambo.

²⁷Awele wa mbudi weko wa nkuka ma diaye la dia wa lu luudu laye, Ndu wankutsha ehumba wʼekambi aye wʼamantu.