Read tetala Tukedi 8 Bible Online

Tukedi 8 - tetala bible

Tukedi 8

¹Yimba hatulelaka, Ewu hatediaka diui diato?

²Lu akuna wʼetali wa lʼumamu a mbuka, Lu tuwuka katuyemalaka;

³Lasuki la suku diʼeotwelo kʼusumba, Lu kuki ya lʼeotwelo katuyuhangohangoka ati:[12]

⁴Nyu apami mbatumetaka; Diui diami mbetaka ndu elongo wʼapami.

⁵Nyu tuleli, nyeki yimba; Nyu dipoka, nyuyali la etema wʼewu.

⁶Nyulungi, ne dia dimi luyanga mvuta akambu a waki, Ne dia aui wʼusimbwi wayanga ntumba uma lʼunyo ami.

⁷Unyo ami atutaka aui wa mete, Kolo eli wononyi lʼelomo ami.

⁸Aui tshe watumba uma lʼunyo ami weli ololo, Nduku dikambu dia kashi kana dia wengenge diatuyalaka loko.

⁹Vo weli hwe le one leli la yimba, La wʼusimbwi le waku watutanaka ewu.

¹⁰Osonole dia mbosa wetshelu ami lu dihuli dia fesa, La ewo kami lu dihuli dia paunyi ka lutshula,

¹¹Ne dia yimba ndeka mboko yʼakeso ololo, La diango tshe diukukiye nanga, hadiedima la yo.

¹²Dimi, yimba, lambete yambalu edjaselu kami, Ndu lambushula ewu la yewo.

¹³Woma wa Latuyalaka eli dia mpetsha kolo. Utaku, ngala, mbuka ka kolo, La unyo a kolo mbatumuhetshaka.

¹⁴Wulu wa ndaka antu weli wami, ndu yimba yʼololo pupu; Dimi keli ewu, ndu kanga wulu.

¹⁵Uma le mi, katulelaka khumi ya dikanga, Ndu katusambulaka antu a waki akambu la sambu kʼololo;

¹⁶Uma le mi, katulelaka ewandji, Ndu katolombolaka antu a waki kete.

¹⁷Dimi latulangaka wane watunangaka. Wane watunyangaka lʼeteti, wayumbishula.

¹⁸Ongonyi la lutumbu watuyalaka kame la mi, Ekundji wa pundju la sambu kʼololo.

¹⁹Ulua ami ndeka paunyi ololo, ee, ndeka paunyi ka lutshula; La waho ami ndeka fesa kʼololo dimena.

²⁰Dimi latokendakendaka lu mbuka ka sambu kʼololo, Lʼatei a mbuka yʼusimbwi,

²¹Dia dimi ngonya wane watunangaka; Dia dimi nfudia ekundji awo.

²²Latuyalaka akantungi lʼetatelu kʼulimu andi,[13] Untu la ntundu ka etsha andi wʼedjedja.

²³Dimi lakashikikala umaka mombokombola, Umaka etatelu, ntundu kete yatatungama.

²⁴Dimi lakatungama la ntundu kʼehongo watayala, Ka teko diatayala la ashi;

²⁵La ntundu kʼekungu watakeketala, Ndu la ntundu kʼakuna watayala, mbakamuto.

²⁶Laso ku ndi atatungi kete, kuyanga esui, Kana ditshu dia lʼandja.

²⁷Lamʼakandatungi ulungu, dimi laki lawo, Ndu lamʼakandadji ulelu lu ashi a waki;

²⁸Lamʼakandashikike wangi ladiku, Ndu lamʼakatumbi teko diʼuma lu ohongo la wulu;

²⁹Lamʼakandadji ulelu lu ashi a waki, Ne dia ashi watukulekana olembe andi; Lamʼakandashikike dikitshelu dia kete,

³⁰Dimi, ukambi a komba, laki lasuki la ndi. Dimi lakongenyangenyaka nshi tshe, Ndu lakangenangenaka la ntundu kandi tena tshe.

³¹Dimi latongenangenaka lu kete yandi, yakuka antu mbidjase; Ndu lakayala la ongenongeno ami kame lʼantu.

³²Kakiane anʼami, nyumbukeli, Ne dia wane watulamaka ditshelu diami, weli la ongenongeno.

³³Nyulungi wetshelu ndu nyuyali la yimba, Tanyuyikaleki.

³⁴Untu latumbukelaka, Latendaka lu asuku ami la lushi la lushi, Latunkungelaka lu dikoho diawo, eli la ongenongeno.

³⁵One lambuntana, atutanaka lumu, Atuhumoka lukulu lʼolo le Latuyalaka.

³⁶Keli one latuntshelaka kolo, atutshelaka utema andi kolo; Wane tshe watumpetshaka, watulangaka nyoi.